Lian Tonu Balei
Laa tonu razapuba lang. David om ningting kalum laa. Edom mi Doeg na hungluga Saul khou, “David ga Ahimelech in bi thou drwe,” diga rin thangnu kaan bi.
Rikrwang chwanlaang tonu rwan ding Saul khou koi impu thangnu Doeg lang tonu. Rou satnu chong bing ding kriangga baom lan bi balumsanu manpa danga bakhou chong tonu, khatle napwan in bina ui swak thanglune diga bakhou rinne—atiyeda laa tonu maan ga ani Pa in bi talwan kraa kung danga kadaa nge.
52 1Kasianu lang pa-aam toga nangna lian tonubo, ngam liannu nang? Ani Pa om balumsa lang khopnu kriangnu ga ni bathin khaanglune.
2Nalei na braannu kathan to nge, kabengnu chang danga, nang minamnu. 3Nangna kasanu ding khon bina kasianu ding ma kriang nge, khatle bazenu kabianu ding khon bina chong karwaknu ding ma kriang nge.
4Nangna rou satnu chong bing ding kriang nge, nang minamnu balei. 5Atiyeda ani Pa na nating khwa seiga rai sat thanglune; Maanna nating kasut swakluga napwan in bina ui swaklune; Maanna nating ringnu nun om talei ram bina mai sat thanglune.
6Ririak senu nunna muluga kachilune; banina bating ding banuiga rinlune, 7“Manpa ding phaang ngo, maanna ani Pa ding baom pak hung riak ding to make, atiyeda baom lan tam takka ding balumsa rwe, khatle mi nun ding to braanluga natnu to rwe.” 8Atiyeda eiya ani Pa in bi saga thounu talwan kraa kung danga ongme; eina ani Pa om balumsa lang khopnu kriangnu ding khwa seiga balumsaye. 9Eina Nangna to thang damnu briakpina Nating khwa seiga swan lang nge; Naom balumsa lang khopnu mi nun meithaan bi Nameng bi bachun thanglune, balangbe haga saye.