Khalatlui 12

12 ¹Ithumwui Avā, nathum navā ngarāwui Varena, nathumli shimlui sākhavai mikahai ngalei chiwui alungli, nathumna okathuili ringda khalei peida mathālak eina mayonphalungra kaji ain kala bichar chi hina. ²Nathumna kashamshokmi yurbingna athumwui varebingli otram ngatha̱mi apam saikora, phungrei kaphungtonli, kaphungli, kala matekchim kahai thingphei kachiva̱li khalei apam chi makupranglakha eina tangda sāshimānmiserlu. ³Athumwui hanphutbing sākhaitālu, athumwui pākra̱bing sāteklu, athumwui Asherim meili riktāmihaolu; athumwui varebingwui hakkhamei meoma̱ saikora sāteklu, kala athumwui ming chi apam chi eina laichaomihaolu. ^a a v3 Asherim chi thing eina sākahai khorumwui ot azak, Canaanwui varepava̱ Asherahwui vang tharkahaina, khangatei varebing khorum sāwui apambingli shonkahai. ⁴Nathumna nathumwui Avāli chithāda makhorumpaimana. ⁵Kha, nathumwui Avāna nathum shang saikorawui eina awui ming leikhavai kala awui pamkhavai kapangkhuiki kaji apam chi phālu; apam chili nathumna vāra. ⁶Apam chili nathumwui rikkatā kachigat kala pha̱kaphayā, nathumwui tithe kala nathumwui pāng eina kachigat, nathumwui khangashitwui kachigat kala lemmet kachigat, kala nathumwui sei kala yaowui pharākhare khuirālu. ⁷Apam chili, nathumwui Avāwui mangāli, na kala nashi shimkhurna shaida, nathumna pāng khami ot saikorali ringphāra, kaja nathumwui Avāna nathumli somihaira. ⁸Aja ithumna hili sāki tākam eina, mi kachiva̱na akhalattawui mikli khamashung jikahaina chi kasā thāda, nathumna masāpaimana. ⁹Kaja nathumwui Avāna nathumli mikahai ngasām kala shimlui chili nathum mazangrangsai. ¹⁰Kha nathumna Jordan kānlaga, nathumwui Avāna shimlui sākhavai mikahai ngalei chili sompama tharan, kala ana nathum kuimareida khalei yangkashe saikorawui eina nathumli ngasām mihaida, nathum nganungkhung eina okthuira tharan, ¹¹chieina nathumwui Avāna awui ming leikhavai kapangkhuiki kaji apam chili, ina nathumli kaso khami saikora chi khuirālu: nathumwui rikkatā kachigat kala pha̱kaphayā, nathumwui tithe kala nathumwui pāng eina kachigat, kala nathumwui Avāli nathumna khangashit sākahai kaphā khangashitwui kachigat saikora. ¹²Na, nawui naomayarabing kala naongalāva̱bing, nawui raopa kala raopava̱, kala nathumwui keinungli khalei Levinaobingla nathumwui Avāwui mangāli ringphālu, kaja ana nathumla ngasoda yar lah shimlui maleimana. ¹³Nathumna theiki apam saikorali nathumwui rikkatā kachigat machigatpaimana da ningngasharlu; ¹⁴kha nathum shang akhawui alungli nathumwui Avāna kapangkhuiki kaji apam chili nathumwui rikkatā kachigat chigatlu, kala apam chili ina nathumli kaso khami saikora chi sālu.

¹⁵Chithālala, nathumwui Avāna nathumli sokhami athishurda, nathumna ningkachāng jikahaina saikora chi kachichā keinung saikorali taithatta sā shaipaisera. Makathara kala kathara minala, chaonao kala seichui shai thāda, shaipaisera. ¹⁶Kha ashee chi mashaipaimana; chi tara̱ thāda ngaleili heirorlu. ¹⁷Nathumwui māngum, drakhāthei, lah thaowui tithe, lah nathumwui sei lah yaowui pharākhare, lah nathumwui khangashitwui kachigat, lemmet kachigat, lah nathumwui pāng eina kachigat akhanidala, nathumna kachichā keinungli mashaipaimana. ¹⁸Chiwui mahutle, na, nanaomayara kala nanaongalāva̱, nawui rao mayarnao eina raosha̱nao, kala nathumwui keinungli khalei Levinaobingla nathumwui Avāwui mangāli, ana kapangkhuiki kaji apam chili chi shaira; kala awui mangāli nathumna kasā ot saikorali ringphāngarumra. ¹⁹Nathumwui ngaleili ringda khalei peida, Levinaobingli mahorhaila khavai ningngasharlu.

²⁰Nathumli ngashit kahai athishurda nathumwui Avāna nathumwui ngalei haksangmiakha, kala nathumwui manglāna sā ningchāngda nathumna, "Ina sā shaira," da hāngakha, nathumwui manglā ningkachāng athishurda sā shaipaisera. ²¹Nathumwui Avāna awui ming leikhavai kapangkhuiki kaji apam chi nathumwui eina katā sakchangda leiakha, ina nathumli kaso khami athishurda, nathumwui Avāna nathumli mikahai sei kala yao ashangva̱wui eina nathumna taithatpaisera, kala nathumwui manglā ningkachāng athishurda nathumwui keinungli shaipaisera. ²²Chaonao kala seichui kashai thāda, nathumna chi shaipaisera; makathara kala kathara minala shaipaisera. ²³Kha, ashee mashaipaimi khavai ninglum ngasak eina nganingtitlu, kaja ashee hi kharingna; sā eina ngasoda kharing chi mashaipaimana. ²⁴Nathumna chi mashaipaimana; chi ngaleili tara̱ heikatha̱ thāda heitha̱haolu. ²⁵Chi mashaipaimana; nathumwui Avāwui mikyanli khamashung ot chi nathumna sāakha, nathum kala nathumwui thili khalei nathumwui naongarābingla ringphāmeira. ²⁶Kha nathumwui kathara otbing kala nathumwui khangashit kachigatbing chi, nathumwui Avāna kapangkhuiki kaji apam chili khuivālu. ²⁷Nathumwui rikkatā kachigatwui asā kala ashee chi nathumwui Avāwui hanphuttungli chigatra. Nathumwui pha̱kaphayāwui ashee chi nathumwui Avāwui hanphut ngalemli heitha̱haolu, kala asā chi shailu. ²⁸Ina nathumli kaso khami tui saikora hi ning ngasharda mayonlu; nathumwui Avāwui mikyanli kaphā kala khamashung ot chi nathumna sāakha, katang mavaila nathum kala nathumwui thili khalei nathumwui naongarābingla ringphāmeira.

²⁹Nathumwui Avāna nathumna kashamshok khavai katā miyurbing chi nathumwui mangāli katattāmiakha, kala nathumna athumli kashamshoka athumwui ngaleili sompama tharan, ³⁰athum nathumwui mangāli shimānhaida thili, athumwui apong shurda matuknarhai khavai ningngasharlu; kala athumwui varebing chiwui vang, "Miyur hibingna athumwui varebingli kathada otram ngatha̱khala? Inala chithāda sāra," da mangahānkāmana. ³¹Nathumna chithāda nathumwui Avāli makhorumpaimana, kaja nathumwui Avāna kasham kahaiya ningkakachai ot saikora chi athumna athumwui varebingwui vang sāpapama; athumwui naomayara kala naongalāva̱li athumwui varebingwui vang meili riktāhaowa. ³²Ina nathumli kaso khami saikora chi mayontit khavai ningngasharlu; chili khikha mangarumsangpaimana, chiwui eina khikha makhuipaimana.