Avāna Raithāwui Machut Akha Chihovā
Ezekielna phang akha ngaraikhui kala khayonga awui ramchung shangkhui, amang zakhui, khipā ramkhangkhavai miyarawui mangli ngarumkhui, kala awui kharumana ana khi sākhui mali da ngachikhui. Ngachon mathānli khapa miyarana 'khangahanwui tui nā ta ngasoda maleila' da kahanga tui ngachikhui, ithumwui Avāna ngahaokhavai atam hāhaira da tui lāngkhui.
12 1Ithumwui Avāwui tui chi ili rāhānga:
2"Miwui naomayara, na ngakaikashe shimkhur alungli ringa; athum theikhavai mik kai, kha matheimana, shākhavai khanā kai, kha mashāmana, kaja athum ngakaikashe shimkhurna.
3"Chiwui vang na, miwui naomayara, raithāhaoki kajiwui vang nawui otrom shaksākhuilu, kala athumwui miktāli zimiksholi raithā vālu. Athumwui miktāli nawui apam eina apam katei akhali raithā vālu. Athum ngakaikashe shimkhur ngasakhailala, athumna theikapai.
4"Athumwui miktāli zimiksholi raithā otrom thāda nawui otrom khuishoklu; kala athumwui miktāli ngazin raithāhaokibing thāda na khalatta shoklu.
5"Athumwui miktāli phākho chi chuiphutlu, kala chiwui eina nawui otrom khuishoklu.
6"Athumwui miktāli chi nayartuili phungda tangkhamangli khuishoklu. Nana ngalei mathei khavai namai phumlu, kaja ina nali Israelwui shimkhurwui vang machut akha sāhaira."
7Chiwui vang ina kaso kahai tākam eina sai. Zimiksholi ina raithā otrom thāda iwui otrom khuishoka, kala ngazin ipāng eina phākho chi chuiphutta. Tangkhamangli mi saikorawui miktāli ina iyartuili phungda khuishoka.
8Ngathor ithumwui Avāwui tui chi ili rāhānga:
9"Miwui naomayara, Israelwui shimkhur, ngakaikashe shimkhur china, nali, 'Na khi sākhala?' da mangahānmarala? 10Athumli hānglu, 'Proho Avāna hānga: Khamarān hi Jerusalemli khalei wungnaowui pongli kala chiwuili khalei Israelwui shimkhur saikorawui pongli kahāngna.'
11Hānglu, "'I nathumwui machutna. Ina sāhai thāda, athumlila hithāda sāra; athum tukthuida raithā vāra. 12Athumwui alungli khalei wungnao china tangkhamangli awui otrom ayartuili phungda shokra. Ali chiwui eina khuishok khavai athumna phākho chuiphutra. Ana amik eina ngalei mathei khavai amai phumra. 13Iwui khalen chi ina awuitungli rānra, kala a iwui khalen eina manra. Ina ali Babylon, Chaldeanaobingwui ngaleili khuivāra, chithālala ana chi matheimara, kala chili ana thira. a a v13 Wungnao chi Zedekiah, Judahwui akuplamwui awungana. Ana Jerusalemwui eina yāmlakha manhaida, Babylonli khuikhavā maranglai awui mik khangapeo sāngasaka—chiwui vang ana keinung chili samphanghailala matheihaimana, sāngngarānda hānghai tākam eina. 14Ina ali kuimareida khalei saikora, awui ngachonkhamebing kala awui raimi saikora chi masi saikorali chaiyāngva ngasakra, kala athumwui thili raighai chihovāra.
15"Athumli yurbingwui ngachaili kashamvāda, kala ngalei apam kachiva̱li chaiyāngva ngasak tharan, I athumwui Avāna da theikhuira.
16"Chithālala, raighai, chāmrei, kala kazātkashi eina mi kateokha ina shivāra, chithākha athumna khavā yurbingwui ngachaili athumwui ningkakachai ot saikora hāngchitheira. Chitharan athumna I athumwui Avāna da theikhuira."
17Chitharan ithumwui Avāwui tui chi ili rāhānga:
18"Miwui naomayara, nawui kashakazā chi kathirri eina shailu, kala nawui tara̱ chi kathirra kala ngacheerang eina manglu.
19"Ngalei chiwui mibingli hānglu: Israelwui ngaleili, Jerusalemli khaleibingwui pongli Proho Avāna hithāda hānga: Athumna athumwui kashakazā chi ngacheerang eina zāra, kala athumwui tara̱ chi shivamri eina mangra, kaja chili khaleibing saikorawui khayonwui vang, awui khangachā saikora chi athumwui lam eina raimiserhaira.
20"Mi pān keinungbing chi ngayāng ngasāhaora, kala lam chi ramcho ngasāhaora. Chitharan I nathumwui Avā da nathumna theinaora.'"
Avāna Chānjam Khamasai chi Katatmi
21Ithumwui Avāwui tui china ili rāhānga:
22"Miwui naomayara, Israelwui alungli chānjam hi khikhala kaji: 'Atam chi longra, kala khamahā saikora chi shimānhaora'?
23"Chiwui vang eina athumli hānglu: 'Proho Avāna hithāda hānga: Ina chānjam hi katathaira; athumna Israelwui alungli chi machānsamluimara.' Chiwui mahutli, athumli hānglu: 'Atam chi nganaihaira, kala khamahā saikorawui ungshung chi nganaihaira. 24Kaja Israelwui shimkhurli mikhanam khamahā kala sotmasaoda khanong chi maleiluimara.
25"Kaja I nathumwui Avā; ina matui kaji tui chi hāngra, kala chi ungshunglakra. Kharā maleiluimara; kaja nathumwui atamli, O ngakaikashe shimkhur, ina tui akha hāngra, kala chi ina ungshung ngasakmira, da Proho Avāna hānga.'"
26Ithumwui Avāwui tui china ili rāhānga:
27"Miwui naomayara, Israelwui shimkhurna hānga, 'Ana kathei khamahā chi zingkum kachungkhawui thili vangna; ana atam katāva̱wui pongli marānmi.'"
28"Chiwui vang eina athumli hānglu: Proho Avāna hithāda hānga: Iwui tui akhanidala kharā maleiluimara. Ina hāngkahai tui chi ungshunglakra, da Proho Avāna hānga."
