ሕዝቅኤል 9 FHB Father's Heart Bible™

9 ¹ሽዑ ዓው ኢሉ ኣብ እዝነይ ከምዙይ ኢሉ ፀውዐ፦ “ኦ ሓለፍቲ እታ ኸተማ፥ ነፍሲ ወከፍ መሳርሒ ጥፍኣቱ ኣብ ኢዱ ሒዙ፥ ቕረቡ።”

²ሽዱሽተ ሰባት ከዓ በቲ ናብ ሰሜን ዝጥምት ላዕለዋይ ደገ መፁ፤ ነፍሲ ወከፍ ቀታሊ መሳርሒ ኣብ ኢዱ ሒዙ ነበረ፤ ኣብ ማእኸሎም ድማ ብሃሪ ዝተኸድነ ሰብኣይ፥ ናይ ፀሓፊ ኣቕሓ ኣብ ወገኑ ነበረ። መፂኦም ከዓ ጥቓ እቲ ነሃስ መሰውኢ ደው በሉ።

³ክብሪ ኣቦና ድማ ካብ ልዕሊ እቲ ዝዓረፈሉ ኪሩቤል ተንሲኡ፥ ናብ ድርኵዂት እታ ቤት መፀ። ነቲ ብሃሪ ዝተኸድነ፥ ናይ ፀሓፊ ኣቕሓ ኣብ ወገኑ ዝነበሮ ሰብኣይ ከዓ ፀውዖ።

⁴ኣቦና ድማ ከምዙይ በሎ፦ “ብማእኸል እታ ኸተማ ኢየሩሳሌም ሓሊፍካ፥ ኣብ ግምባር እቶም በቲ ኣብኣ ዝግበር ዘሎ ኵሉ ርኵሰት ዝቕንዝዉን ዝግዕሩን ሰባት ምልክት ግበር።” ^a a v4 እቶም ንደሓን ተባሂሎም ዝተመልከቱ፥ በቲ ኣብ ከባቢኦም ዘሎ ሓጢኣት ልቦም ዝሰብር እዮም፤ ኣቦና ድማ ነቶም በቲ ንእኡ ዘሕዝኖ ዝሓዝኑ ውሉድ ይርህርሀሎምን ምልክት ይገብረሎምን።

⁵ነቶም ካልኦት ድማ ኣብ እዝነይ ከምዙይ በሎም፦ “ደድሕሪኡ ብማእኸል እታ ኸተማ ሓሊፍኩም ውቕዑ። ዓይንኹም ኣይተናሕስ፥ ኣይትራህርሁ'ውን። ⁶ኣረጋውያንን መንእሰያትን ኣጓላትን ቈልዑን ኣንስትን፥ ንዅሎም ቅተሉ። ነቲ ምልክት ዘለዎ ሰብ ግና ኣይትንክኡ። ካብ መቕደሰይ ጀምሩ።” ሽዑ ካብቶም ኣብ ቅድሚ እታ ቤት ዝነበሩ ዓበይቲ ጀመሩ።

⁷ድማ ከምዙይ በሎም፦ “ነታ ቤት ኣርክስዋ፤ ነቲ ኣፀድ ብምዉታት ምልእዎ። ኪዱ!” ንሳቶም ከዓ ወፂኦም ኣብታ ኸተማ ንዝነበሩ ሰባት ወቕዑ።

⁸እናወቕዑ እንተለዉ ኸዓ፥ ኣነ በይነይ ተረፍኩ። ብገፀይ ተደፊአ ድማ ከምዙይ ኢለ ኣእዌኹ፦ “ኣየ፥ ኦ ልዑል ኣቦ! ቍጥዓኻ ኣብ ኢየሩሳሌም እናኽዓኻ፥ ንዅሉ ተረፍ እስራኤልዶ ኸተጥፍኦ ኢኻ?”

⁹ንሱ ኸዓ ከምዙይ በለኒ፦ “በደል ቤት እስራኤልን ይሁዳን የመና ዓብዪ እዩ። እታ ምድሪ ብምፍሳስ ደም መሊኣ፥ እታ ኸተማ ድማ ብዓመፃ መሊኣ፤ ንሳቶም ‘እግዚኣብሄር ነዛ ምድሪ ሓዲግዋ እዩ፤ እግዚኣብሄር ኣይርእን እዩ’ ይብሉ ኣለዉ እሞ። ¹⁰ኣነ ግና ኣይተናሕሰሎምን ኣይርህርሀሎምን እየ። መንገዶም ኣብ ርእሶም ከምልሰሎም እየ።”

¹¹ሽዑ እቲ ብሃሪ ዝተኸድነ፥ ናይ ፀሓፊ ኣቕሓ ኣብ ወገኑ ዝነበሮ ሰብኣይ፥ “ከምቲ ዝኣዘዝካኒ ገይረ ኣለኹ” ኢሉ መለሰ።