Yirusalem teraksa indang o aru

Yirusalem jaratem raksaogo ali, aser Nehemiai nübur dang aji yanglushitsü anir. Tsüngdang nung, lisem lima ajak manung pei nübur kümzükba Tebu bilemtetba sarasademba tulu ka lir.

Chapter 1.

Hacalia jabaso Nehemia otem. Kislev ita nung, küm metsübuba nung, ni Susa mitsa nung liasü, ^a

Kü adianutem rongnung ka Hanani Yihuda nungi nisungtem den aru. Taküm ali aser tepuokdak nungi tanüngba Yihuda nunger indang, aser Yirusalem indang ni parnok dang asüngdang. Parnoki kü dang ashi, “Tepuokdak nungi tanüngba rongnung, iba linük nung alirtem, kanga timtem aser maksü nung lir. Yirusalem jaraji raksaogo, iba süngkhümtem mi agi rongtokogo.”

Kodang ni item o angashi, ni amena ajeb, aser anogo aika mang ayim, kotak nung aliba Tebu madang lumia sarasadema liasü. Ni ashi, Oh kotak nung aliba Oba, tulu aser tetsübutsü Tsüngrem, na meimer aser ne temelaba ozüngtem benshirtem den, tezüngzüktepba aser temeim yimlibilem sayur, Ne tenzükeri ne tsüngdang tanü aonung oda anogoshia ne tenzüker Israel asoshi mepishiba iba sarasademba nai angatsü asoshi, ne tenarong angateta ali aser ne tenük lapoka liang; asenok Israel chirtemi na anema menaba temenentem nangzükdagi. Ni aser kü tebu kibongi temenen menaogo. Asenoki na anema tai kanga inyakogo, nai ne tenzüker Mosa dang melaba temelaba ozüng, telatet ozüng, aser yimsü benshitsütem mabenshi.

Ne tenzüker Mosa dang melaba ne o bilemtetangma, “Nenoki nüktapangta mapa inyakra, ni nenok nüburtem rongnung prokshidaktsütsü, saka nenoki kü dangi meyipa arua, kü temelaba ozüngtem benshia, aser itemji inyakra, nenok tepuokdaki aortem anüng tatembang talang nung aliba, ni idak nungi parnok anitentsü, aser kü tenüng idakji alitsü asoshi ni shimtetba linük jagi parnok bener arutsü.”

Parnok, nai ne tashi tulu aser ne tashi tait teka agi alangzükba ne tenzükertem, ne nübur lir. Oh Oba, ne tenarong ne tenzüker sarasademba, aser ne tenüng tsübutsü nung pelarba ne tenzükertem sarasademba dang angateta liang. Tanü ne tenzüker mapa nung takok agüjang, aser iba nisung madang pa dang taochi sayuangma. Iba mapang nung ni chuba nem marok amsang tongtiba liasü.