Saamu 135

135 ¹Halleluya! Ẹ yin orúkọ Baba wa; ẹ yin ín, ẹ̀yin ìránṣẹ́ Baba wa, ²ẹ̀yin tí ń ṣiṣẹ́ ní ilé Baba wa, ní àgbàlá ilé Baba wa.

³Ẹ yin Baba wa, nítorí Baba wa dára; ẹ kọrin ìyìn sí orúkọ rẹ̀, nítorí ó dùn. ⁴Nítorí Baba wa ti yan Jakọbu fún ara rẹ̀, Israẹli gẹ́gẹ́ bí ìní ọ̀wọ́n rẹ̀.

⁵Nítorí mo mọ̀ pé Baba wa tóbi, àti pé Baba wa Olódùmarè ga ju gbogbo òrìṣà lọ. ⁶Ohunkóhun tí ó wù Baba wa, ni ó ti ṣe, ní ọ̀run àti ní ayé, nínú òkun àti gbogbo ibú wọn. ⁷Ó mú kí àwọsánmà gòkè láti òpin ayé wá; ó ṣe mọ̀nàmọ́ná fún òjò, ó sì mú ẹ̀fúùfù jáde láti inú àká rẹ̀.

⁸Ó pa àwọn àkọ́bí Ejipti, ènìyàn àti ẹranko bákan náà. ⁹Ó rán àwọn àmì àti iṣẹ́ ìyanu sí àárín rẹ, ìwọ Ejipti, sí Farao àti gbogbo àwọn ìránṣẹ́ rẹ̀. ¹⁰Ó kọlu ọ̀pọ̀ orílẹ̀-èdè, ó sì pa àwọn ọba alágbára. ¹¹Sihoni ọba àwọn ará Amori, àti Ogu ọba Baṣani, àti gbogbo ìjọba Kenaani, ¹²ó sì fi ilẹ̀ wọn ṣe ogún, ogún fún Israẹli ènìyàn rẹ̀.

¹³Orúkọ rẹ, Baba wa, dúró títí láéláé; òkìkí rẹ, Baba wa, ká gbogbo ìran-ìran. ¹⁴Nítorí Baba wa yóò ṣe ìdájọ́ fún ènìyàn rẹ̀, yóò sì ṣàánú àwọn ìránṣẹ́ rẹ̀.

¹⁵Àwọn òrìṣà orílẹ̀-èdè jẹ́ fàdákà àti wúrà, iṣẹ́ ọwọ́ ènìyàn. ¹⁶Wọ́n ní ẹnu, ṣùgbọ́n wọn kò lè sọ̀rọ̀; wọ́n ní ojú, ṣùgbọ́n wọn kò lè ríran; ¹⁷wọ́n ní etí, ṣùgbọ́n wọn kò lè gbọ́rọ̀, bẹ́ẹ̀ ni kò sí èémí kankan ní ẹnu wọn. ¹⁸Àwọn tí ń ṣe wọ́n yóò dàbí wọn, bẹ́ẹ̀ sì ni gbogbo àwọn tí ó gbẹ́kẹ̀lé wọn.

¹⁹Ilé Israẹli, ẹ fi ìbùkún fún Baba wa; ilé Aaroni, ẹ fi ìbùkún fún Baba wa; ²⁰ilé Lefi, ẹ fi ìbùkún fún Baba wa; ẹ̀yin tí ẹ bẹ̀rù Baba wa, ẹ fi ìbùkún fún Baba wa. ²¹Olùbùkún ni Baba wa láti Sioni wá, ẹni tí ń gbé ní Jerusalẹmu. Halleluya!