መዝሙር 135 FHB Father's Heart Bible™

135 ¹ሃሌሉያ! ስም ኣቦና ኣመስግኑ፤ ኣቱም ኣገልገልቲ ኣቦና፥ ኣመስግንዎ፥ ²ኣቱም ኣብ ቤት ኣቦና እተገልግሉ፥ ኣብ ኣፀድ ቤት ኣቦና።

³ኣቦና ፅቡቕ እዩ እሞ፥ ንኣቦና ኣመስግንዎ፤ ባህ ዘብል እዩ እሞ፥ ንስሙ ዘምሩ። ⁴ኣቦና ንያእቆብ ንርእሱ፥ ንእስራኤል ድማ ፍሉይ ገንዘቡ ክኸውን መሪፅዎ እዩ እሞ።

⁵ኣቦና ዓብዪ ምዃኑ እፈልጥ እየ እሞ፥ ጐይታና ኸዓ ካብ ኵሎም ኣማልኽቲ ልዑል እዩ። ⁶ኣቦና ዝደለዮ ዅሉ፥ ኣብ ሰማያትን ኣብ ምድርን፥ ኣብ ባሕርን ኣብ ኵሉ መዓሙቑን ገበሮ። ⁷ንደመና ኻብ ወሰናት ምድሪ የደይቦ፤ ንዝናም መብረቕ ይገብር፤ ንፋስ ድማ ካብ ማዕኸናቱ የውፅእ።

⁸ንበዅሪ ግብፂ፥ ሰብ ኮነ እንስሳ፥ ወቕዐ። ⁹ኣቲ ግብፂ፥ ምልክታትን ተኣምራትን ኣብ ማእኸልኪ፥ ኣብ ልዕሊ ፈርዖንን ኵሎም ባሮቱን ለኣኸ። ¹⁰ንብዙሓት ህዝብታት ወቕዐ፤ ንሓያላት ነገስታት ከዓ ቐተለ። ¹¹ንሴዎን ንጉስ ኣሞራውያን፥ ንኣግ ንጉስ ባሳን፥ ንዅለን መንግስታት ከነዓንን። ¹²ንምድሮም ከዓ ርስቲ ጌሩ ሃበ፥ ንህዝቡ እስራኤል ርስቲ።

¹³ኦ ኣቦ፥ ስምካ ንዘለኣለም ይነብር፤ ኦ ኣቦ፥ ዝናኻ ኸዓ ንውሉድ ወለዶ ዅሉ ይነብር። ¹⁴ኣቦና ንህዝቡ ኽብይን እዩ እሞ፥ ንባሮቱ ኸዓ ኽርህርሀሎም እዩ።

¹⁵ጣዖታት ኣህዛብ ብሩርን ወርቅን እዮም፥ ዕዮ ኣእዳው ሰብ እዩ። ¹⁶ኣፍ ኣለዎም፥ ግና ክዛረቡ ኣይኽእሉን፤ ኣዒንቲ ኣለዎም፥ ግና ክርእዩ ኣይኽእሉን፤ ¹⁷ኣእዛን ኣለዎም፥ ግና ክሰምዑ ኣይኽእሉን፤ ኣብ ኣፎም ከዓ ምንም እስትንፋስ የለን። ¹⁸እቶም ዝሰርሕዎም ከማታቶም ይኾኑ፥ እቶም ዝተኣመንዎም ዅሎምውን ከምኡ ይኾኑ።

¹⁹ኣቱም ቤት እስራኤል፥ ንኣቦና ባርኽዎ፤ ኣቱም ቤት ኣሮን፥ ንኣቦና ባርኽዎ፤ ²⁰ኣቱም ቤት ሌዊ፥ ንኣቦና ባርኽዎ፤ ኣቱም ንኣቦና እትፈርሑ፥ ንኣቦና ባርኽዎ። ²¹ኣቦና ኻብ ፅዮን ይባረኽ፥ እቲ ኣብ ኢየሩሳሌም ዝነብር። ሃሌሉያ!