Koroitap rireenetap Kwanda
Kiguur Kwandanyo muren lo che tinyei kiboriindap geesto, ak kolaachi age katanit ne tinyei kiboriindap siruutik koinde koroito tagunyisyegwap pichu tugul che oiyoni kanamonigap nganaseet. Kebar alak kobar, kong'etee ole-tiliil. Kobutyi Hesekiel eng' tainnyi ak koteebe kole mi ne wekoni.
Ng'alaali Kwandanyo eng' mustarisyek 1, 4–7, 9–10
9 1Ki waach anyun eng' kutit ne oo eng' ole kaagas, kole, “Oriik, riibiigap nganaseet, age tugul kotinyei kiboriindap geesto eng' euut.”
2Ki pwa muren lo kobun kurgeet ne po parak ne tokyingei murot kaataam, age tugul kotinyei kiboriit ne ibare eng' euut; kwenunnywa chiito age ne kolaachi katanit, ne tinyei kiboriindap siruutik eng' tabandanyi. Ki pwa ak kotonon eng' tyogetap kapkorosuut ne po sugunwet.
3Ki ng'eet liilindap Kwandanyo kobun paragutap cherongo ole kingo tebee, kwo kurgeetap koot. Ki guur chiito ne kolaachi katanit ne tinyei kiboriindap siruutik eng' tabandanyi.
4Ki leenji Kwandanyo, “Isiir nganaseetap Jerusalem, ak inde koroito tagunyisyegwap pichu che oiyoni ak che tigendosi amu kanamonik tugul che kiyaei eng' olooto.” a a v4 Pichu che ki kigonor koroito si kosar ko icheek che ng'wandosi muguleldaikwak amu tengekto ne mi tyoget — sarei ak koriibei Kwandanyo lagok che arageni kiy ne arageisyei ineendet.
5Ki leenji alak eng' ole kaagas, kole, “Osiir nganaseet osup ineendet ak obar. Amat koriiree koong'wong', amat ogeer. 6Boisieek, murenik, tipik, lagok, kobogorisyek—obar icheek tugul kogees. Ago amat otwaa chii age tugul ne tinyei koroito. Otau eng' ole-tiliilnyu.” Ki tau anyun eng' poisyek che mi taitap koot.
7Ki leenji anyun icheek, “Oyai koot koek ne ng'wony, onyi seremwek piik che kaamee. Omande!” Ki manda anyun ak kobar piik eng' nganaseet.
8Ye kibare icheek, ki ng'etei anee akenge. Ki ng'uruukyo kot koit ng'wony togeennyu ak ariir, ale, “Achicha, Kiptaiyat Kwanda! Igees che ki ng'et tugul che po Israel ye iroong'u nereegeng'ung' eng' Jerusalem?”
9Ki leenjo, “Oo miising' chalwetap kap Israel ak Judah. Kanyiitaat emet korotiik, ak kanyiitaat nganaseet yaityet, amu mwaei icheek kole, ‘Kabagaakte Kamuktaindet emet; ma keerei Kamuktaindet.’ 10Anee ko maariiree anan ageer icheek. Ande ortinwekwak kotebee metowekwak.”
11Ki mwa anyun chiito ne kolaachi katanit ne tinyei kiboriindap siruutik eng' tabandanyi, kole, “Kaayai ko uu ye king'aten.”