Alamar Jinƙai ta Ubanmu
Ubanmu ya kira mutum shida masu makamai, ɗaya kuma sanye da lilin da kayan rubutu ya sa alama a goshin duk wanda yake baƙin ciki saboda muguntar birnin. Aka bugi sauran, tun daga wuri mai tsarki. Ezekiyel ya fāɗi rubda ciki ya tambaya ko za a bar wani.
9 1Sai ya yi kira da ƙarfi a kunnuwana, ya ce, “Ku zo kusa, ku masu kula da birnin, kowannenku da makamin hallaka a hannunsa.”
2Sai ga mutane shida sun fito daga ƙofar sama wadda take fuskantar arewa, kowannensu da makami mai kisa a hannunsa; a cikinsu kuwa akwai wani mutum saye da tufar lilin, da kayan rubutu a gefensa. Suka zo suka tsaya kusa da bagaden tagulla.
3Sai ɗaukakar Ubanmu ta tashi daga bisa kerubobin inda ta kasance, zuwa madogarar ƙofar gidan. Sai ya kira mutumin nan saye da tufar lilin wanda yake da kayan rubutu a gefensa.
4Ubanmu ya ce masa, “Ka ratsa cikin birnin Urushalima, ka yi wa goshin waɗanda suke nishi suna baƙin ciki saboda dukan abubuwan ƙyama da ake yi a ciki alama.” a a v4 Waɗanda aka yi wa alamar tsira su ne waɗanda zuciyarsu take ɓarkewa saboda zunubin da yake kewaye da su — Ubanmu yana kiyaye 'ya'yan da suke baƙin cikin abin da yake ba shi baƙin ciki, ya kuma sa musu hatimi.
5Ya ce wa sauran a kunnuwana, “Ku bi shi ku ratsa cikin birnin, ku yi ta bugu. Kada idanunku su ji tausayi, kada ku nuna jinƙai. 6Ku karkashe su duka, tsofaffi, da samari, da 'yan mata, da yara, da mata. Amma kada ku taɓa duk wanda yake da alamar. Ku fara daga wuri mai tsarki na.” Saboda haka suka fara da dattawan da suke gaban gidan.
7Sai ya ce musu, “Ku ƙazantar da gidan, ku cika filayen da gawawwaki. Ku tafi!” Sai suka fita suka yi ta karkashe mutane cikin birnin.
8Yayinda suke ta karkashewa, ni kaɗai na rage. Sai na fāɗi rubda ciki na yi kuka, “Kaito, ya Ubangiji Uba mai iko duka! Za ka hallaka dukan raguwar Isra'ila ne a lokacin da kake zuba fushinka a kan Urushalima?”
9Sai ya ce mini, “Laifin gidan Isra'ila da na Yahuda ya yi yawa ƙwarai. Ƙasar ta cika da zub da jini, birnin kuma ya cika da rashin adalci, gama suna cewa, 'Allah ya yashe ƙasar; Allah ba ya gani.' 10Ni kuwa, ba zan ji tausayinsu ba, ba kuwa zan nuna jinƙai ba. Zan sāka musu ayyukansu a kansu.”
11Sai mutumin nan saye da tufar lilin wanda yake da kayan rubutu a gefensa ya kawo labari, ya ce, “Na yi yadda ka umarce ni.”