உபாகமம் 13

13 ¹உங்கள் நடுவில் ஒரு தீர்க்கதரிசியோ சொப்பனம் காண்பவனோ எழும்பி, உங்களுக்கு ஓர் அடையாளத்தையோ அற்புதத்தையோ காட்டி, ²அவன் சொன்ன அடையாளமோ அற்புதமோ நிறைவேறி, ‘நீ அறியாத வேறே தேவர்களைப் பின்பற்றி, அவர்களைச் சேவிப்போம்’ என்று சொன்னால், ³அந்தத் தீர்க்கதரிசியின் அல்லது அந்தச் சொப்பனக்காரனின் வார்த்தைகளுக்குச் செவிகொடாதே. நீங்கள் உங்கள் பிதாவை உங்கள் முழு இருதயத்தோடும் உங்கள் முழு ஆத்துமாவோடும் நேசிக்கிறீர்களா என்று அறியும்படி, உங்கள் பிதா உங்களைச் சோதிக்கிறார். ⁴உங்கள் பிதாவைப் பின்பற்றி, அவருக்குப் பயந்து, அவருடைய கட்டளைகளைக் கைக்கொண்டு, அவருடைய சத்தத்துக்குக் கீழ்ப்படிந்து, அவரைச் சேவித்து, அவரைப் பற்றிக்கொள்ளுங்கள். ⁵அந்தத் தீர்க்கதரிசியோ அந்தச் சொப்பனக்காரனோ கொலைசெய்யப்படவேண்டும்; ஏனெனில், எகிப்திலிருந்து உங்களைப் புறப்படப்பண்ணி, அடிமைத்தன வீட்டிலிருந்து உங்களை மீட்ட உங்கள் பிதாவுக்கு விரோதமாய் அவன் கலகம் பேசி, நீங்கள் நடக்கும்படி உங்கள் பிதா கட்டளையிட்ட வழியைவிட்டு உங்களைத் திசைதிருப்பப் பார்த்தான். ஆகையால், உங்கள் நடுவிலிருந்து அந்தத் தீமையை அகற்றிப்போடுங்கள்.

⁶உன் சகோதரனாவது, உன் தாயின் மகனாவது, உன் மகனாவது, உன் மகளாவது, உன் மார்போடு அணைத்துக்கொள்ளும் மனைவியாவது, உன் உயிரைப்போல் உனக்குப் பிரியமான சிநேகிதனாவது, ‘நீயும் உன் முற்பிதாக்களும் ஒருபோதும் அறியாத வேறே தேவர்களைச் சேவிக்கப்போவோம்’ என்று இரகசியமாய் உன்னை ஏவினால், ⁷உனக்குச் சமீபமாயும் தூரமாயும் இருக்கிற, பூமியின் ஒரு முனைதொடங்கி மறுமுனைமட்டும் உள்ள உன்னைச் சுற்றியுள்ள ஜனங்களின் தேவர்களில் சிலவற்றைச் சேவிக்கப்போவோம் என்று சொன்னாலும், ⁸அவனுக்கு உடன்படாமலும் செவிகொடாமலும் இரு; அவன்மேல் இரக்கங்கொள்ளாமலும், அவனைத் தப்பவிடாமலும், அவனை மறைத்துவைக்காமலும் இரு. ⁹அப்படியல்ல—நீ அவனைக் கொலைசெய்யவேண்டும். அவனைக் கொல்ல முதலில் உன் கை அவன்மேல் விழட்டும்; பின்பு எல்லா ஜனங்களின் கையும் விழட்டும். ¹⁰அவன் செத்துப்போகும்படி அவனைக் கல்லெறிந்து கொல்லவேண்டும்; ஏனெனில், எகிப்திலிருந்து, அடிமைத்தன வீட்டிலிருந்து உன்னைப் புறப்படப்பண்ணின உன் பிதாவைவிட்டு உன்னைத் திருப்பிவிடப் பார்த்தான். ¹¹இஸ்ரவேலர் எல்லாரும் அதைக் கேட்டுப் பயந்து, உங்கள் நடுவில் இப்படிப்பட்ட தீமையை இனி ஒருபோதும் செய்யாதிருப்பார்கள்.

¹²உங்கள் பிதா நீங்கள் குடியிருக்கும்படி உங்களுக்குக் கொடுக்கும் உங்கள் பட்டணங்களில் ஒன்றைக்குறித்து, ¹³‘நீங்கள் அறியாத வேறே தேவர்களைச் சேவிக்கப்போவோம்’ என்று சொல்லி, உங்கள் நடுவிலிருந்து புறப்பட்ட பேலியாளின் மக்கள் தங்கள் பட்டணத்து மனிதரை வழிதப்பப்பண்ணினார்கள் என்று சொல்லக் கேட்டால், ¹⁴அப்பொழுது நீ நன்றாய் விசாரித்து, ஆராய்ந்து, கவனமாய்க் கேட்கவேண்டும். இந்த அருவருப்பான காரியம் உங்கள் நடுவில் செய்யப்பட்டது என்பது உண்மையும் நிச்சயமுமானால், ¹⁵அந்தப் பட்டணத்தின் குடிகளைப் பட்டயக்கருக்கினால் வெட்டி, அதையும் அதிலுள்ள யாவையும் அதின் மிருகஜீவன்களையும் பட்டயக்கருக்கினால் முற்றிலும் அழித்துப்போடவேண்டும். ¹⁶அதின் கொள்ளைப்பொருள் யாவையும் அதின் வீதியின் நடுவில் சேர்த்து, அந்தப் பட்டணத்தையும் அதின் கொள்ளைப்பொருள் யாவையும் உங்கள் பிதாவுக்குச் சர்வாங்க தகனபலியாக அக்கினியால் சுட்டெரிக்கவேண்டும். அது என்றென்றைக்கும் பாழாய்க்கிடக்கும், ஒருபோதும் திரும்பக் கட்டப்படாது. ¹⁷சாபத்துக்கு ஒப்புக்கொடுக்கப்பட்டதொன்றும் உன் கையில் ஒட்டிக்கொள்ளாதிருப்பதாக; அப்பொழுது உங்கள் பிதா தம்முடைய உக்கிரமான கோபத்தைவிட்டுத் திரும்பி, உங்களுக்கு இரக்கம் காண்பித்து, உங்கள்மேல் மனதுருகி, உங்கள் முற்பிதாக்களுக்கு ஆணையிட்டபடி உங்களைப் பெருகப்பண்ணுவார். ¹⁸நான் இன்று உங்களுக்குக் கட்டளையிடுகிற அவருடைய எல்லாக் கட்டளைகளையும் கைக்கொண்டு, உங்கள் பிதாவின் பார்வைக்குச் செம்மையானதைச் செய்து, உங்கள் பிதாவின் சத்தத்துக்குக் கீழ்ப்படிந்தால் அப்படியே நடக்கும்.