ምሳሌ 9

9 ¹ጥበብ — ኢየሱስ፣ የአባታችን ጥበብ — ቤቷን ሠራች፤ ሰባቱን ዐምዶቿን ጠረበች። ²እንስሶቿን አረደች፤ የወይን ጠጅዋን ቀላቀለች፤ ማዕድዋንም አዘጋጀች። ³ገረዶቿን ልካ ከከተማይቱ ከፍተኛ ስፍራዎች ላይ ሆነው እንዲጠሩ አደረገች፦ ⁴“ተላላ የሆነ ሁሉ፣ ወደዚህ ይግባ!” ማስተዋል የጎደለውንም እንዲህ ትለዋለች፤ ⁵“ና፣ እንጀራዬን ብላ፤ የቀላቀልሁትንም የወይን ጠጅ ጠጣ። ⁶ተላላነትህን ተወው፣ በሕይወትም ኑር፤ በማስተዋል መንገድ ተመላለስ።” ⁷ፌዘኛን የሚገሥጽ በራሱ ላይ ስድብን ያመጣል፤ ክፉ ሰውንም የሚገሥጽ ጉዳት ይደርስበታል። ⁸ፌዘኛን አትገሥጽ፣ አለዚያ ይጠላሃል፤ ጠቢብን ግን ገሥጽ፣ እርሱም ይወድሃል። ⁹ጠቢብን ምከረው፣ ይበልጥ ጠቢብ ይሆናል፤ ጻድቅን አስተምረው፣ ይበልጥ ይማራል። ¹⁰አባታችንን መፍራት የጥበብ መጀመሪያ ነው፤ ቅዱሱን ማወቅም ማስተዋል ነው። ¹¹በእኔ ዘመንህ ይበዛልና፤ ለሕይወትህም ዓመታት ይጨመሩልሃል። ¹²ጠቢብ ብትሆን ለራስህ ጠቢብ ነህ፤ ብታፌዝ ግን ብቻህን ትሸከመዋለህ።

የስንፍና ሐሰተኛ ጥሪ

¹³ስንፍና የተባለች ሴት ጫጫታ ያላት ናት፤ ተላላ ናት፣ ምንም አታውቅም። ¹⁴በቤቷ ደጃፍ ትቀመጣለች፤ በከተማይቱ ከፍተኛ ስፍራ ባለ ወንበር ላይ፣ ¹⁵መንገድ ዐቋርጠው የሚያልፉትን፣ በመንገዳቸው ቀጥ ብለው የሚሄዱትን ትጠራለች፦ ¹⁶“ተላላ የሆነ ሁሉ፣ ወደዚህ ይግባ!” ማስተዋል የጎደለውንም እንዲህ ትለዋለች፤ ¹⁷“የተሰረቀ ውሃ ጣፋጭ ነው፤ በስውር የሚበላም እንጀራ ደስ የሚያሰኝ ነው።” ¹⁸ነገር ግን ሙታን በዚያ እንዳሉ፣ እንግዶቿም በመቃብር ጥልቅ ውስጥ እንዳሉ አያውቅም።