ናሆም 2 FHB Father's Heart Bible™

2 ¹እቲ በታኒ ናባኺ ደየበ፥ ኦ ነነዌ። ነታ ዕርዲ ሓልዊ፤ ነቲ መንገዲ ተዓዘቢ፤ ሕቛኺ ኣትርሪ፤ ኵሉ ሓይልኺ ኣኻኺቢ!

²ዘመትቲ ገፊፎምዎም ጨናፍሮምውን ኣባዲሞም እኳ እንተነበሩ፥ ኣቦና ንግርማ ያእቆብ ከም ግርማ እስራኤል ይመልሶ ኣሎ እሞ። ^a a v2 ኣብ መፅሓፍ ፍርዲ ነነዌ እኳ፥ ፍረ ነገሩ ኣቦና ንኽብሪ እቶም ዝተሃሰዩ ውሉዱ ዝመልስ ምዃኑ እዩ።

³ዋልታታት ጀጋኑኡ ብቐይሕ ተለኽዮም ኣለዉ፥ እቶም ጀጋኑ ሰባት ቀይሕ ግምጃ ተኸዲኖም ኣለዉ፤ እቶም ሰረገላታት በታ ዝዳለዉላ መዓልቲ ኸም ሓዊ የንፀባርቑ፥ ኵናታት ፅሕዲ ኸዓ ተወዝወዙ ኣለዉ። ⁴እቶም ሰረገላታት ብመገድታት እናተፋጠኑ ይጐዩ፥ ኣብ ኣደባባያት ንየው ነጀው ይጐዩ፤ ከም ሽግ ይመስሉ፥ ከም መብረቕ ይውንጨፉ። ⁵ንሹመኛታቱ ይፅውዖም፤ ክግስግሱ እንተለዉ ይዕንቀፉ፤ ናብ መካበብያ ይቕልጥፉ፤ እቲ መከላኸሊ ዋልታ ኸዓ ተዳለወ። ⁶ደጌታት እቲ ፈለግ ተኸፍቱ፥ እቲ ቤተ መንግስቲ ኸዓ ፈረሰ። ⁷ተወሲኑ እዩ፦ ተገፊፋ ተወሰደት፥ ኣግራዳ ኸም ርግቢ እናበኸያ፥ ኣፍ ልበን እናወቕዓ። ⁸ነነዌ ማያ ዝነፅፍ ከም ዘለዎ ቓላይ እያ። “ደው በሉ! ደው በሉ!” ይብሉ፥ ዝምለስ ግና የለን። ⁹ነቲ ብሩር ዘምትዎ! ነቲ ወርቂ ዘምትዎ! ነቲ ሃብቲ መወዳእታ የብሉን፥ ናይ ኵሉ ክቡር ነገር ፅጋብ ኣሎ። ¹⁰ባዶነትን ባድማን ዕንወትን! ልቢ መኸኸ፥ ኣብራኽ ራዕራዕ በለ፥ ኣብ ኵሉ ሰብነት ቃንዛ ኣሎ፥ ገፅ ኵሉ ኸዓ ፃዕደወ።

¹¹ሕዚ እቲ ጎዳጉዲ ኣናብስ፥ እቲ ሽደናት ኣንበሳ ዝምገቡሉ ቦታ፥ ኣንበሳን ዋዕሮን ዝዛወሩሉ፥ ዀራኹር ኣንበሳውን ዝዋስኡሉ፥ ዘፍርሆም ሓደ እኳ ዘይብሉ ኣበይ ኣሎ? ¹²እቲ ኣንበሳ ንዀራኹሩ ዝኣክል ቀዳደደ፥ ንዋዕሮታቱ ኸዓ ግዳይ ሓነቐ፤ መጓርታቱ ብግዳይ መልአ፥ በዓትታቱ ኸዓ ብዝተቐዳደደ ስጋ።

¹³“እንሆ፥ ኣነ ኣንፃርኪ እየ፥” ይብል ኣቦ ሰራዊት ሰማይ። “ንሰረገላታትኪ ብትኪ ኸቃፅሎ እየ፥ ሰይፊ ኸዓ ንሽደናት ኣንበሳኺ ኽበልዖም እዩ። ግዳይኪ ኻብ ምድሪ ኽቘርፆ እየ፥ ድምፂ ልኡኻትኪ ኸዓ ድሕሪ ደጊም ኣይክስማዕን እዩ።”