Wektune Paukuman tumrap Niniwe
Pengepungan teka: tameng-tameng abang, kreta-kreta mlayu kaya kilat, lawang-lawang kali dibobol, kraton ambruk, ratu diboyong dene para abdine wadon padha nuthuki dhadhane. Asyur iku singa kang ngebaki guwane karo daging suwekan; Rama Pangeraning wadyabala swarga ngandika yen Panjenengane nglawan dheweke.
2 1Sang juru-mbuyarake wis nglurug nglawan kowe, he Niniwe. Jaganen bentenge, awasana dalane, singsetana bebedanmu, kumpulna sakabehing kakuwatanmu!
2Awit Rama kita lagi mulihake kamulyane Yakub, kaya kamulyane Israel, sanadyan para tukang jarah wis ngrampasi nganti gundhul lan ngrusak pang-pange. a a v2 Sanadyan ing kitab kang isi paukuman tumrap Niniwe, intine yaiku Rama kita kang mulihake kaurmatane para putrane kang wis babak-bundhas.
3Tamenge para prajurite diwenehi warna abang, para prawira padha nganggo sandhangan abang mbranang; kreta-kreta perang pating krelap kaya geni ing dina anggone disawiyagakake, lan tumbak-tumbak kayu beros padha diobat-abitake. 4Kreta-kreta perang padha ngamuk ing lurung-lurung, mobat-mabit mrana-mrene ing alun-alun; katone kaya obor, mlesat kaya kilat. 5Dheweke nyeluk para perwirane; padha kesandhung nalika baris lumaku; padha rerikatan marani tembok, lan tameng pangayom wis dipasang. 6Gapura-gapura kali padha kabukak, lan kraton ambruk. 7Wis katetepake: dheweke diblejedi lan digawa lunga, dene para abdi wadone padha sesambat kaya manuk dara, karo padha nggebugi dhadhane. 8Niniwe iku kaya blumbang kang banyune lagi saya asat. “Mandhega! Mandhega!” pangundange, nanging ora ana siji-sijia kang nolih mundur. 9Jarahen selakane! Jarahen emase! Ora ana enteke bandhane, samubarang kang aji pating tumpuk. 10Suwung lan sepi mamring lan rusak! Ati padha ajur, dhengkul padha lemes, kabeh awak padha nandhang sangsara, lan saben rai dadi pucet.
11Saiki ana ing ngendi dununge para singa iku, guwa, papan pakan para singa nom, ing kono singa lanang lan singa wadon padha nglembara, dalah anak-anake singa, tanpa ana kang medeni? 12Singa iku nyuwek-nyuwek mangsa kang cukup kanggo anak-anake, lan nyekek mangsa kanggo singa-singa wadone; guwa-guwane dikebaki mangsa bauran, lan kandhang-kandhange kebak daging suwekan.
13“Lah, Aku iki nglawan kowe,” mangkono pangandikane Rama kang nguwasani wadya-bala ing swarga. “Aku bakal ngobong kreta-kreta perangmu nganti dadi kukus, lan pedhang bakal mangsa singa-singamu kang nom. Aku bakal nyirnakake mangsanmu saka bumi, lan swarane para utusanmu ora bakal keprungu maneh.”