Yabi Sunansa

Yabo da aka gina a kan shaida: Ubanmu yana yin duk abin da ya ga dama a teku da sararin sama, ya bugi Masar, ya kayar da Sihon da Og, ya kuma ba da ƙasarsu. Idan aka gwada da wannan, gumaka masu bakuna da idanu marasa amfani suna barin masu yinsu su ma wofi.

Babi na 135.

Halleluya! Ku yabi sunan Ubanmu; ku yabe shi, ku bayin Ubanmu, ku da kuke hidima a gidan Ubanmu, a filayen gidan Ubanmu.

Ku yabi Ubanmu, gama Ubanmu nagari ne; ku rera yabo ga sunansa, gama yana da daɗi. Gama Ubanmu ya zaɓi Yakubu don kansa, ya mai da Isra'ila mallakarsa mai daraja.

Gama na sani Ubanmu mai girma ne, Ubanmu Mai Iko kuwa ya fi dukan alloli. Dukan abin da Ubanmu ya ga dama, ya aikata, a cikin sammai da kuma a duniya, a cikin tekuna da dukan zurfafansu. Yakan sa gizagizai su tashi daga iyakar duniya; yakan yi walƙiya domin ruwan sama, yakan kuma fito da iska daga ma'ajiyoyinsa.

Ya karkashe 'yan fari na Masar, mutane da dabbobi. Ya aiko da alamu da abubuwan al'ajabi a cikinki, Masar, a kan Fir'auna da dukan bayinsa. Ya karkashe al'ummai masu yawa, ya kuma kashe manyan sarakuna masu iko. Sihon sarkin Amoriyawa, da Og sarkin Bashan, da dukan mulkokin Kan'ana, ya kuma ba da ƙasarsu gādo, gādo ga Isra'ila mutanensa.

Sunanka, ya Ubanmu, yana dawwama har abada; ambatonka, ya Ubanmu, cikin dukan zamanai. Gama Ubanmu zai kāre mutanensa, zai kuma yi wa bayinsa jinƙai.

Gumakan al'ummai azurfa ne da zinariya, aikin hannuwan mutane. Suna da bakuna, amma ba sa iya magana; suna da idanu, amma ba sa iya gani; suna da kunnuwa, amma ba sa iya ji, babu kuma numfashi a cikin bakunansu. Waɗanda suke yin su za su zama kamar su, haka kuma dukan waɗanda suke dogara gare su.

Ya gidan Isra'ila, ku yabi Ubanmu; ya gidan Haruna, ku yabi Ubanmu; ya gidan Lawi, ku yabi Ubanmu; ku da kuke tsoron Ubanmu, ku yabi Ubanmu. Albarka ta tabbata ga Ubanmu daga Sihiyona, shi da yake zaune a Urushalima. Halleluya!