Mi eng' bukuit

Ezekiel 11 FHB Father's Heart Bible™

Kiistoi 15% eng' kiy ne iale korook →
Bukuit

Ng'olyoot ne ya eng' nganaseet

Eng' kurgeetap nganaseet konyoorun Ezekiel piik tiptem ak muut, kandoigap piik che goonei ng'olyoot ne ya po tereenet, ne ma mi iman. Kobek age eng' icheek ye maoteni ineendet. Kong'wanitu, koteebe ngo komi chii ne sar saboondanyi. Konyo arorutyetap Kwandanyo kobwa kiprutoinik che kibaoryan: mugulelda ne po panyeek eng' olyetap mugulelda ne po koito.

Ng'alaali Kwandanyo eng' mustarisyek 2–12, 15–21

Sura 11.

Ki eetwo Kabuuset ak koiito kurgeetap koot ne po Kwandanyo ne po murot ne charu asiista, ne tokyingei murot ne charu asiista. Ki mi eng' kirokto piik tiptem ak muut, ak kaageer among icheek Jaazania weeriitap Azur ak Pelatia weeriitap Benaiah, kandoigap piik.

Ki mwaiwo koleenji, “Weeriitap chii, pichu ko piik che chobei yaityet ak che goonei ng'olyoot ne ya eng' nganasani, che leenji, ‘Tos ma neegit sait ne keteech kooriik? Tereet ni, acheek ko panyeek.’ Nooto anyun, imaoten agaigai icheek; imaoten, Weeriitap chii.”

Ki nyoonji Kabuusetap Kwandanyo, ak koleenjo ale amwa: ‘Kamwa ko uu ni Kwandanyo: Kou nooto ye omwae, okweek kootap Israel; angen kiit ne ng'eetei muguleldang'wong'.’ Kaobar che chaang' eng' nganasani ak kong'emak ortinwekyik piik che kagebar.

Kou nooto anyun mwaei Kiptaiyat Kwanda: Icheek che kaobar ak koip eng' nganaseet ko panyeek, nganaseet ko tereet; ago keoonok eng' oriit. Kaiywei okweek rotweet, ak aibun rotweet eng' okweek, kole Kiptaiyat Kwanda. Akoonok kong'eetu eng' nganaseet, aindoiwok eunegap toek, ak ayaiywok kirwoogutik. Ibutos eng' rotweet. Airwookok eng' kiwotetap Israel, ak ingen ale aa Kwandang'wong'. Ma koek nganasani tereet eng' okweek, ak ma koegu okweek panyeek che mi oriit. Airwookok eng' kiwotetap Israel, yeityo ingen ale aa Kwandang'wong'—okweek che ma kosup ng'atuutikyuk anan koriip kirwoogutikyuk, ago kimeny ko uu kirwoogutigap pororyosyek che neegitee okweek.

Kayomei Kwanda mugulelda ne leel

Ye kiamaoten, kome Pelatia weeriitap Benaiah. Ki ang'uruuk kot koit togeennyu ng'wony ak awaach eng' kutit ne oo, ale, “Ooi, Kiptaiyat Kwanda! Iwong'u che ki ng'et che po Israel komugul?”

Ki ityon anyun ng'olyootap Kwandanyo, kole:

Weeriitap chii, tupchosyeguk—tupchosyeguk, kaptilyonutikyuk che po iman, kootap Israel komugul, icheek tugul—kamwa piigap Jerusalem, kole, ‘Oloo eng' Kamuktaindet; kagikooch acheek emoni ko ruroteet.’

Nooto anyun, imwae, ‘Kamwa ko uu ni Kiptaiyat Kwanda: Agot ye ki aoototoi icheek loo among pororyosyek ak aiyeste icheek among emotinwek, ago ki aa ole-tiliil eng' icheek eng' sait ne ming'in eng' emotinwek che ki kobendi.’

Kou nooto, imwae: ‘Mwaei Kiptaiyat Kwanda: Ayum okweek kobun piik, ayumun okweek kobun emotinwek che ki kiyesta okweek, ak akoonok emetap Israel.’

Ye kobwa yooto, koisto kanamonikyik tugul che wechotin ak tuguukyik tugul che kiwechei eng' oriit. Akoochi icheek muguleldo agenge ak ainde kabuuset ne leel kwenunnywa. Aistoi muguleldap koi eng' poortonywa ak akoochi muguleldap panyeek, si kosup ng'atuutikyuk ak koriip kirwoogutikyuk ak koyai. Ak koegu lagokyuk, ak aek Kwandanywa. Ago icheek che subei mugulelwekwak tuguuk che kiwechei ak poisyonik che yaach—ainde ortinwekwak metowekwak icheek, kole Kiptaiyat Kwanda.

Yeityo koiito cherongo kebebaikwak, komi keelyek oling'wak, ak toroorindap Kwandap Israel parak. Ki ng'eet toroorindap Kwandanyo eng' kwenutap nganaseet ak kotonon eng' tulweet ne po murot ne charu asiista eng' nganaseet. Ki eetwo Kabuuset ak koiito eng' ng'ang'utyet, eng' Kabuusetap Kwandanyo, agoi kaprutoinik che mi Babel. Yeityo koistoegei ng'ang'utyet ne ki ageer eng' anee. Ak ki ang'alaalji kaprutoinik ng'aleek tugul che ki koboorwo Kwandanyo.