መዝሙር 135

135 ¹ሃሌ ሉያ! የአባታችንን ስም አመስግኑ፤ እናንተ የአባታችን አገልጋዮች፣ አመስግኑት፤ ²በአባታችን ቤት የምታገለግሉ፣ በአባታችን ቤት አደባባዮች ያላችሁ ሆይ።

³አባታችንን አመስግኑ፣ አባታችን መልካም ነውና፤ ስሙን በዝማሬ አመስግኑ፣ ያማረ ነውና። ⁴አባታችን ያዕቆብን ለራሱ፣ እስራኤልንም ለክብሩ ርስት መርጦአልና።

⁵አባታችን ታላቅ እንደ ሆነ፣ ሉዓላዊው አባታችንም ከአማልክት ሁሉ በላይ እንደ ሆነ እኔ ዐውቃለሁና። ⁶አባታችን የወደደውን ሁሉ በሰማያትና በምድር፣ በባሕሮችና በጥልቆቻቸው ሁሉ አድርጎአል። ⁷ከምድር ዳርቻ ደመናትን ያወጣል፤ ለዝናብ መብረቅን ያደርጋል፤ ነፋስንም ከመዛግብቱ ያወጣል።

⁸የግብፅን በኵራት፣ ሰውንም እንስሳንም መታ። ⁹ግብፅ ሆይ፣ በፈርዖንና በአገልጋዮቹ ሁሉ ላይ ምልክቶችንና ድንቆችን በመካከልሽ ላከ። ¹⁰ብዙ ሕዝቦችን መታ፣ ኀያላን ነገሥታትንም ገደለ፤ ¹¹የአሞራውያንን ንጉሥ ሲሆንን፣ የባሳንን ንጉሥ ዐግንም፣ የከነዓንንም መንግሥታት ሁሉ፤ ¹²ምድራቸውንም ርስት አድርጎ፣ ለሕዝቡ ለእስራኤል ርስት አድርጎ ሰጠ።

¹³አባታችን ሆይ፣ ስምህ ለዘላለም ጸንቶ ይኖራል፤ አባታችን ሆይ፣ መጠራትህ ለትውልድ ሁሉ ነው። ¹⁴አባታችን ለሕዝቡ ፍርድን ያመጣልና፣ ለአገልጋዮቹም ይራራልና።

¹⁵የአሕዛብ ጣዖታት ብርና ወርቅ፣ የሰው እጅ ሥራ ናቸው። ¹⁶አፍ አላቸው፣ ነገር ግን መናገር አይችሉም፤ ዐይን አላቸው፣ ነገር ግን ማየት አይችሉም፤ ¹⁷ጆሮ አላቸው፣ ነገር ግን መስማት አይችሉም፤ በአፋቸውም ውስጥ እስትንፋስ የለም። ¹⁸የሚሠሩአቸው እንደ እነርሱ ይሆናሉ፤ በእነርሱ የሚታመኑ ሁሉም እንዲሁ ናቸው።

¹⁹የእስራኤል ቤት ሆይ፣ አባታችንን ባርኩ፤ የአሮን ቤት ሆይ፣ አባታችንን ባርኩ፤ ²⁰የሌዊ ቤት ሆይ፣ አባታችንን ባርኩ፤ አባታችንን የምትፈሩ ሆይ፣ አባታችንን ባርኩ። ²¹በኢየሩሳሌም የሚኖረው አባታችን፣ ከጽዮን የተባረከ ይሁን። ሃሌ ሉያ!