ګردان 13 FHB Father's Heart Bible™

13 ¹کۀ ستاسو په مينځ کښې کوم نبى يا د خوبونو ليدونکے راپورته شى او تاسو ته کومه نښه يا معجزه درکړى، ²او هغه نښه يا معجزه چې د هغې خبره يې کړې وه رښتيا شى، او ووائى چې، ”راځئ چې د نورو بتانو پيروى وکړو کوم چې تاسو نۀ پېژندل، او د هغوئ عبادت وکړو،“ ³نو د هغه نبى يا د خوبونو ليدونکى خبرو ته غوږ مۀ ږدئ. ستاسو پلار تاسو ازمائى، دې دپاره چې معلومه کړى چې آيا تاسو د خپل پلار سره په ټول زړۀ او په ټول روح باندې مينه کوئ. ⁴د خپل پلار پيروى وکړئ، د هغۀ نه يرېږئ، د هغۀ حُکمونه وساتئ، د هغۀ د آواز اطاعت وکړئ، د هغۀ عبادت وکړئ او د هغۀ پورې ونښلئ. ⁵هغه نبى يا د خوبونو ليدونکے دې قتل کړے شى، ځکه چې هغۀ ستاسو د پلار په خلاف د بغاوت خبره وکړه، هغه چې تاسو يې د مِصر نه راوويستلئ او د غلامۍ د کور نه يې خلاص کړئ، دې دپاره چې تاسو د هغه لارې نه واړوى کومه چې ستاسو پلار تاسو ته د تلو حُکم درکړے وو. نو دا بدى د ځان له مينځه لرې کړئ.

⁶کۀ ستا ورور، ستا د مور زوئ، يا ستا زوئ يا لور، يا هغه ښځه چې تا سره نزدے ده، يا ستا هغه دوست چې ستا د ځان په شان درته ګران دے، په پټه تا وغولوى او ووائى چې، ”راځه چې لاړ شو او د نورو بتانو عبادت وکړو،“ هغه بتان چې نۀ تا او نۀ ستا پلار نيکۀ پېژندلى وو، ⁷د هغه قومونو د بتانو نه چې ستا چاپېره دى، نزدے وى کۀ لرې، د زمکې د يو سر نه تر بل سره پورې. ⁸د هغۀ خبره مۀ منئ او غوږ ورته مۀ ږدئ؛ رحم پرې مۀ کوئ، مۀ يې بخښئ او مۀ يې پټوئ. ⁹نه، بلکې هغه دې قتل کړې شى. اول ستا لاس پرې ولګيږى، بيا د ټولو خلقو لاس. ¹⁰هغه په کاڼو سنګسار کړئ چې مړ شى، ځکه چې هغۀ کوشش وکړو چې تا د خپل پلار نه واړوى، هغه چې تا يې د مِصر نه، د غلامۍ د کور نه راوويستلے. ¹¹ټول اِسرائيل به واورى او وبه يرېږى، او بيا به هيچرې ستاسو په مينځ کښې داسې بد کار ونۀ کړى.

¹²کۀ تۀ د خپلو ښارونو د يو ښار په حقله واورې، هغه چې ستا پلار يې تا ته د اوسېدو دپاره درکوى، ¹³چې ستا د مينځه ناکاره خلق راووتل او د خپل ښار خلق يې ګمراه کړل، او ووئيل يې چې، ”راځئ چې لاړ شو او د نورو بتانو عبادت وکړو کوم چې تاسو نۀ پېژندل،“ ¹⁴نو ښۀ لټون، تحقيق او پوښتنه وکړه. کۀ دا رښتيا وى او ثابته شى چې ستا په مينځ کښې دا نفرت انګېزه کار شوے دے، ¹⁵نو د هغه ښار اوسېدونکى د تورې په دم ووژنه، او هغه بالکل تباه کړه، څۀ چې په هغې کښې دى او د هغې څاروى، ټول د تورې په دم. ¹⁶د هغې ټول مالِ غنيمت د هغې د چوک په مينځ کښې راجمع کړه، او ښار او د هغې ټول مالِ غنيمت په اور کښې وسوزوه، د خپل پلار دپاره د سوزولى قربانۍ په توګه. هغه دې د تل دپاره ويجاړ پاتې شى، بيا دې هيچرې ونۀ جوړيږى. ¹⁷د تباهۍ دپاره وقف شوى څيزونو نه دې هيڅ ستا لاس پورې ونۀ نښلى، دې دپاره چې ستا پلار د خپل سخت غضب نه واوړى، تا ته رحم درکړى، په تا باندې مهربانى وکړى او تا زيات کړى، لکه چې هغۀ ستا د پلار نيکۀ سره قسم خوړلے وو، ¹⁸کۀ تۀ د خپل پلار د آواز اطاعت وکړې، او د هغۀ ټول هغه حُکمونه وساتې کوم چې زۀ نن تا ته درکوم، او د خپل پلار په نظر کښې هغه څۀ وکړې چې صحيح وى.