Amar Pitri Sukha Haddi Khan Bhitorte Jivon Phuki Diye
Amikhan laga Pitri pora bisi sukha haad khan thaka ekta khaal te rakhi diya aru puchi ase ki etu khan jinda hobo paribo naki, Ezekiel bhabobani kore aru haad khan juri thaka, mangsho luwa aru khara hoi juwa laga awaj hune. Etu khan Israel ase, jun koi ase ki tai laga asha khotom hoi jaise. Tar pichete naam likha duita lathi tai laga hath te ekta hoi jai.
37 1Amar Pitri laga hath moi uporte ahhise. Aru Tai amar Pitri laga Atma pora moi ke bahar ulai ani kene ekta ghati laga majot te rakhi dise—ghati tu haddi khan pora bhorta thakise. 2Tai moi ke haddi khan laga age-pise, charo phale, bulai loise—ghati laga tolte bisi-bisi haddi thakise, aru bisi sukha thakise.
3Tai moi ke koise, “Manuh laga putro, eitu haddi khan jinda hobo paribo?” Moi koise, “Sorbo-shoktiman Pitri, Apuni jane.”
4Tetiya Tai moi ke koise, “Eitu haddi khan uporte bhabobani kobi: Sukha haddi khan, amar Pitri laga kotha huni bi. 5Sorbo-shoktiman Pitri eitu haddi khan ke eneka koi ase: Sabi, Moi tumikhan bhitorte saas ani ase, aru tumikhan jinda hobo. 6Moi tumikhan uporte naas khan lagai dibo, mangso uthai dibo, chamra pora dhaki dibo, aru tumikhan bhitorte saas dibo, aru tumikhan jinda hobo. Tetiya tumikhan janibo Moi tumar Pitri ase.”
7Titia moi hukum diya nisena bhabobani korise. Aru jitia moi bhabobani kori thakise, ekta awaj ahhise—khor-khor kora awaj—aru haddi khan ekjon logote mili jaise, haddi tu tar nijor haddi logote. 8Moi saise: haddi khan uporte naas khan thakise, mangso uthi ahhise, chamra pora taikhan ke dhaki loise—kintu taikhan bhitorte saas eku nthakise.
9Tai moi ke koise, “Saas ke bhabobani kobi; bhabobani kobi, manuh laga putro, aru saas ke kobi: Sorbo-shoktiman Pitri koi ase: Hey saas, charta hawa pora ahhibi, aru eitu morija manuh khan bhitorte saas phuki dibi, titia taikhan jinda hobo.” a a v9 Yate ekta he kotha pora saas, hawa, aru atma—tinta laga ortho ase; eneka pora eitu charta hawa ke, mora manuh khan bhitorte mata jivon laga saas ke, aru 14 number aiyat te amar Pitri pora dhalai diya Atma ke, sob ke mate.
10Titia moi Tai hukum diya nisena bhabobani korise, aru saas taikhan bhitorte ghusi jaise, aru taikhan jinda hoi kene nijor theng te khara hoise—bisi-bisi dangor ekta sipahi dol.
11Tai moi ke koise, “Manuh laga putro, eitu haddi khan pura Israel laga ghor ase. Taikhan koi ase, ‘Amar haddi khan sukhi jaise aru amar asha harai jaise; amikhan pura kati phela hoise.’ 12Titia bhabobani kori kene taikhan ke kobi: Sorbo-shoktiman Pitri eneka koi ase: Hey Moi laga bacha khan, Moi tumar kobor khan khuli ase aru tumikhan ke tumar kobor pora uthai ani ase, aru Moi tumikhan ke Israel laga desh te loi jabo. 13Tetiya, jitia Moi tumar kobor khan khulibo aru tumikhan ke tumar kobor pora uthai anibo, Hey Moi laga bacha khan, titia tumikhan janibo Moi tumar Pitri ase. 14Aru Moi tumikhan bhitorte Moi laga Atma dibo, aru tumikhan jinda hobo, aru Moi tumikhan ke tumar nijor desh te bohai dibo. Tetiya tumikhan janibo Moi, tumar Pitri, kotha koise aru korise, amar Pitri koi ase.”
Amar Pitri Tar Alag Hoi Ja Bacha Khan Ke Aru Milai Diye
15Amar Pitri laga kotha aru ekbar moi logote ahhise:
16“Aru tumi, manuh laga putro, ekta lathi loi kene, tate likhi bi, ‘Yehuda aru tar sathi Israel manuh khan karne.’ Titia dusra ekta lathi loi kene, tate likhibi, ‘Yusuf karne—Ephraim laga lathi—aru tar sathi pura Israel laga ghor karne.’ 17Aru eitu duita ke ekta lathi hobole milai dibi, titia eitu tumar hath te ekta hoi jabo.’
18“Aru jitia tumar manuh khan tumi ke hudibo, ‘Eitu khan pora tumi ki bujhabo mange?’ 19taikhan ke kobi, Sorbo-shoktiman Pitri eneka koi ase: Moi Yusuf laga lathi, juntu Ephraim laga hath te ase, aru tar logote mili thaka Israel laga jat khan ke loi ase, aru taikhan ke Yehuda laga lathi logote milai ase, taikhan ke ekta lathi bona ase, titia taikhan Moi laga hath te ekta hobo. 20Tumi likha lathi khan ke taikhan laga suku age te tumar hath te dhori rakhibi. 21Titia taikhan ke kobi, Sorbo-shoktiman Pitri eneka koi ase: ‘Taikhan juntu desh khan majot te jaise, ta pora Moi Israel manuh khan ke ani ase; Moi taikhan ke charo phale pora joma kori kene taikhan laga nijor desh te loi anibo. 22Moi taikhan ke hei desh te, Israel laga pahar khan uporte, ekta jati bonai dibo, aru ekjon raja taikhan sob laga uporte raja hobo. Taikhan arubi duita jati nahobo, aru kitia bhi duita rajyo te bhag nohobo. 23Taikhan arubi nijor ke taikhan laga murti khan pora, taikhan laga ghin kora jinis khan pora, nahole taikhan laga kunbi bidroh pora letera nohobo. Taikhan juntu sob jagate thaki kene paap korise, ta pora Moi taikhan ke bachai anibo, aru taikhan ke sapha koribo. Taikhan Moi laga bacha khan hobo, aru Moi taikhan laga Pitri hobo. 24Moi laga noukar David taikhan laga uporte raja hobo; taikhan sob laga ekjon he rakhiya hobo. Taikhan Moi laga niyom khan mani kene, Moi laga hukum khan rakhi kene, eitu khan koribo. 25Moi laga noukar Jakob ke diya desh, juntu jagate tumar baba khan thakise, ta te taikhan thakibo. Taikhan, taikhan laga bacha khan, aru taikhan laga bacha laga bacha khan, ta te hodai nimite thakibo, aru Moi laga noukar David hodai nimite taikhan laga rajkumar hobo. 26Moi taikhan logote shanti laga vachan ekta koribo, taikhan logote ananta vachan ekta hobo. Moi taikhan ke bohai dibo aru bisi bonai dibo, aru Moi laga pobitro jaga taikhan majot te hodai nimite rakhibo. 27Moi laga thaka jaga taikhan uporte hobo; Moi taikhan laga Pitri hobo, aru taikhan Moi laga bacha khan hobo. 28Tetiya, jitia Moi laga pobitro jaga taikhan majot te hodai nimite thakibo, titia desh khan janibo Moi tumar Pitri ase, kun Israel ke pobitro bonai.’”