Amlangbü Thuseibü Shuong Ka Kaneibü Maangpon Maangkuashi
Thuseibou cheei amaaphilabü che kuko thonen yingalonga ong, haoei lubü mühghaü shuong phai semkho dogo laulaje, haoeibü ngüh aditjan; kaneibü Bouei kan maangpon pendouei hao to sanou ayingsi dogo takteida. Kho tegü kaneibü na, yak ayingsi sanoubü thangbou che yoa, hoba sangnyu pendou yoa ki: kho Israel shanga yaangbü harantham ki.
13 1Kan yoa thuseibü ayingsi mangh manghlibou che loulaje, hoba haoei kan la amaaphilabü ayingsi maangpanglabü che kulaje, 2hoba haoei laubü amaaphilabü ayingsi maangpanglabü kho loushedla, ‘Senei kanei angebü lubü mühghaü shuong phai semkho, hoba haoen khangenkho,’ dogo laulaje, 3kho thuseibü ayingsi mangh manghlibou ngüh teditti. Aishanga kanei kaneibü maangpon pendouei hoba kaneibü soushou pendouei kaneibü Bou to sanou ayingsi dogo ngela shanga, kaneibü Bouei kan takteida. 4Kaneibü Bou phai semjan, hao to soumo hatjan, haoeibü sakkubü shuong jungeijan, haoeibü ngüh ditjan, hao khangenjan, hoba hao to kaangkhühtham hatlepjan. 5Kho thuseibü ayingsi mangh manghlibou haitijan, aishanga kaneibü Bou, aoei kan Ijep kaodak ka lotbaan aaola chem ka kan khümenkei, hao khulimbo haoei ngüh laukei, hoba kaneibü Bouei kanei paila sakkubü lam ka kan apla lambei. Kho tegü amaibü kan yo ka müt apjan.
6Kaneibü na, kaneibü nyueibü shou, ayingsi kaneibü bousushou ayingsi nouyangshou, ayingsi kaneibü maanga sanoubü yak, ayingsi kaneibü langkei tegü sanoubü kaneibü thangbou cheei, ‘Senei hauan kanei hoba kaneibü nyusibou shuongei angebü lubü mühghaü shuong khangenkho,’ dogo huphanga kan tensepan laulaje, 7kan kaonyu ka kibü phang shuongeibü mühghaü shuong, nyangbü ayingsi saabü, kaodak thonbü che ka lubü thonbü sühko kibü,’ 8Kanei hao to telim, ayingsi haoei ngüh teditti; hao to aikei phokei adamjan, hao tesenet, ayingsi hao tehuma. 9Aying, kanei hao maimaitham haitijan. Hao haitila kaneibü ik shaang hao thüka kilabü, phaia müt pendoueibü ik kilabü. 10Hao to laangei tetan haitijan, aishanga haoei kan kaneibü Bou, aoei kan Ijep kaodak ka aaola chem ka lotbakei, hao ka sepeitila haujembei. 11Israel müt pendouei hibü ditlabü hoba hatlabü, hoba kan yoa touje ao tegü amaibü ajungeilabü.
12Kaneibü Bouei kan la khünei kila kubü sangnyu che shangabü dogo kanei ditlaje, 13kan yo ka jim akibü mütshuong satan, ‘Senei hauan kanei angebü lubü mühghaü shuong khangenkho,’ dogo haoeneibü sangnyu mütshuong satetlangkei, 14kheijinei kanei maangsangko lamjan, chühjan, hoba phejan. Hoba ho shalabü peisilei kan yo ka kümbü kho maimaitham hoba ngühmai yingalonga, 15kanei kho sangnyua kibü mütshuong inlouei haitijan, khünei kibü pendou hoba kho ka samkeisamuk, inlouei lemailela mautijan. 16Kho ka soletbü pendou kho khongchi jenyua kamshaian, hoba sangnyu hoba kho ka soletbü pendou kaneibü Bou to juokbü lembü tegü wana juokjan. Kho ponpen leiluan kilabü, touje akümetngailabü. 17Khümbo kuan apbü peisilei aikei kaneibü ik to tehatlepma, kheijinei kaneibü Bouei haoeibü angebü khauang ka sepeitilabü, kan to onoulabü, kan to sanoudambü kulabü, hoba kan haatikulabü, kaneibü nyusibou to haoei theyolanyobü tegü, 18kanei kaneibü Bou ngüh ditko, tat ngei kan la sakkubü haoeibü sakkubü pendou jungeiko, hoba kaneibü Bou thedanga ai janbü ki kho kümla laualonga.
