Kathara Miyur, Avāna Ngatei Ngasak Kahai
Nathum nathumwui Avāwui naongarāna, chieina miyurbing thāda khangachāngli nathumwui phasā matamlu. Kathara kala machatlak kahai sha̱keibing hāngserlaga, chiwui thili tithe — awui mangāli ringphada zāra, kala kum kathum kachivali nathumwui keinungli ngasomra, chithāda Levi, kha̱mi, marānao kala ra̱meinao phāda zāra.
14 1Nathum nathumwui Avāwui naongarāna; kathibingwui vang na phasāli pha̱ mara̱paimana, lah nathumwui khavei masikokpaimana. a a v1 Israelli ithumwui Avāwui khalattawui naongarā thāda chihān mikhangaona — ain saikora chiwui tungli phunga kaji shimkhur ngakhangarok chi. 2Kaja nathum nathumwui Avāwui kathara miyurna; okathuitungli khalei miyur saikorawui ngachai eina nathumwui Avāna nathumli awui vang sākhangasak miyur sākhavai kapangkhui.
3Nathumna ningkakachai ot akhala mashaipaimana. 4Nathumna shaikapai sāyurbing chiya: sei, yao, kala me, 5chao, seichui, seichuisā, kharar me, phungli me, shongfa, kala kaphung yao hibingna. 6Sāyurbingwui ngachaili asho kālala ngapākta khaluikazā sāyur saikora nathumna shaipaira. 7Kha khaluizā sā nilala, asho ngapāk sā nilalawui ngachaili, ut, theba, kala lungkaihok nathumna mashaipaimana; kaja chibing khaluizālala asho makhangapāk, kala nathumwui vang matharmana. 8Hok asho ngapāklala makhaluizāmada, nathumwui vang matharmana. Chiwui asā mashaipaimana, kala chiwui kathi angunli masāza̱paimana. 9Tara̱lungli khalei saikorawui ngachaili, angachāng eina ahor kakā chi nathumna shaipaira. 10Kha angachāngla, ahorla makakā chi nathumna mashaipaimana; kaja chi nathumwui vang matharmana. 11Kathara vānao saikora nathumna shaipaira. 12Kha nathumna mashaipaimana kajibing chiya: khalāng, khalāng sāsha, osprey, 13khalāng sāsha, langpop, kala langpop yur kachiva̱, 14ngahong hangkhāyur kachiva̱ saikora, 15ostrich, pawung ngayāza, shamadruva, kala langtikyur kachiva̱, 16pawung, ibis, kala rahar, 17utvana, sāsha, kala khaishumva, 18varok, varokyur, kazeithora kala vāchap hibingna. 19Angachāng kakā ngamenkazata sāyur saikora nathumwui vang matharmana; chi mashaipaimana. 20Kha kathara angachāng kakā saikora chi nathumna shaipaira.
21Amāngna thikahai khangatei chi mashaipaimana. Nathumwui keinungli khalei ramkazat mili zākhavai mipaira, lah kha̱mi khangateili yorsangpaira; kaja nathum nathumwui Avāli kathara mibingna. Nathumna yaonao awui ava̱wui na̱ eina mahangpaimana.
Nathumwui Tithe Avāwui Mangāli Khuirāwui
22Kum kachida nathumwui luiwui heiun saikorawui tithe chi mashoila khuivāra. 23Awui ming leikhavai ana kapangkakhui apam chili, nathumwui Avāwui mangāli nathumwui zāt, drakhāra̱, kala thaowui tithe, kala nathumwui sei eina yaowui pharākhare shaira; chithāda nathum nathumwui Avāli atam kachida khangachee chi tamkhuira. 24Kha shongfa chi nathumwui vang katāva̱rat eina, nathumna tithe chi phung khavai maphungkhararakha, kaja awui ming haikhavai nathumwui Avāna kapangkakhui apam chi nathumwui eina tānāhaiakha, nathumwui Avāna nathumli somihaira tharan, 25chi lupāla onlaga, nathumwui pāngli khuida, nathumwui Avāna kapangkakhui apam chili vāra. 26Nathumwui ningna ningkachāng athishurda sei, yao, drakhāra̱, lah zamshei, nathumwui ning kahao athishurda saikora lupā chi eina lozāra; kala chili nathumwui Avāwui mangāli shaida, na kala nashi shimkhurna ringphāra. 27Nathumwui keinungli khalei Levinaobingli mahorhaipaimana, kaja ana nathumla ngasoda yar lah shimlui maleimana. 28Zingkum kathum kachidawui kapei tharan, chi zingkumwui heiun saikorawui tithe chi khuivāda nathumwui keinunglungli kazipsanglu. 29Levinaobing, kaja ana nathumla ngasoda yar lah shimlui maleimana, kala nathumwui keinungli khalei kha̱minaobing, avāva̱ makhalei nao, kala ra̱meinaobing ungda, shaida, okthuiki kajina; chithāda nathumwui pāngwui ot saikorali nathumwui Avāna nathumli somira.
