Laa 135

135 ¹Hallelujah! Ithumwui Avāwui mingli solu; ali solu, O ithumwui Avāwui raobing, ²nathum ithumwui Avāwui shimli otram ngatha̱ching, ithumwui Avāwui shim kayāngli khalei nathum,

³ithumwui Avāli solu, kaja ithumwui Avā kaphāna; awui mingli masotlaa sālu, kaja chi lumashantheilaka. ⁴Kaja ithumwui Avāna Jacobli akhalattawui vang kapangkakhuia, Israelli awui aman kasak shimlui thāda.

⁵Kaja ina theihaira, ithumwui Avā reikhamataina, kala ithumwui Proho Avāna varebing saikorawuitungli reikhamataina. ⁶Ithumwui Avāwui ningkachāng athishurda, kazingramli kala okathuili, shamadrulungli kala athumwui kathuk saikorali ana sāhaira. ⁷Ana okathui akatangwui eina muiyā ngapānkā ngasaka; kazing rokhavai ana rikhān ngashei ngasaka, kala masi chi awui sikhurwui eina ana phanngasaka.

⁸Ana Egyptwui naochizaibing, mila sha̱keila katonga, sākathata. ⁹O Egypt, Pharaohli kala awui rao saikorali, nawui alungli matakhak kahai otsak kala khamachut sāchithei. ¹⁰Ana yur kachungkhali sākathata, kala aming kazata awungabingli sākathata. ¹¹Amorwui awunga Sihonli, kala Bashanwui awunga Ogli, kala Canaanwui wungram saikorali, ¹²kala athumwui ngalei shimlui thāda mi, awui mibing Israelli shimluina.

¹³Nawui ming, O ithumwui Avā, katang makhavai leichingra; nawui mingkhamayāng, O ithumwui Avā, thot saikorali leichingra. ¹⁴Kaja ithumwui Avāna awui mibingli mashun hāngsangra, kala awui raobingli lumashanmira.

¹⁵Yurbingwui meoma̱bing sinā lupāsāna, miwui pāng eina kasāna. ¹⁶Athum khamor kai, kha mamatuimana; mik kai, kha matheimana; ¹⁷Athum khanā kai, kha mashāmana, lah athumwui khamorli khaksui akhala maleimana. ¹⁸Athumli sākakhuibing chi athum tākamhai; chili shitkasangbing saikorala chipapama.

¹⁹O Israelwui shimkhur, ithumwui Avāli sochikatlu; O Aaronwui shimkhur, ithumwui Avāli sochikatlu; ²⁰O Leviwui shimkhur, ithumwui Avāli sochikatlu; ithumwui Avāli khangachee nathum, ithumwui Avāli sochikatlu. ²¹Jerusalemli kapama ithumwui Avāli Zionwui eina sochikatranu. Proholi solu!