ତୁମ୍ଭ ପିତାଙ୍କୁ ଭେଟିବା ନିମନ୍ତେ ଗୋଟିଏ ସ୍ଥାନ

ପାହାଡ଼ ଉପରେ ଛିନ୍ନଭିନ୍ନ ଥିବା ଦେବସ୍ଥାନସବୁ ଧ୍ୱଂସ କରାଯିବ, ଏବଂ ବଳିଦାନ ସେହି ଗୋଟିଏ ସ୍ଥାନରେ ଏକତ୍ର କରାଯିବ ଯାହା ଆମ୍ଭମାନଙ୍କ ପିତା ତାଙ୍କ ନାମ ପାଇଁ ମନୋନୀତ କରନ୍ତି। କାରଣ କଠୋରତା ନୁହେଁ, ଆନନ୍ଦ: ସେଠାରେ ପରିବାରମାନେ ଏକାଠି ଭୋଜନ କରନ୍ତି ଓ ଆନନ୍ଦ କରନ୍ତି, ଭୂମିହୀନ ଲେବୀୟ ମଧ୍ୟ ସାମିଲ। ପ୍ରତ୍ୟେକେ ନିଜ ଦୃଷ୍ଟିରେ ଯାହା ଠିକ୍ ତାହା କରିବା ଏଠାରେ ଶେଷ ହୁଏ।

ଅଧ୍ୟାୟ 12।

ତୁମ୍ଭ ପିତୃପୁରୁଷଙ୍କ ପରମେଶ୍ଵର ଆମ୍ଭମାନଙ୍କ ପିତା ଅଧିକାର କରିବା ନିମନ୍ତେ ଯେଉଁ ଦେଶ ତୁମ୍ଭକୁ ଦେଇଅଛନ୍ତି, ସେହି ଦେଶରେ ତୁମ୍ଭେ ପୃଥିବୀରେ ବଞ୍ଚିଥିବା ସମସ୍ତ ଦିନ ଯେଉଁ ବିଧି ଓ ଶାସନ ଯତ୍ନପୂର୍ବକ ପାଳନ କରିବ, ସେହିସବୁ ଏହି ଅଟେ। ତୁମ୍ଭେ ଯେଉଁ ଜାତିମାନଙ୍କୁ ତଡ଼ିଦେବ, ସେମାନେ ଉଚ୍ଚ ପର୍ବତ, ଉପପର୍ବତ ଓ ପ୍ରତ୍ୟେକ ହରିତ୍‌ ବୃକ୍ଷ ତଳେ ଯେଉଁ ଯେଉଁ ସ୍ଥାନରେ ଆପଣା ଦେବତାମାନଙ୍କର ସେବା କରିଥିଲେ, ସେହି ସମସ୍ତ ସ୍ଥାନ ସମ୍ପୂର୍ଣ୍ଣ ରୂପେ ବିନଷ୍ଟ କରିବ। ସେମାନଙ୍କ ଯଜ୍ଞବେଦିସବୁ ଭାଙ୍ଗିପକାଅ, ସେମାନଙ୍କ ପବିତ୍ର ସ୍ତମ୍ଭସବୁ ଚୂର୍ଣ୍ଣ କର, ସେମାନଙ୍କ ଆଶେରା ସ୍ତମ୍ଭସବୁ ଅଗ୍ନିରେ ଦଗ୍ଧ କର; ସେମାନଙ୍କ ଦେବତାମାନଙ୍କ ଖୋଦିତ ପ୍ରତିମାସବୁ କାଟି ପକାଅ, ଆଉ ସେହି ସ୍ଥାନରୁ ସେମାନଙ୍କ ନାମ ଲୋପ କର। ^a ତୁମ୍ଭେ ତୁମ୍ଭ ପିତାଙ୍କ ଉପାସନା ସେପ୍ରକାରେ କରିବ ନାହିଁ। ମାତ୍ର ତୁମ୍ଭ ପିତା ଆପଣା ନାମ ସ୍ଥାପନ କରିବା ଓ ବାସ କରିବା ନିମନ୍ତେ ତୁମ୍ଭ ସମସ୍ତ ଗୋଷ୍ଠୀ ମଧ୍ୟରୁ ଯେଉଁ ସ୍ଥାନ ମନୋନୀତ କରିବେ, ସେହି ସ୍ଥାନ ଅନ୍ଵେଷଣ କରିବ; ସେଠାକୁ ତୁମ୍ଭେ ଯିବ। ସେଠାକୁ ତୁମ୍ଭେ ଆପଣା ହୋମବଳି ଓ ଯଜ୍ଞ, ଆପଣା ଦଶମାଂଶ ଓ ଆପଣା ହସ୍ତର ଉପହାର, ଆପଣା ମାନତ-ନୈବେଦ୍ୟ ଓ ସ୍ଵେଚ୍ଛାଦତ୍ତ ନୈବେଦ୍ୟ, ପୁଣି ଆପଣା ଗୋରୁ ଓ ମେଷପଲର ପ୍ରଥମଜାତ ପଶୁ ଆଣିବ। ସେଠାରେ ତୁମ୍ଭ ପିତାଙ୍କ ସମ୍ମୁଖରେ ତୁମ୍ଭେ ଓ ତୁମ୍ଭ ପରିବାରବର୍ଗ ଭୋଜନ କରିବ, ଆଉ ଯେଉଁ ସମସ୍ତ କାର୍ଯ୍ୟରେ ତୁମ୍ଭେ ହସ୍ତକ୍ଷେପ କରିଅଛ, ସେଥିରେ ଆନନ୍ଦ କରିବ, କାରଣ ତୁମ୍ଭ ପିତା ତୁମ୍ଭକୁ ଆଶୀର୍ବାଦ କରିଅଛନ୍ତି। ଆଜି ଏଠାରେ ଆମ୍ଭେମାନେ ଯେପରି କରୁଅଛୁ, ପ୍ରତ୍ୟେକ ଜଣ ଆପଣା ଆପଣା ଦୃଷ୍ଟିରେ ଯାହା ଯଥାର୍ଥ ତାହା କରୁଅଛୁ, ତୁମ୍ଭେ ସେପରି କରିବ ନାହିଁ। କାରଣ ତୁମ୍ଭ ପିତା ତୁମ୍ଭକୁ ଯେଉଁ ବିଶ୍ରାମ ଓ ଅଧିକାର ଦେଉଅଛନ୍ତି, ତୁମ୍ଭେ ଏପର୍ଯ୍ୟନ୍ତ ସେଥିରେ ଉପସ୍ଥିତ ହୋଇ ନାହଁ। ମାତ୍ର ଯେତେବେଳେ ତୁମ୍ଭେ ଯର୍ଦ୍ଦନ ପାର ହୋଇ ତୁମ୍ଭ ପିତା ତୁମ୍ଭକୁ ଅଧିକାର କରିବା ନିମନ୍ତେ ଯେଉଁ ଦେଶ ଦେଉଅଛନ୍ତି, ସେଠାରେ ବାସ କରିବ, ଆଉ ସେ ତୁମ୍ଭ ଚତୁର୍ଦ୍ଦିଗସ୍ଥ ସମସ୍ତ ଶତ୍ରୁଠାରୁ ତୁମ୍ଭକୁ ବିଶ୍ରାମ ଦେବେ, ଯେପରି ତୁମ୍ଭେ ନିରାପଦରେ ବାସ କରିବ, ସେତେବେଳେ ତୁମ୍ଭ ପିତା ଆପଣା ନାମ ସ୍ଥାପନ କରିବା ନିମନ୍ତେ ଯେଉଁ ସ୍ଥାନ ମନୋନୀତ କରିବେ, ସେଠାକୁ ମୁଁ ତୁମ୍ଭକୁ ଯାହା ଯାହା ଆଜ୍ଞା ଦେଉଅଛି, ସେସମସ୍ତ ଆଣିବ: ଆପଣା ହୋମବଳି ଓ ଯଜ୍ଞ, ଆପଣା ଦଶମାଂଶ ଓ ଆପଣା ହସ୍ତର ଉପହାର, ପୁଣି ତୁମ୍ଭେ ତୁମ୍ଭ ପିତାଙ୍କ ନିକଟରେ ଯେଉଁ ମାନତ କର, ସେହି ସମସ୍ତ ଉତ୍କୃଷ୍ଟ ମାନତ-ନୈବେଦ୍ୟ ଆଣିବ। ତୁମ୍ଭେ, ତୁମ୍ଭ ପୁତ୍ରକନ୍ୟାଗଣ, ତୁମ୍ଭ ଦାସଦାସୀଗଣ ଓ ତୁମ୍ଭ ନଗରଦ୍ଵାରବର୍ତ୍ତୀ ଲେବୀୟ ଲୋକ, ତୁମ୍ଭେ ସମସ୍ତେ ତୁମ୍ଭ ପିତାଙ୍କ ସମ୍ମୁଖରେ ଆନନ୍ଦ କରିବ, ଯେଣୁ ତୁମ୍ଭ ସହିତ ତାହାର କୌଣସି ଅଂଶ କି ଅଧିକାର ନାହିଁ। ତୁମ୍ଭେ ଯେଉଁ ଯେଉଁ ସ୍ଥାନ ଦେଖ, ସେହି ପ୍ରତ୍ୟେକ ସ୍ଥାନରେ ଯେପରି ଆପଣା ହୋମବଳି ଉତ୍ସର୍ଗ ନ କର, ଏଥିପ୍ରତି ସାବଧାନ ହୁଅ, ମାତ୍ର ତୁମ୍ଭ ପିତା ତୁମ୍ଭ ଗୋଷ୍ଠୀସମୂହ ମଧ୍ୟରୁ ଗୋଟିଏ ଗୋଷ୍ଠୀରେ ଯେଉଁ ସ୍ଥାନ ମନୋନୀତ କରିବେ, କେବଳ ସେଠାରେ ଆପଣା ହୋମବଳି ଉତ୍ସର୍ଗ କରିବ, ଆଉ ମୁଁ ତୁମ୍ଭକୁ ଯାହା ଆଜ୍ଞା ଦେଉଅଛି, ସେସମସ୍ତ ସେଠାରେ କରିବ।

ତଥାପି ତୁମ୍ଭ ପିତା ତୁମ୍ଭକୁ ଯେଉଁ ଆଶୀର୍ବାଦ ଦେଇଅଛନ୍ତି, ତଦନୁସାରେ ତୁମ୍ଭେ ଆପଣା ସମସ୍ତ ନଗରଦ୍ଵାର ମଧ୍ୟରେ ଯାହା ଇଚ୍ଛା କର, ତାହା ବଧ କରି ମାଂସ ଭୋଜନ କରିପାର। ହରିଣ ଓ ମୃଗ ତୁଲ୍ୟ ଶୁଚି ଓ ଅଶୁଚି ଉଭୟ ଲୋକ ତାହା ଭୋଜନ କରିପାରିବେ। କେବଳ ତୁମ୍ଭେ ରକ୍ତ ଭୋଜନ କରିବ ନାହିଁ; ତାହା ଜଳ ପରି ଭୂମିରେ ଢାଳିଦେବ। ତୁମ୍ଭେ ଆପଣା ଶସ୍ୟର, ଦ୍ରାକ୍ଷାରସର କି ତୈଳର ଦଶମାଂଶ, କିଅବା ଆପଣା ଗୋରୁ ଅବା ମେଷପଲର ପ୍ରଥମଜାତ ପଶୁ, କିଅବା ଆପଣା କୌଣସି ମାନତ-ନୈବେଦ୍ୟ, ଆପଣା ସ୍ଵେଚ୍ଛାଦତ୍ତ ନୈବେଦ୍ୟ ଅବା ଆପଣା ହସ୍ତର ଉପହାର ଆପଣା ନଗରଦ୍ଵାର ମଧ୍ୟରେ ଭୋଜନ କରିପାରିବ ନାହିଁ। ମାତ୍ର ତୁମ୍ଭ ପିତା ଯେଉଁ ସ୍ଥାନ ମନୋନୀତ କରିବେ, ସେଠାରେ ତାହାଙ୍କ ସମ୍ମୁଖରେ ତୁମ୍ଭେ, ତୁମ୍ଭ ପୁତ୍ର ଓ କନ୍ୟା, ତୁମ୍ଭ ଦାସ ଓ ଦାସୀ, ପୁଣି ତୁମ୍ଭ ନଗରଦ୍ଵାରବର୍ତ୍ତୀ ଲେବୀୟ ଲୋକ ତାହା ଭୋଜନ କରିବ; ଆଉ ତୁମ୍ଭେ ଯେଉଁ ସମସ୍ତ କାର୍ଯ୍ୟରେ ହସ୍ତକ୍ଷେପ କର, ସେଥିରେ ତାହାଙ୍କ ସମ୍ମୁଖରେ ଆନନ୍ଦ କରିବ। ତୁମ୍ଭେ ଆପଣା ଦେଶରେ ଯେତେ ଦିନ ବାସ କରିବ, ସେତେ ଦିନ ଲେବୀୟ ଲୋକକୁ ଯେପରି ପରିତ୍ୟାଗ ନ କର, ଏଥିପ୍ରତି ସାବଧାନ ହୁଅ।

ତୁମ୍ଭ ପିତା ଆପଣା ପ୍ରତିଜ୍ଞାନୁସାରେ ଯେତେବେଳେ ତୁମ୍ଭ ସୀମା ବିସ୍ତାର କରିବେ, ଆଉ ତୁମ୍ଭ ପ୍ରାଣ ମାଂସ ଭୋଜନ କରିବାକୁ ଲାଳସା କରିବାରୁ ତୁମ୍ଭେ “ମୁଁ ମାଂସ ଭୋଜନ କରିବି” ବୋଲି କହିବ, ସେତେବେଳେ ତୁମ୍ଭେ ଆପଣା ପ୍ରାଣର ଇଚ୍ଛାନୁସାରେ ମାଂସ ଭୋଜନ କରିପାର। ତୁମ୍ଭ ପିତା ଆପଣା ନାମ ସ୍ଥାପନ କରିବା ନିମନ୍ତେ ଯେଉଁ ସ୍ଥାନ ମନୋନୀତ କରିବେ, ତାହା ଯଦି ତୁମ୍ଭଠାରୁ ଅତି ଦୂର ହୁଏ, ତେବେ ମୁଁ ତୁମ୍ଭକୁ ଯେପରି ଆଜ୍ଞା ଦେଇଅଛି, ସେପରି ତୁମ୍ଭ ପିତା ତୁମ୍ଭକୁ ଯେଉଁ ଗୋରୁ ଓ ମେଷପଲ ଦେଇଅଛନ୍ତି, ତହିଁରୁ ବଧ କରି ଆପଣା ନଗରଦ୍ଵାର ମଧ୍ୟରେ ଇଚ୍ଛାନୁସାରେ ଭୋଜନ କରିପାର। ହରିଣ ଓ ମୃଗ ଯେପରି ଭୋଜନ କରାଯାଏ, ସେପରି ତୁମ୍ଭେ ତାହା ଭୋଜନ କରିପାର; ଅଶୁଚି ଓ ଶୁଚି ଉଭୟ ଲୋକ ତାହା ଭୋଜନ କରିପାରିବେ। କେବଳ ରକ୍ତ ଭୋଜନ ନ କରିବା ନିମନ୍ତେ ଦୃଢ଼ ସଂକଳ୍ପ ହୁଅ, କାରଣ ରକ୍ତ ହିଁ ପ୍ରାଣ; ମାଂସ ସହିତ ପ୍ରାଣ ଭୋଜନ କରିବ ନାହିଁ। ତୁମ୍ଭେ ତାହା ଭୋଜନ କରିବ ନାହିଁ; ତାହା ଜଳ ପରି ଭୂମିରେ ଢାଳିଦେବ। ତୁମ୍ଭେ ତାହା ଭୋଜନ କରିବ ନାହିଁ, ଯେପରି ତୁମ୍ଭ ପିତାଙ୍କ ଦୃଷ୍ଟିରେ ଯାହା ଯଥାର୍ଥ ତାହା କଲେ, ତୁମ୍ଭର ଓ ତୁମ୍ଭ ଉତ୍ତାରୁ ତୁମ୍ଭ ସନ୍ତାନଗଣର ମଙ୍ଗଳ ହେବ। ମାତ୍ର ତୁମ୍ଭ ପିତା ଯେଉଁ ସ୍ଥାନ ମନୋନୀତ କରିବେ, ସେଠାକୁ ତୁମ୍ଭେ ଆପଣା ପବିତ୍ର ବସ୍ତୁ ଓ ଆପଣା ମାନତ-ନୈବେଦ୍ୟ ନେଇଯିବ। ତୁମ୍ଭେ ଆପଣା ହୋମବଳିର ମାଂସ ଓ ରକ୍ତ ତୁମ୍ଭ ପିତାଙ୍କ ଯଜ୍ଞବେଦି ଉପରେ ଉତ୍ସର୍ଗ କରିବ। ଆପଣା ବଳିସମୂହର ରକ୍ତ ତୁମ୍ଭ ପିତାଙ୍କ ଯଜ୍ଞବେଦି ପାଖରେ ଢାଳିଦେବ, ପୁଣି ମାଂସ ଭୋଜନ କରିବ। ମୁଁ ତୁମ୍ଭକୁ ଯେଉଁ ସମସ୍ତ ବାକ୍ୟ ଆଜ୍ଞା ଦେଉଅଛି, ସେସମସ୍ତ ଯତ୍ନପୂର୍ବକ ପାଳନ କର, ଯେପରି ତୁମ୍ଭ ପିତାଙ୍କ ଦୃଷ୍ଟିରେ ଯାହା ଉତ୍ତମ ଓ ଯଥାର୍ଥ ତାହା କଲେ, ତୁମ୍ଭର ଓ ତୁମ୍ଭ ଉତ୍ତାରୁ ତୁମ୍ଭ ସନ୍ତାନଗଣର ସଦାକାଳ ମଙ୍ଗଳ ହେବ।

ତୁମ୍ଭେ ଯେଉଁ ଜାତିମାନଙ୍କୁ ତଡ଼ିଦେବାକୁ ଯାଉଅଛ, ତୁମ୍ଭ ପିତା ଯେତେବେଳେ ତୁମ୍ଭ ସମ୍ମୁଖରୁ ସେମାନଙ୍କୁ ଉଚ୍ଛିନ୍ନ କରିବେ, ଆଉ ତୁମ୍ଭେ ସେମାନଙ୍କୁ ତଡ଼ିଦେଇ ସେମାନଙ୍କ ଦେଶରେ ବାସ କରିବ, ସେତେବେଳେ ତୁମ୍ଭ ସମ୍ମୁଖରୁ ସେମାନେ ବିନଷ୍ଟ ହେବା ଉତ୍ତାରେ ତୁମ୍ଭେ ଯେପରି ସେମାନଙ୍କ ପଥ ଅନୁସରଣ କରିବାକୁ ଫାନ୍ଦରେ ନ ପଡ଼, ଏଥିପ୍ରତି ସାବଧାନ ହୁଅ, ଆଉ “ଏହି ଜାତିମାନେ ଆପଣା ଦେବତାମାନଙ୍କର କିପରି ସେବା କଲେ? ମୁଁ ମଧ୍ୟ ସେପରି କରିବି” ବୋଲି କହି ସେମାନଙ୍କ ଦେବତାମାନଙ୍କ ବିଷୟରେ ପଚାର ନାହିଁ। ତୁମ୍ଭେ ତୁମ୍ଭ ପିତାଙ୍କ ଉପାସନା ସେପରି କରିବ ନାହିଁ, କାରଣ ତୁମ୍ଭ ପିତା ଯାହା ଘୃଣା କରନ୍ତି, ସେପରି ପ୍ରତ୍ୟେକ ଘୃଣ୍ୟ କର୍ମ ସେମାନେ ଆପଣା ଦେବତାମାନଙ୍କ ଉଦ୍ଦେଶ୍ୟରେ କରିଥିଲେ—ସେମାନେ ତ ଆପଣା ପୁତ୍ରକନ୍ୟାଗଣଙ୍କୁ ହେଁ ଆପଣା ଦେବତାମାନଙ୍କ ଉଦ୍ଦେଶ୍ୟରେ ଅଗ୍ନିରେ ଦଗ୍ଧ କରିଥିଲେ। ମୁଁ ତୁମ୍ଭକୁ ଯାହା ଯାହା ଆଜ୍ଞା ଦେଉଅଛି, ସେସମସ୍ତ କରିବା ନିମନ୍ତେ ସାବଧାନ ହୁଅ; ତହିଁ ସଙ୍ଗେ କିଛି ଯୋଗ କର ନାହିଁ, କି ତହିଁରୁ କିଛି ଊଣା କର ନାହିଁ।