Kembila Nkumbu ya Yandi
Lukembilu yina me telama na zulu ya bidimbu: Tata ya beto ke sala konso mambu yina yandi ke zola na mubu mpe na zulu, yandi bulaka Ngipiti, yandi fwaka Siwone mpe Onge mpe pesaka yinsi ya bawu. Na lweka ya yawu, biteki yina kele ti minwa mpe meso ya mpamba ke bika bayidiki ya yawu mpamba kaka mutindu yawu.
135 1Aleluya! Beno kembila Nkumbu ya Tata ya beto; beno kembila yandi, beno bisadi ya Tata ya beto, 2beno bayina ke sadilaka na Yinzo ya Tata ya beto, na mapango ya Yinzo ya Tata ya beto.
3Beno kembila Tata ya beto, samu ti Tata ya beto kele mbote; beno yimbila mukunga na Nkumbu ya yandi, samu ti yawu kele kitoko. 4Samu ti Tata ya beto me soola Yakobi samu na yandi mosi, Isayeli bonso mvwilu ya yandi ya ntalu.
5Samu ti mu zaba ti Tata ya beto kele nene, mpe Mfumu Tata ya beto kele na zulu ya banzambi nyonso. 6Konso mambu yina Tata ya beto zolaka, yandi me sala yawu, na mazulu mpe na ntoto, na mubu mpe na mabulu nyonso ya yawu. 7Yandi ke tombula matuti na bansongi ya ntoto; yandi ke sala balusyemo samu na mvula mpe yandi ke basisa mupepe na bayinzo ya yandi ya kubumbila bima.
8Yandi bulaka bana ya ntete ya Ngipiti, bantu mpe bibulu. 9Yandi fidisaka bidimbu mpe bimangu na kati ya nge, Ngipiti, na ntadisi ya Falawo mpe bisadi ya yandi nyonso. 10Yandi bulaka bantu ya bayinsi mingi mpe yandi fwaka bantinu ya ngolo. 11Siwone, ntinu ya ba-Amoli, mpe Onge, ntinu ya Basane, mpe bimfumu nyonso ya Kaana, 12mpe yandi pesaka yinsi ya bawu bonso difwa, difwa na bantu ya yandi Isayeli.
13Nkumbu ya nge, Tata ya beto, ke zinga seko; nsangu ya nge, Tata ya beto, na bambandu nyonso. 14Samu ti Tata ya beto ke fundisa bantu ya yandi mpe yandi ke fwila bisadi ya yandi kyadi.
15Biteki ya bayinsi kele palata mpe wolo, kisalu ya maboko ya bantu. 16Yawu kele na bayinwa, kasi yawu lenda tuba ve; yawu kele na meso, kasi yawu lenda tala ve; 17yawu kele na makutu, kasi yawu lenda kuwa ve, mpe mpeve kele ve na kati ya bayinwa ya yawu. 18Bayina ke salaka yawu ke kuma bonso yawu, mpe mpidina mpe bantu nyonso yina ke tulaka kivuvu na yawu.
19Dikanda ya Isayeli, beno siika Tata ya beto; dikanda ya Aloni, beno siika Tata ya beto; 20dikanda ya Levi, beno siika Tata ya beto; beno yina ke tinaka Tata ya beto boma, beno siika Tata ya beto. 21Bika ti bantu siika Tata ya beto katuka na Siyone, yandi yina ke zinga na Yelusalemi. Aleluya!