Ninevehwui tandi khami atam
Khorumrai rāhaira: chāngvei kahai raikapingbing, rikhān thāda kathai siguigaribing, tara̱wui ngaveibing shokhaira, konung sākhaihaira, awungnao sha̱nao tukthuihaira kala awui raosha̱naobingna akhālang tukda wukhanangra. Assyria chi kasharkahai sa̱ eina akhur kapnga ngasakkahai kazingkha̱ akha na; kazingramwui ashangva̱wui Avāna ana chiwui ngararra da hānga.
2 1Kachaiyānga nali ngasunghaira, O Nineveh. Raipan ngāklu, shongfa yanglu, shānneira̱ neilu, nawui yāng saikora pan saphinlu!
2Khikhalajila ngapon kazābingna athumli raimihaida athumwui aphāngbing shimānhailala, ithumwui Avāna Israelwui khayākakā thāda Jacobwui khayākakā sāmathākhuiluira. a a v2 Ninevehwui apongli khamarān lairik chiwuilila, chiwui ning chi ithumwui Avāna awui shaokahai anaobingwui tekhamatei sāmathākhuilui hina.
3Awui raimibingwui chāngvei chi mathen kahai hunga, raikapingbing chi hungshi kahai kachon ngavaiya; athum ngarān sāhai atamli siguigarina mei thāda kāpshoka, kala cypressthing kazei khāmshui ngasakra. 4Siguigarina chānreili ngawok eina zatra, leihngapha̱li ngawok eina rāvāra; athumwui zakmai meirā thai, rikhān khangashei thāda thaivāra. 5Ana awui otva̱bingli hoi; athum zatlakha kongluira; athum phākhoshong hengsāda vaira, kala ngayin khavai chāngvei chi apamli phākasangna. 6Kongrāwui ngaveibing shokhaira, kala konung sākhaihaira. 7Kasohaira: ana raimihaida tukthuihaira, awui raosha̱naobingna malungkaphelaga nāsha̱ thāda wukhanangra. 8Nineveh chi tara̱ longkharāhai ra̱khong akha thai. "Nganinglu! Nganinglu!" da athumna zeira, kha khipānakha mangareiungmana. 9Lupāsā ngaponlu! Sinā ngaponlu! Lan chi katang maleimana, aman kasak ot kachiva̱ mavātla. 10Khamasai kala ramcho kala ja̱tā! Wuklung menga, khuksao nganuka, angunna mi kachiva̱li yuira, kala mai saikora thengchenghaira.
11Ara kazingkha̱wui akhur chi kali leikhala? Chili kazingkha̱naobing phauira, kazingkha̱ avā kala ava̱ kānda zata, kala kazingkha̱wui anaobingli ngachee ngasak khipākha malei. 12Kazingkha̱na awui anaobingwui vang shaothatta sāshai sātekmi, kala awui kazingkha̱ ava̱bingwui vang sā ngakhakkathi sai; ana awui apambing sāshaina chipema, kala awui akhurbing sātek kahai sāna pemtinghai.
13"Yanglu, ina nali ngararra," da saikorawui Avāna hānga. "Ina nawui siguigaribing meikhut onngasakra, kala raighaina nawui kazingkha̱naobing tāmira. Ina nawui sāshai chi okathuiwui eina katattāmira, kala nawui paomebingwui akhon khipānakha mashāluimara."
