Haoeibü Nyen Nyensang Kuashi
Tetsida danko settibü nyensang: seneibü Bouei müh si kaodaka, yungnyu ka maangangbü pendou kümda, haoei Ijep haitikei, Sihon si Og tuonglepkei hoba haoeneibü kaonyek phetphan la kukei. Kho yoa takteiyoko, sembungei alauda hoba nyekei achühda kibü mühsinou shuong kho, haoen kümbou shuong la ai akibü yeilepkukei.
135 1Haleluya! Seneibü Bou nyen nyensang kuashi; kan Bou khangenbü shuong, hao sangashi, 2kan aoyouei seneibü Bou chema, seneibü Bou chem lanka ka khangenda.
3Seneibü Bou nyensang kuashi, aishanga seneibü Bou maibü ki; hao nyen shanga nyensang chia lauashi, aishanga kho maangamaibü ki. 4Aishanga seneibü Bouei Jakob himshuong shanga pienkei, Israel haoeibü ngühkhüm phejan la.
5Aishanga ngei seneibü Bou yaangbü ki dogo ngeakei, hoba seneibü Bunyubou mühghaü pendou thüka ki. 6Seneibü Bouei ai maangmaia, haoei müh si kaodaka, yungnyu hoba khoeneibü haübou pendou ka kümkei. 7Haoei kaodak leilang ka sangmei shuong angtida; haoei lang shanga langpon kümda, hoba haoeibü bung ka yei leiyenda.
8Haoei Ijep kaodak jayangshou, müt si meisiau ham haitikei. 9Haoei ka chenyu ka tetsida hoba seikümseilei hautikei, O Ijep, Farao hoba haoeibü khangenbü shuong pendou khulimbo. 10Haoei phang juong haitikei, hoba nyenshen Choba shuong haitikei. 11Amorbü Choba Sihon, hoba Bashanbü Choba Og, hoba Kanan sangle pendou, 12hoba haoei haoeneibü kaonyek phetphan la kukei, haoeibü mütli Israel la phetphan shanga.
13Kaibü nyen, O seneibü Abou, ponpen kida; kaibü nyenhang, O seneibü Abou, meten pendoua kida. 14Aishanga seneibü Bouei jembü mütli matjemlabü, hoba jembü khangenbü shuong shanga sanou dambulabü.
15Phangshuongeibü heangsho shuong chandinam hoba hon ki, müt ikei kümbü ki. 16Haoen sembung ki, lausikei joyola athük; haoen nyek ki, lausikei hapla athük; 17haoen nou ki, lausikei ditla athük, hoba haoeneibü sembunga hakhin aibü aying. 18Haoen kümbü shuong khübü tegü yeilabü, hoba haoen to mailembü pendou kho tegü yeilabü.
19O Israel chem, seneibü Bou sangashi; O Aron chem, seneibü Bou sangashi; 20O Levi chem, seneibü Bou sangashi; kan aoyouei seneibü Bou to souhatda, seneibü Bou sangashi. 21Zion ka seneibü Bou sangako kishi, hao aoei Jerusalema kida. Haleluya!
