ପିତାଙ୍କ କୃପାର ଚିହ୍ନ

ଆମର ପିତା ଅସ୍ତ୍ରଧାରୀ ଛଅ ଜଣ ପୁରୁଷଙ୍କୁ ଡାକନ୍ତି, ଓ ଲେଖନୀ-ପାତ୍ର ଧରିଥିବା ଶୁକ୍ଳବସ୍ତ୍ର ପରିହିତ ଜଣେ ନଗରର ଦୁଷ୍ଟତା ପାଇଁ ଶୋକ କରୁଥିବା ସମସ୍ତଙ୍କ କପାଳରେ ଚିହ୍ନ ଦିଅନ୍ତି। ଅବଶିଷ୍ଟମାନେ ଧର୍ମଧାମଠାରୁ ଆରମ୍ଭ କରି ବଧ କରାଯାଆନ୍ତି। ଯିହିଜିକଲ ମୁହଁ ମାଡ଼ି ପଡ଼ନ୍ତି ଓ ପଚାରନ୍ତି କେହି ଅବଶିଷ୍ଟ ରହିବେ କି ନାହିଁ।

ଅଧ୍ୟାୟ 9।

ତତ୍ପରେ ସେ ମୋʼ କର୍ଣ୍ଣଗୋଚରରେ ଉଚ୍ଚସ୍ଵରରେ ଡାକି କହିଲେ, “ହେ ନଗରର ତତ୍ତ୍ଵାବଧାରକମାନେ, ପ୍ରତ୍ୟେକେ ଆପଣା ବିନାଶକ ଅସ୍ତ୍ର ହସ୍ତରେ ଧରି ନିକଟକୁ ଆସ।”

ସେତେବେଳେ ଉତ୍ତରାଭିମୁଖ ଉପର ଦ୍ଵାର ଆଡ଼ୁ ଛଅ ଜଣ ପୁରୁଷ ଆସିଲେ, ପ୍ରତ୍ୟେକେ ଆପଣା ପ୍ରଳୟକାରୀ ଅସ୍ତ୍ର ହସ୍ତରେ ଧରିଥିଲେ; ସେମାନଙ୍କ ମଧ୍ୟରେ ଜଣେ ପୁରୁଷ ଶୁକ୍ଲ ବସ୍ତ୍ର ପରିଧାନ କରିଥିଲେ ଓ ତାହାଙ୍କ କଟିଦେଶରେ ଲେଖକର ମଶୀଆଧାର ଥିଲା। ସେମାନେ ଆସି ପିତ୍ତଳମୟ ବେଦିର ପାର୍ଶ୍ଵରେ ଠିଆ ହେଲେ।

ଆଉ ଯେଉଁ କିରୂବ ଉପରେ ଆମ୍ଭମାନଙ୍କ ପିତାଙ୍କ ମହିମା ଅବସ୍ଥିତ ଥିଲା, ତହିଁରୁ ତାହା ଉଠି ଗୃହର ପ୍ରବେଶ ସ୍ଥାନକୁ ଗଲା। ପୁଣି ସେ ଶୁକ୍ଲ ବସ୍ତ୍ର ପରିହିତ ଓ କଟିଦେଶରେ ଲେଖକର ମଶୀଆଧାରଧାରୀ ସେହି ପୁରୁଷଙ୍କୁ ଡାକିଲେ।

ଆଉ ଆମ୍ଭମାନଙ୍କ ପିତା ତାହାଙ୍କୁ କହିଲେ, “ତୁମ୍ଭେ ଯିରୂଶାଲମ ନଗର ମଧ୍ୟଦେଇ ଯାଅ, ପୁଣି ସେଠାରେ କୃତ ସମସ୍ତ ଘୃଣ୍ୟ କର୍ମ ସକାଶୁ ଯେଉଁମାନେ ଦୀର୍ଘ ନିଃଶ୍ଵାସ ଓ କ୍ରନ୍ଦନ କରନ୍ତି, ସେମାନଙ୍କ କପାଳରେ ଚିହ୍ନ ଦିଅ।” ^a

ଆଉ ଅନ୍ୟମାନଙ୍କୁ ସେ ମୋʼ କର୍ଣ୍ଣଗୋଚରରେ କହିଲେ, “ତାହାର ପଛେ ପଛେ ନଗର ମଧ୍ୟଦେଇ ଯାଇ ଆଘାତ କର। ତୁମ୍ଭମାନଙ୍କ ଚକ୍ଷୁ ଦୟା ନ କରୁ, ଅନୁକମ୍ପା ପ୍ରକାଶ ନ କର। ବୃଦ୍ଧ, ଯୁବକ, ଯୁବତୀ, ଶିଶୁ ଓ ସ୍ତ୍ରୀ — ସମସ୍ତଙ୍କୁ ବଧ କର। କିନ୍ତୁ ଯେଉଁମାନଙ୍କଠାରେ ଏହି ଚିହ୍ନ ଅଛି, ସେମାନଙ୍କ ମଧ୍ୟରୁ କାହାକୁ ସ୍ପର୍ଶ କର ନାହିଁ। ମୋହର ପବିତ୍ର ସ୍ଥାନଠାରୁ ଆରମ୍ଭ କର।” ତହୁଁ ସେମାନେ ଗୃହ ସମ୍ମୁଖସ୍ଥ ପ୍ରାଚୀନବର୍ଗଙ୍କଠାରୁ ଆରମ୍ଭ କଲେ।

ପୁଣି ସେ ସେମାନଙ୍କୁ କହିଲେ, “ଗୃହକୁ ଅଶୁଚି କର, ପ୍ରାଙ୍ଗଣସବୁ ହତ ଲୋକରେ ପରିପୂର୍ଣ୍ଣ କର। ଯାଅ!” ତହୁଁ ସେମାନେ ବାହାରକୁ ଯାଇ ନଗରରେ ଲୋକମାନଙ୍କୁ ଆଘାତ କଲେ।

ସେମାନେ ଆଘାତ କରୁଥିବା ସମୟରେ ମୁଁ ଏକାକୀ ଅବଶିଷ୍ଟ ରହିଲି। ତେଣୁ ମୁଁ ମୁହଁ ମାଡ଼ି ପଡ଼ି କ୍ରନ୍ଦନ କରି କହିଲି, “ହାୟ, ହେ ସର୍ବାଧିପତି ପିତା! ଆପଣ ଯିରୂଶାଲମ ଉପରେ ଆପଣଙ୍କ କୋପ ଢାଳିବା ସମୟରେ କʼଣ ଇସ୍ରାଏଲର ସମସ୍ତ ଅବଶିଷ୍ଟାଂଶକୁ ବିନାଶ କରିବେ?”

ସେତେବେଳେ ସେ ମୋତେ କହିଲେ, “ଇସ୍ରାଏଲ ଓ ଯିହୂଦା ବଂଶର ଅପରାଧ ଅତ୍ୟନ୍ତ ବୃହତ୍। ଦେଶ ରକ୍ତପାତରେ ପରିପୂର୍ଣ୍ଣ, ପୁଣି ନଗର ଅନ୍ୟାୟରେ ପରିପୂର୍ଣ୍ଣ, କାରଣ ସେମାନେ କହନ୍ତି, ‘ଈଶ୍ଵର ଦେଶକୁ ପରିତ୍ୟାଗ କରିଅଛନ୍ତି; ଈଶ୍ଵର ଦେଖନ୍ତି ନାହିଁ।’ ଆଉ ଆମ୍ଭେ ତ ସେମାନଙ୍କୁ ଦୟା କରିବା ନାହିଁ କିମ୍ବା ଅନୁକମ୍ପା କରିବା ନାହିଁ। ଆମ୍ଭେ ସେମାନଙ୍କ ଆଚରଣର ଫଳ ସେମାନଙ୍କ ମସ୍ତକରେ ବର୍ତ୍ତାଇବା।”

ତତ୍ପରେ ଶୁକ୍ଲ ବସ୍ତ୍ର ପରିହିତ ଓ କଟିଦେଶରେ ଲେଖକର ମଶୀଆଧାରଧାରୀ ସେହି ପୁରୁଷ ଉତ୍ତର ଦେଇ କହିଲେ, “ଆପଣ ମୋତେ ଯେରୂପ ଆଜ୍ଞା ଦେଇଥିଲେ, ସେରୂପ ମୁଁ କରିଅଛି।”