எசேக்கியேல் 11

11 ¹ஆவியானவர் என்னைத் தூக்கி, கிழக்குமுகமாயிருக்கிற எங்கள் பிதாவின் ஆலயத்தின் கிழக்கு வாசலுக்கு என்னைக் கொண்டுபோனார். வாசலின் நடையில் இருபத்தைந்து மனுஷர் இருந்தார்கள்; அவர்களுக்குள்ளே அசூரின் குமாரனாகிய யசனியாவையும், பெனாயாவின் குமாரனாகிய பெலத்தியாவையும், ஜனத்தின் தலைவர்களாகிய இவர்களைக் கண்டேன்.

²அவர் என்னை நோக்கி: மனுஷகுமாரனே, இந்த நகரத்தில் தீங்கு நினைத்து, துன்மார்க்க ஆலோசனை சொல்லுகிற மனுஷர் இவர்களே; ³இவர்கள்: வீடுகளைக் கட்டுகிறதற்குக் காலம் சமீபித்திருக்கிறதல்லவா? இந்த நகரம் பானை, நாங்கள் இறைச்சி என்று சொல்லுகிறார்கள். ⁴ஆகையால் அவர்களுக்கு விரோதமாகத் தீர்க்கதரிசனம் சொல்லு; மனுஷகுமாரனே, தீர்க்கதரிசனம் சொல்லு என்றார்.

⁵அப்பொழுது எங்கள் பிதாவின் ஆவி என்மேல் இறங்கி, என்னை நோக்கி: எங்கள் பிதா சொல்லுகிறது என்னவென்றால், இஸ்ரவேல் வம்சத்தாரே, நீங்கள் இப்படிச் சொல்லுகிறீர்கள்; உங்கள் மனதில் எழும்புகிறதை நான் அறிவேன் என்று சொல் என்றார். ⁶இந்த நகரத்தில் நீங்கள் அநேகரைக் கொலைசெய்து, அதின் வீதிகளைக் கொலையுண்டவர்களால் நிரப்பினீர்கள்.

⁷ஆகையால் ஆண்டவராகிய பிதா சொல்லுகிறது என்னவென்றால்: நீங்கள் இந்த நகரத்தின் நடுவில் கொலைசெய்து போட்டவர்களே இறைச்சி, இந்த நகரம் பானை; ஆனாலும் நீங்கள் அதற்குள்ளிருந்து துரத்திவிடப்படுவீர்கள். ⁸நீங்கள் பட்டயத்துக்குப் பயந்தீர்கள்; ஆகையால் நான் உங்கள்மேல் பட்டயத்தை வரப்பண்ணுவேன் என்று ஆண்டவராகிய பிதா சொல்லுகிறார். ⁹நான் உங்களை நகரத்திலிருந்து வெளியே கொண்டுபோய், அந்நியர் கையில் உங்களை ஒப்புக்கொடுத்து, உங்களுக்கு விரோதமாய் நியாயத்தீர்ப்புகளைச் செய்வேன். ¹⁰நீங்கள் பட்டயத்தால் விழுவீர்கள்; இஸ்ரவேலின் எல்லையிலே நான் உங்களை நியாயந்தீர்ப்பேன்; அப்பொழுது நான் உங்கள் பிதா என்று அறிவீர்கள். ¹¹இந்த நகரம் உங்களுக்குப் பானையாயிராது; நீங்களும் அதற்குள் இறைச்சியாயிருக்கமாட்டீர்கள்; இஸ்ரவேலின் எல்லையிலே நான் உங்களை நியாயந்தீர்ப்பேன். ¹²அப்பொழுது நான் உங்கள் பிதா என்று அறிவீர்கள்; நீங்கள் என் கட்டளைகளின்படி நடவாமலும், என் நியாயங்களைக் கைக்கொள்ளாமலும், உங்களைச் சுற்றியிருக்கிற ஜாதிகளுடைய நியாயங்களின்படி நடந்தீர்கள்.

புதிய இருதயத்தைப் பிதா வாக்குப்பண்ணுகிறார்

¹³நான் தீர்க்கதரிசனம் சொல்லிக்கொண்டிருக்கையில், பெனாயாவின் குமாரனாகிய பெலத்தியா செத்தான். அப்பொழுது நான் முகங்குப்புற விழுந்து: ஆ, ஆண்டவராகிய பிதாவே! இஸ்ரவேலில் மீதியாயிருக்கிறவர்களை நீர் முழுவதும் அழித்துப்போடுவீரோ? என்று மகா சத்தமாய்க் கூப்பிட்டேன்.

¹⁴அப்பொழுது எங்கள் பிதாவின் வார்த்தை எனக்கு உண்டாகி, அவர் சொன்னது:

¹⁵மனுஷகுமாரனே, உன் சகோதரர், உன் சகோதரராகிய உன் இனத்தார், இஸ்ரவேல் வம்சத்தார் அனைவரையும் குறித்து, எருசலேமின் குடிகள்: நீங்கள் தேவனுக்குத் தூரமாயிருங்கள்; இந்த தேசம் எங்களுக்குச் சுதந்தரமாகக் கொடுக்கப்பட்டது என்று சொல்லுகிறார்கள்.

¹⁶ஆகையால் நீ சொல்லவேண்டியது என்னவென்றால்: ஆண்டவராகிய பிதா சொல்லுகிறது என்னவென்றால், நான் அவர்களை ஜாதிகளுக்குள்ளே தூரமாய் அனுப்பி, தேசங்களில் அவர்களைச் சிதறடித்தாலும், அவர்கள் போன தேசங்களில் நான் அவர்களுக்குக் கொஞ்சக்காலம் பரிசுத்த ஸ்தலமாயிருந்தேன்.

¹⁷ஆகையால் நீ சொல்லவேண்டியது: ஆண்டவராகிய பிதா சொல்லுகிறது என்னவென்றால், நான் உங்களை ஜனங்களிலிருந்து சேர்த்து, நீங்கள் சிதறடிக்கப்பட்ட தேசங்களிலிருந்து உங்களைக் கூட்டி, இஸ்ரவேல் தேசத்தை உங்களுக்குத் தருவேன்.

¹⁸அவர்கள் அங்கே வந்து, அதிலுள்ள சகல அருவருப்பான விக்கிரகங்களையும், சகல அருவருப்புகளையும் அதிலிருந்து அகற்றிப்போடுவார்கள். ¹⁹நான் அவர்களுக்கு ஒரே இருதயத்தைத் தந்து, அவர்களுக்குள்ளே புதிய ஆவியைக் கட்டளையிடுவேன்; அவர்களுடைய மாம்சத்திலிருந்து கல்லான இருதயத்தை எடுத்துப்போட்டு, சதையான இருதயத்தை அவர்களுக்குக் கொடுத்து, ²⁰அவர்கள் என் கட்டளைகளின்படி நடந்து, என் நியாயங்களைக் கைக்கொண்டு, அவைகளின்படி செய்யும்படிக்கு இப்படிச் செய்வேன்; அப்பொழுது அவர்கள் என் பிள்ளைகளாயிருப்பார்கள், நான் அவர்களுடைய பிதாவாயிருப்பேன். ²¹ஆனாலும் தங்கள் அருவருப்புகளையும் தங்கள் இழிவான செய்கைகளையும் இருதயத்தால் விரும்பிப் பின்பற்றுகிறவர்களுடைய நடக்கையை அவர்களுடைய தலையின்மேலே சுமரப்பண்ணுவேன் என்று ஆண்டவராகிய பிதா சொல்லுகிறார்.

²²அப்பொழுது கேருபீன்கள் தங்கள் செட்டைகளை விரித்தன, அவைகள் அருகே சக்கரங்களும் இருந்தன; இஸ்ரவேலின் பிதாவின் மகிமை அவைகளுக்கு மேலாக இருந்தது. ²³எங்கள் பிதாவின் மகிமை நகரத்தின் நடுவிலிருந்து எழும்பி, நகரத்துக்குக் கிழக்கே இருக்கிற மலையின்மேல் நின்றது. ²⁴பின்பு ஆவியானவர் என்னைத் தூக்கி, எங்கள் பிதாவின் ஆவியினாலே தரிசனத்திலே என்னைக் கல்தேயாவில் சிறைப்பட்டவர்களிடத்திற்குக் கொண்டுபோனார்; அப்பொழுது நான் கண்ட தரிசனம் என்னைவிட்டு எழும்பிப்போயிற்று. ²⁵அப்பொழுது எங்கள் பிதா எனக்குக் காண்பித்த எல்லாக் காரியங்களையும் நான் சிறைப்பட்டவர்களுக்குச் சொன்னேன்.