Goocai Rĩĩtwa Rĩake
Kũgooca kwakĩtwo igũrũ rĩa ũira: Ithe witũ ekaga o ũrĩa endaga iriainĩ na igũrũ, nĩahũũrire Misiri, nĩaharũrire Sihoni na Ogu na akĩneana bũrũri wao. Ũgereranio na ũguo, mĩhianano ĩrĩ na tũnua na maitho ma tũhũ ĩtigaga arĩa maamĩthondekire o ũguo, matarĩ kĩndũ.
135 1Haleluya! Goocai rĩĩtwa rĩa Ithe witũ; mũgooce, inyuĩ ndungata cia Ithe witũ, 2inyuĩ arĩa mũtungataga thĩinĩ wa nyũmba ya Ithe witũ, thĩinĩ wa nja cia nyũmba ya Ithe witũ.
3Goocai Ithe witũ, tondũ Ithe witũ nĩ mwega; inĩrai rĩĩtwa rĩake nyĩmbo, tondũ nĩ kwagĩrĩire. 4Nĩgũkorwo Ithe witũ nĩethuurĩire Jakubu we mwene, Isiraeli atuĩke kĩndũ gĩake kĩa goro mũno.
5Nĩgũkorwo nĩnjũũĩ atĩ Ithe witũ nĩ mũnene, na Ithe witũ ũrĩa wathanaga nĩ igũrũ rĩa ngai ciothe. 6Ũndũ o wothe ũrĩa Ithe witũ eendire, nĩawĩkĩte, kũu igũrũ o na gũkũ thĩ, thĩinĩ wa maria na kũrĩa guothe kũriku kwamo. 7Nĩatũmaga matu mambate kuuma ituriinĩ cia thĩ; nĩathondekaga rũheni rwa mbura, na akaruta rũhuho makũmbĩinĩ make.
8Nĩaaringire marigithaathi ma Misiri, marĩa ma andũ o na marĩa ma nyamũ. 9Nĩaatũmire imenyithia na magegania gatagatĩ gaku, wee Misiri, gũũkĩrĩra Firaũni na ndungata ciake ciothe. 10Nĩaaringire ndũũrĩrĩ nyingĩ, na akĩũraga athamaki maarĩ na hinya. 11Sihoni mũthamaki wa Aamori, na Ogu mũthamaki wa Bashani, na mothamaki mothe ma Kaanani, 12na akĩheana bũrũri wao ũtuĩke igai, igai rĩa Isiraeli andũ ake.
13Rĩĩtwa rĩaku, Ithe witũ, rĩtũũraga tene na tene; ngumo yaku, Ithe witũ, njiarwainĩ ciothe. 14Nĩgũkorwo Ithe witũ nĩagarũĩrĩra andũ ake, na aiguĩre ndungata ciake tha.
15Mĩhianano ya ndũũrĩrĩ nĩ betha na thahabu, wĩra wa moko ma andũ. 16Ĩrĩ na tũnua, no ndĩngĩhota kwaria; ĩrĩ na maitho, no ndĩngĩona; 17ĩrĩ na matũ, no ndĩngĩigua, o na gũtirĩ mĩhũmũ tũnuainĩ twayo. 18Arĩa mamĩthondekaga nĩmahaanaga ta yo, o na arĩa othe mamĩĩhokaga.
19Inyuĩ nyũmba ya Isiraeli, rathimai Ithe witũ; inyuĩ nyũmba ya Harũni, rathimai Ithe witũ; 20inyuĩ nyũmba ya Lawi, rathimai Ithe witũ; inyuĩ arĩa mwĩtigĩrĩte Ithe witũ, rathimai Ithe witũ. 21Ithe witũ arograthimwo arĩ Zayuni, we ũrĩa ũtũũraga Jerusalemu. Haleluya!