Bon konprann bati kay li
De kay, de envitasyon, tou de ap rele menm moun san eksperyans k ap pase yo. Kay Sajès la gen tab mete ak manje pare; Foli ofri dlo vòlò ak pen manje an kachèt. Diferans lan pa nan sa yo ofri, men nan sa k ap tann anndan. Ant de a, gen kèk liy sou jan pou w reprimande.
9 1Bon konprann bati kay li; li taye sèt gwo poto li yo. a a v1 Bon konprann jwenn tout sans li nan Jezi, bon konprann Bondye a — 1 Korentyen 1:24, 30; Kolosyen 2:3. 2Li touye bèt li yo; li melanje diven l; li ranje tab li tou. 3Li voye jenn sèvant li yo al rele moun depi kote ki pi wo nan lavil la: 4“Nenpòt moun ki egare, se pou l vin isit la!” Li di moun ki pa gen bon konprann nan: 5“Vini non, manje pen mwen an epi bwè diven mwen melanje a. 6Kite vye chemen egare nou yo, epi viv; mache nan chemen bon konprann lan.” 7Moun ki reprann moun ki renmen moke, l'ap rale jouman sou tèt li, epi moun ki reprimande yon mechan ap jwenn mal. 8Pa reprimande moun ki renmen moke, paske l'ap rayi ou; reprimande yon moun ki gen bon konprann, l'a renmen ou. 9Bay yon moun ki gen bon konprann konsèy, l'a vin gen plis bon konprann toujou; moutre yon moun ki mache dwat, l'a aprann plis toujou. 10Krentif pou Papa nou, se konmansman bon konprann, epi konnen Sila ki Sen an, se sa ki bay konprann. 11Paske, gremesi mwen, jou ou yo va vin plis, epi y'a mete plis lane sou lavi ou. 12Si ou gen bon konprann, se pou byen pa ou; si ou renmen moke, se ou menm sèl k'ap pote chay la.
Fo envitasyon Sotiz la
13Fanm yo rele Sotiz la gen gwo bouch; li egare, li pa konn anyen. 14Li chita devan pòt kay li, sou yon chèz, kote ki pi wo nan lavil la, 15l'ap rele moun k'ap pase bò kote l, moun k'ap swiv chemen yo toudwat: 16“Nenpòt moun ki egare, se pou l vin isit la!” Epi li di moun ki pa gen bon konprann nan: 17“Dlo yo vòlè dous, epi pen yo manje an kachèt gen bon gou.” 18Men, li pa konnen se moun mouri ki la, envite li yo deja nan fon peyi mò yo.