Teklaang Ngaoboubü Metda
Püngkhün koukhin ipan koksüngei, seneibü Bou thipbü akibü müt pendou to lit ngao sühko amaibü kümkei; mütshuongei hailabü lambü lausikei haitila amukei. Kheijinei koli setan kibü sepai 200,000,000ei müt phejan sembü che haitikei. Akibü shuongei haoeneibü heangsho, müt haitibü hoba mangsenlabü khümenan kikei. Habü ka aoei tokei maangpon sepeila amukei.
9 1Khuthük hangangbü ngaoboubü teklaang metkei, hoba ngei khuthük ka kaodak to tuongbü khanshoulitshou che hapbei, hoba hao to püngkhün koubü koukhin kukei. 2Haoei püngkhün kou ipbei, hoba wankhük yaangbü namyaüshang ka longbü wankhük tegü longkei; hoba kou wankhükei chanyu hoba müh nakthühtham apbei. 3Hoba wankhük ka koksüng longkei hoba kaodak to loukei, hoba kaodak kabü sinkip tegü hau haoen to kukei. 4Kaodak kabü sang, shomenbü sang den shuong, ayingsi bunyu shuong to amaibü tekümma, lausikei khei seneibü Bou sangkubü haoeneibü thenyeka akibü müt shuong ong, dogo haoen to lenkei. a a v4 Ho sangkubüei seneibü Bou kibü shuong to sangkuda — khei lin nyetboua lenbü haoeibü khangenbü shuong to sangkubü jeteitham ong. 5Haoen to haitila asakkukei, lausikei lit ngao mautila sakkukei—khübü mautibü kho sinkipei müt to ngümlaje mautibü tegü kikei. 6Khübü chalou ka mütshuongei hai lamlabü lausikei aühüplabü, hoba shila mangsühlabü, lausikei haiei haoen ka satenlabü.
7Koksüng shuong kho wapyola lamlean kibü koli tegü kikei; haoeneibü khua hon tegü khun kikei, hoba haoeneibü thenyek müteibü thenyek tegü kikei. 8Haoen yaksa khu tegü khu kikei, hoba haoeneibü sendei molosaonyu sendei tegü kikei. 9Haoen nam tegü insiaubu kikei, hoba haoeneibü kaak langh kho koli juong hoba kailong wapyola nujung atbü tegü kikei. 10Haoeneibü mei sinkip tegü kikei, hoba khübü mei sühko ngümbü ki; hoba khübü mei ka müt to lit ngao amaibü kümla hau kikei. 11Haoeneibü Choba kho püngkhün khuthük hangangbü ki—Ibribü ngüha Leilulabü, Grikbü ngüha Apollyon ki. b b v11 Nyen penyi tegütham “Leilutibou” dogo lauda.
12Shaangboubü ügütü danjung haukei; chühashi, khübü phaia ügütü penyi touje loulabü.
13Kheijinei khuthük hangangbü lakboubü haoeibü teklaang metkei, hoba ngei seneibü Bou thedanga kibü honeibü lemshang laang lei ka ngüh che ditkei, 14teklaang jungbü khuthük hangangbü lakboubü to laukei, “Eufrates shumang yaangbüa khühbü khuthük hangangbü lei kho khoyam apyoashi.”
15Iknop, chalou, lit, hoba po shanga lamlean kibü khuthük hangangbü lei kho, müteibü tan sem ka tan che haitila shanga khoyam apyokei. 16Kolia setbü sepai tan lühbak kho 200,000,000 kikei; ngei haoeneibü lühbak ditkei. 17Mangsanga ngei koli hoba khünei setbü shuong hai hapbei: haoeneibü insiaubu wan, safir, hoba wansat namsek tegü kikei; kolieibü khu kho molosaonyu khu tegü kikei, hoba haoeneibü sembung ka wan, wankhük, hoba wansat longkei. 18Khübü shatlim sem—haoeneibü sembung ka longbü wan, wankhük, hoba wansat—müteibü tan sem ka tan che haitikei. 19Kolieibü hau kho haoeneibü sembung hoba meia ki—haoeneibü mei kho pinyu tegü khu kikei, hoba khübüei haoenei amaibü kümda.
20Khübü shatlim ka ahaitibü lonbü müt shuongei, touje haoeneibü ikei kümbü shuong ka asepeila kausakkei—shabü sou shuong hoba hon, chandinam, chinam, laang, hoba bueibü kümbü heangsho shuong to khümbo kuan lembei, khübü shuong kho ahapen, aditen, ayingsi apaien. 21Hoba haoen haoeneibü müt haitibü, seibütakbü, pejapela, ayingsi sunglangbü shabü ka maangpon asepei.
