Boueibü Onou Medei
Seneibü Bouei sangnyu ikjaibü müt lak ngekkei, hoba phembanei lebü müt che, haoeibü junga dobü peisilei langbü, sangnyu mangsenlabü shanga semthetko jongsakbü shuong pendou ika tetsida phokei. Lubü shuong chemsophang to khangan loutitikei. Thuseibü aeibou phaka tala phekei, aoche yingsikei satenlabü lo dogo.
9 1Hobaje haoei ngo ditbo ngüh kaangbüei ngekko laukei, “Sangnyu ikjaibü shuong, mütpem wekoei jembü mautilabü peisilei ika langko jamashi.”
2Hobaje chanep thedang aenei thükkabü koukhün ka müt lak loukei, mütpem wekoei jembü haitilabü peisilei ika langkei; hoba haoen yoa phembanei lebü müt che, haoeibü junga dobü peisilei langko kikei. Haoen louan chinam lemshang junga lokei.
3Seneibü Bou soneikangbü kherab thüka khünei haksobü ka pienan, chem koukhün to loukei. Hobaje Haoei phembanei lebü, haoeibü junga dobü peisilei langbü müt to ngaakei.
4Hobaje Seneibü Bouei hao to laukei, “Jerusalem sangnyu danthetjung hauan, khünei kümbü mangsenlabü pendou shanga semthetko jongsakbü shuongeibü kaolo maanga medei tetsiashi.” a a v4 Khümenbü shanga medei tetsibü shuong kho, haoen kishanga kibü shabü shanga maang ngangbü shuong ki — Seneibü Bouei, hao to nganglabü kho shanga semthetbü shousi shuong senetan medei tetsida.
5Lubü shuong to haoei ngo ditbo laukei, “Hao phai sembo sangnyu danthetjung hauan shiashi. Kaneibü nyekei asenetjan, onou alenjan. 6Baushi shuong, heshou shuong, yaksa nashou shuong, hanbü shuong, yaksa shuong, pendou haitiashi. Lausikei medei langbü aoyou to temeitijan. Ngeibü lemshang ka khangashi.” Hibü haoen chem thedanga kibü jaishou shuong ka khangkei.
7Kheijinei haoei haoen to laukei, “Chem asaopoko kümashi, chemsophang to haibü mangei loutiashi. Hauashi!” Hibü haoen longan sangnyua mütshuong shikei.
8Haoen shikjinei, ngo along joukei. Ngo the khüman ngekko laukei, “O Bunyubou Abou! Nyi Jerusalem thüka kaibü maangshat khüpan jinkujinei, Israel joubü pendou mautilabü sai?”
9Hobaje haoei kü to laukei, “Israel si Jihuda phang shedbü kho aeibou yaangbü ki. Kaonyek kho siiei jakakei, sangnyu kho amaibüei jakakei, aishanga haoenei lauda, ‘Mühghaüei kaonyek inletkei; Mühghaüei ahapda.’ 10Ngo shangaje, ngei haoen to asenetlabü ayingsi onou alenlabü. Haoeneibü kümsilei jembü khua künngaitilabü.”
11Hobaje phembanei lebü, haoeibü junga dobü peisilei langbü müt khoei sepeinyu lenkei, “Nyi kü la sakkubü tegü ngei kümbei.”
