Minama Marānbingwui Eina Nathumwui Ning Ngasharlu
Khangatei varebingli zatlu da kahāngakha, marān akhawui khangachitheikhami shokhailalala khuimaphaimana; nathumna wuklung saikora eina ali leishiya lah mahāi da nathumwui Avāna yangkhui. Leishilak kahai achinā, jola, ngasotnao kala keinung akha saikorawui vangla chithāda leira: hi Israelwui vang kharāmashang chuimeikapna.
13 1Nathumwui ngachaili marān akhala mang kashimanpa akhala shoklaga, nathumli machut akhala sākachithei akha mila, 2kala ana hānghaikasa machut chila sākachithei chi ungshungvālaga, 'Nathumna matheikasa vare kateibingli ithumna shurda athumli otram ngatha̱sa,' da hānglala, 3marān chila mang kashimanpa chiwui tui manganālu. Nathumna nathumwui Avāli nathumwui ning katonga kala nathumwui manglā katonga eina leishi ngaroka kajila theikhavai nathumwui Avāna nathumli chāng yangna. 4Nathumwui Avāli shurlu, ali ngacheelu, awui ningkhami mayonlu, awui akhon nganālu, ali otram ngatha̱lu, kala ali ngavaptitlu. 5Marān chila mang kashimanpa chi shaothatphalungra, kaja ana nathumli Egypt ngaleiwui eina khuishok khame kala raonao shimkhurwui eina ngatangkhame nathumwui Avāli ngakaikashi tui hānga; nathumwui Avāna zat khavai kaso kahai apongwui eina nathumli ma̱zat ngasak khavaina. Chithāda nathumwui alungli makaphā ot tharngasakra.
6Nachinā, nava̱wui nao, nawui naomayara chila naongalāva̱, nawui khanongli chinghaiwui preiva̱, chila nawui mirin thāda leikashe ngasotnaona, ngathumda nathumli minamlaga, 'Vare kateibing otram ngatha̱ vausa,' da hāngakha; chiya na kala navā ngarāna matheikasa varebing, 7nathumli kuikhamarei khalei yurbingwui varebing, nganaida leilala tāda leilala, okathuiwui ayar akha eina ayar akha vāshunga khalei varebingna. 8Ali tandi masaalu, ali manganālu; ali malumashanpaimana, mashivāmana, kala mathummihaialu. 9Maningmana; nathumna ali shaothatphalungra. Nawui pāngna ali khare shaora, kala chiwui thili mi saikorawui pāngna shaora. 10Ali lunggui eina horthatta shaothatra, kaja ana nathumli Egypt ngaleiwui eina, raonao shimkhurwui eina khuishok khame nathumwui Avāwui eina pākthui khavai sai. 11Israel saikorana shālaga ngacheera, kala nathumwui alungli chikathā makaphā ot latluida khipākha masāluimara.
12Nathumwui Avāna pam khavai nathumli mikahai keinungbingwui akhawui pongli, nathumna hithāda kashā tharan, 13makānkhanā makaphā mibing nathumwui alungwui eina kanshokta, athumwui keinungli kapā mibingli ma̱zat ngasakta, 'Nathumna matheikasa vare kateibing otram ngatha̱ vausa,' da hāng tharan, 14chithada phāda, machutkakhuila, kala ngashar eina ngahānlu. Chi mashunglaka, kala chikathā ningkakachai ot nathumwui alungli sākahaina da shāptitmi tharan, 15keinung chiwui kapā mibingli raighai eina ngararda shaothatra; chi kala chiwui alungli khalei saikora, sha̱keibingla, raighai eina ngararda kateongkha shimān ngasakra. 16Chiwui ngaponkakhui saikora awui yāngreiwui alungli kazipkhuilu, kala keinung chi kala awui ngaponkakhui saikora nathumwui Avāli rikkatā kachigat kateongkha thāda mei eina riktāra. Chi katang makhavai ruinganai thāda leira, khipānakha masākārarluimara. 17Shimān khavai tharchigat kahai khikha nawui pāngli mashurchingpaimana, chithada nathumwui Avāna awui malung kasāwui eina ngareithuida, nathumli lukhamashan pemting sāda, nathumli lumashanmira, kala navā ngarāli ana khangashit sākahai thāda nathumli mataisang ngasakra, 18nathumna nathumwui Avāwui akhon nganāda, ina aja nathumli kaso kahai awui ningkhami saikora mayonda, nathumwui Avāwui mikyanli khamashung ot sāakha.
