Bakut Naanunna Pi Sa Thangnu
Jisu na imphaannu ding banaan thangluga bathiang thang rwe, Israel lak pi inkunu balumsa ding Rome kraanmi raza bapuba khat lak pi mu rwe, suinu nwamnu manpa khat khou balu inbei ta lang bariak maake diga daan rwe, baom potroi rwanna bani ding bazwan dinu balumsanu thiraang khat ding daan thang rwe, khatle to that tonu manpa kani ding kan swak rwe. Habei ga nampui mi nunna Maan ding se lang kalum rwe.
8 1Maan chen lana talou hungnu kaan bi, mi khang pui tam takka Bating sui se ngaake. 2Imphaannu manpa pakhat hungluga, Bameithaan bi kekhok deluga rinne, “Pukraangba, Nangna zaye dabe, Nangna ating to bathiang thangnu ngamme.”
3Jisu na Bakut zongluga bating banaan ga rinne, “Ei zaye; bathiang taro.” Haba kahan bina baom imphaannu ga sa drwe. 4Jisu na bakhou rinne, “Tudannu khou le rin mako, atiyeda seluga naraanto ding takolu khou tatoga, Moses na zathang pi thang ngaaknu potphun ding, bani lang sake ga pi swako.”
Jisu Pi Loh Lo Thangnu Balumsanu
5Maan Capernaum bi khutnu kaan bi, kraanmi raza bapuba pakhatna Bakim bi hungluga, Bakhou kalumga, 6rinne, “Pukraangba, aswak ga bain bi pum baang thinuna in ongme, naa rakan takka ongme.”
7Jisu na bakhou rinne, “Ei hungluga bating pi sa thangne.”
8Kraanmi raza bapubana katake, “Pukraangba, Nang ating in chung bi hungnu lang ei saka make; chong khatcha rinnu ga rinno, atiga aswak ga sa thanglune. 9Balangbe ei le kangamnu om thwei la ongnu mi khat ye, atiga ating thwei bi le kraanmi rwan amme. Eina khat khou, ‘Seyo,’ diye dabe maan seye; katei khou, ‘Hung ngo,’ diye dabe maan hung nge; atiga aswak khou, ‘Heiya towo,’ diye dabe maan towe.”
10Jisu na haga ngaisunu kaan bi loh loluga, Bating sui damnu bing khou rinne, “Batak sekka Eina nani khou rinnuwe, hei danga balumsanu amnu mi Israel bi eina mu make. 11Eina nani khou rinnuwe, mi tam takka lumik swak le lumik taak lana hungluga, ani Pa om krwang talei la Abraham, Isaac khatle Jacob le diga sa in lang hung ongtalune, 12atiyeda krwang talei om sa rwan ding ga langkaang om kazingnu riak la bazwan satlune. Habei ga chapka khatle ngaatang ei karit ritka onglune.” 13Jisu na kraanmi raza bapuba khou rinne, “Sero, nangna balumsanu ga danga nang lang to thang ding ngo.” Haba kahan bi ga baom swak ga sa thang rwe.
Jisu na Peter In Bi Pi Sa Thangnu
14Jisu na Peter in bi khutnu kaan bi, Peter mei nu bakhunga naaga ria bi in ongnu Maanna mu rwe. 15Maanna bakut banaan ga, bakhunnu ga lan drwe, atiga maanna lon thouluga Bating chwanlaang to rwe. 16Haba khwazin ga, banina ri kasia khutnu tam ting Bakhou phun hung ngaake; Maanna chong khatcha gana katha nun ding kazun satluga naanu bing zana pi sa thang rwe. 17Hei ga thiamting Isaiah na rin basaam thang ngaaknu ga tang thang rwe, “Maanna ani soinu ding louluga ani naanu ding khaang rwe.”
Jisu Nung Suinu om Kama
18Jisu na Bakim bi mi khang pui munu kaan bi, tui zai la sekhan ding ga bani khou zathang pi thang rwe. 19Atiga chongtan bachuthangnupa pakhat hungluga Bakhou rinne, “Bachuthangnupa, Nang senu riak bing bi ei le Nanung suisene.”
20Jisu na bakhou rinne, “Lousa ui rwan om bain amme, basaang la basa rwan om kabu amme, atiyeda Misa Sa Kapaisa ding ga Balu bei lang riak bakaba maake.”
21Potroi rwan lak pi katei pakhatna Bakhou rinne, “Pukraangba, kama lang apa ding kairi lang se thang ngo.”
22Atiyeda Jisu na bakhou rinne, “Anung suiro, khatle thinu nunna bani om kathinu nun ding rise dam ding ngo.”
Jisu na Thiraang Ding Pi Rim Rim Thangnu
23Maan li bi twangnu kaan bi, Baom potroi rwanna Bating sui ngaake. 24Thei mak daakka, tuipui bi thiraang kanatnu swak hungluga, tui kabaapnuna li ding sip rwe—atiyeda Maan inthi ong ngaake. 25Atiga banina Bating bathou thouluga rinne, “Pukraangba, ani ding kan thang ngo! Ani braan ding rwe!”
26Maanna bani khou rinne, “Nani balumsanu tabwinu nun, pa-aam to briakpina nani kachinubo?” Habei ga Maan thouluga thiraang le tuipui le ding twei rwe, atiga pui takka rim rim ta drwe.
27Mi nun loh loluga rinne, “Hei ga pa-aam danga mi khatnu ombo—thiraang le tuipui le gana Bating chong ngaisu nge?”
Pa om Sa Kapaisana Zingnu Ding Kadounu
28Maan tui zai la, Gadarenes taram bi sekhutnu kaan bi, ri kasia khutnu manpa pat ni thaanmwan lana swakluga Bating kadou rwe, bani bathot sianu lai briakpina tudannu le haba lampui bi se mak ngaake. 29Banina pao rakanga rinne, “Rikrwang Sa Kapaisa, Nang le ani paaam barui bazem ambo? Kaan tang mak basaan ani ding rai thang lang hei riak la Nang hung drwe ombo?” 30Haba kaan bi bani lana namlaa la bok nun tam takka basaak timsa ong ngaake. 31Atiga ri kasia bing gana Bakhou hweiga rinne, “Nangna ani ding kazun sate dabe, bok nun khou ani ding lang thang ngo.”
32Maanna bani khou rinne, “Sero.” Atiga bani swakluga bok nun khou khut rwe, khatle bok nun za rakanga pak tasuk taluga chen thwei lana tuipui la ta imphum rwe khatle tui bi braan drwe.
33Bok sian ngaaknu nun gana nampui la pak seluga, ri kasia khutnu manpa rwan khou swak tamnu bing suiga, pot za cham ga bapu ngaake. 34Nampui za Jisu ding kadou lang swak hung rwe; Bating munu kaan bi, bani taram ding thangsia dam lang Bakhou kalum rwe.