Nahumu 2

2 ¹Afọ́nká ti dìde sí ọ, Nínéfè. Ṣọ́ odi náà, ṣọ́ ọ̀nà, palẹ̀mọ́ ara rẹ, kó gbogbo agbára rẹ jọ!

²Nítorí Baba wa ń dá ọláńlá Jakọbu padà, gẹ́gẹ́ bí ọláńlá Israẹli, bí ó tilẹ̀ jẹ́ pé àwọn adigunjalè ti bọ́ wọn sí ìhòòhò, tí wọ́n sì ti ba ẹ̀ka wọn jẹ́. ^a a v2 Kódà nínú ìwé ìdájọ́ tí ó wà lórí Nínéfè, kókó rẹ̀ ni pé Baba wa ń dá ọlá àwọn ọmọ rẹ̀ tí a ti fìyà jẹ padà.

³Asà àwọn jagunjagun rẹ̀ ni a kùn ní pupa, àwọn akíkanjú ọkùnrin ni a wọ̀ ní ràdòdò; àwọn kẹ̀kẹ́ ogun ń kọ mànà bí iná ní ọjọ́ tí a bá palẹ̀ wọn mọ́, àti àwọn ọ̀kọ̀ igi sípírẹ́sì ni a ń mì. ⁴Àwọn kẹ̀kẹ́ ogun ń sáré jàgídíjàgan ní àwọn òpópónà, wọ́n ń sáré síwá sẹ́yìn ní àwọn gbàgede; wọ́n dàbí ògùṣọ̀ iná, wọ́n ń sáré bí mọ̀nàmọ́ná. ⁵Ó pe àwọn olórí ogun rẹ̀; wọ́n ń kọsẹ̀ bí wọ́n ti ń rìn; wọ́n yára lọ sí odi náà, a sì gbé apata ààbò kalẹ̀. ⁶A ṣí àwọn ẹnu-ọ̀nà odò sílẹ̀, ààfin sì wó palẹ̀. ⁷A ti pa á láṣẹ pé: a ó bọ́ ọ sí ìhòòhò, a ó sì kó o lọ, nígbà tí àwọn ẹrúbìnrin rẹ̀ ń kérora bí àdàbà, tí wọ́n ń lu àyà wọn. ⁸Nínéfè dàbí adágún omi tí omi rẹ̀ ń ṣàn dànù. Wọ́n ń kígbe pé, “Ẹ dúró! Ẹ dúró!” ṣùgbọ́n kò sí ẹni tí ó yípadà. ⁹Ẹ kó fàdákà! Ẹ kó wúrà! Kò sí òpin sí ọrọ̀ náà, ọ̀pọ̀ rẹpẹtẹ ti ohun iyebíye gbogbo. ¹⁰Òfo àti ahoro àti ìparun! Àyà ń já, eékún ń wárìrì, ìrora mú gbogbo ara, ojú gbogbo ènìyàn sì ń ṣú.

¹¹Níbo ni ihò àwọn kìnnìún wà nísinsìnyí, ibi tí àwọn ọmọ kìnnìún ti ń jẹun, níbi tí akọ kìnnìún àti abo kìnnìún ti ń rìn, pẹ̀lú àwọn ọmọ kìnnìún, láìsí ẹni tí ó dẹ́rùbà wọ́n? ¹²Kìnnìún fàya ẹran tó fún àwọn ọmọ rẹ̀, ó sì fún ohun ọdẹ pa fún àwọn abo kìnnìún rẹ̀; ó fi ohun ọdẹ kún àwọn ihò rẹ̀, àti ibùba rẹ̀ pẹ̀lú ẹran tí a fàya ya.

¹³“Kíyèsí i, mo kọjú ìjà sí ọ,” ni Baba àwọn ọmọ ogun ọ̀run wí. “Èmi yóò sọ àwọn kẹ̀kẹ́ ogun rẹ di èéfín, idà yóò sì jẹ àwọn ọmọ kìnnìún rẹ run. Èmi yóò ké ohun ọdẹ rẹ kúrò lórí ilẹ̀ ayé, ohùn àwọn ìránṣẹ́ rẹ ni a kì yóò gbọ́ mọ́.”