Ninevi Matjembü Jihsiphai
Lintibou loukei: shieikoe ihbü shuong, busim aubu tegü laangyoko paibü kailong shuong, shumang bakou shuong thonan apbei, Choba chem tuongbei, hoba haoeibü sambüsao shuongei chesil to ipjinei, saonyu kho sunglan hautikei. Assiria kho jembü leishang sii shauan nakbü kaangbü shatsinam che kikei; müh tan yaangbüeibü Bouei, ngo kho khulimbo ki dogo lauda.
2 1Lintibouei ka khulimbo angkei, O Ninevi. Lapheishon lomashi, lam chühashi, nyi lolo lamlean kishi, kaibü hau pendou yoshaiashi!
2Aishanga seneibü Bouei Jakob yaangenbü kho Israel yaangenbü tegü pentida, soletbü shuongei haoen hangletkei hoba haoeneibü bhek leilutikei thounoukei. a a v2 Ninevi thüka matjembü lai ka ongsikei, khübü maangpon kho seneibü Bouei haoeibü shat kubü shousi shuong nyensang pentibü ki.
3Haoeibü lakjaibü shuongeibü aih saklangbüa haman kikei, maangkaangbü mütshuong nakthüngan sakbü neiei yukkukei; kailong shuong lamlean kibü khünyet ka wan tegü ponda, hoba busim aubu shuong jungan apda. 4Kailong shuong khongnyua kaangko satda, haoen khongji to longei dogo paida; haoen wanemshang tegü chühda, haoen langpon tegü laangjung satda. 5Haoei haoeibü leiyeibü shuong to ngekda; haoen meimeijinei phaiyetda; haoen kümthang to hali satda, hoba püetbü aih jungan phokei. 6Shumang bakou shuong thonan apbei, hoba Choba chem tuongda. 7Sakkubü kia: sao hangletan hoba sunglanga, haoeibü sambüsao shuongei haoeneibü chesil to ipan dukutuk tegü ngekda. 8Ninevi khübü dei kouan satbü thim che tegü ki. Haoen ngekda, “Loashi! Loashi!” lausikei aokei asepei. 9Chandinam lapshi! Hon lapshi! Nyaksinam to thon aying, namsek peisilei pendou juongan kia. 10Jim hoba sangliphang hoba leilutham! Maangpon tühnyinda, youkük semthetda, khonkuei mütshuong pendou to sühkei, hoba thenyek pendou senyak phatan apda.
11Molosaonyu denshang, molosaonyu younak shuongeibü shabü kaoen, molosaonyu hoba molosaonyu pi paibü kaoen, hoba molosaonyu shoushou shuong, haoen to hattikubou aokei akibü, tou aoa ki? 12Molosaonyuei haoeibü shoushou shanga souko taketkei hoba haoeibü molosaonyu pi shuong shanga mei haitikei; haoei haoeibü denshang haitibü meiei shenkei hoba haoeibü püngkhün taketbü pheei shenkei.
13“Chühashi, ngo ka khulimbo kia,” dogo Lakjaibü dan Bouei lauda. “Ngei kaibü kailong shuong wankhükei juokan aplabü, hoba inei kaibü molosaonyu younak shuong shaulabü. Ngei kaibü mei kaodak ka wapan aplabü, hoba kaibü ngühlang künbü shuongeibü ngüh tou jaüan aditlabü.”
