Chānsam 9

9 ¹Thangkhamei—Jishu, ithumwui Avāwui thangkhamei—na awui shim sāhaira; awui pākra̱ shini ana kasinghaira. ²Ana awui animang taithathaira; awui drakhāra̱ manāthaira; awui tablela ngarānhaira. ³Keinungwui juimeikap kaji apam eina vao khavai ana awui ngalānaobing chihovāhaira: ⁴"Kachikathāna ningkasham a china, hili rāranu!" Ning makhalei chili ana hānga, ⁵"Rālu, iwui khamui shailu, kala ina manātta drakhāra̱ chi manglu. ⁶Nawui ningkasham apong chi horhaolu, kala ringlu; theishingkakhuiwui apongli zatlu." ⁷Mashātkazarali hāngmachin kahai a china khalattali mana̱shi khuirai, kala makhayā mili hāngmachin kahai a china kalā shingasaka. ⁸Mashātkazarali hāngmachin masaalu, maningakha ana nali ningkachaira; thangkhama mili hāngmachinlu, chieina ana nali leishira. ⁹Thangkhama mili tamchitheilu, chieina ana thangmei mataisangra; khangarong mili tamchitheilu, chieina ana theikakhui mataisangra. ¹⁰Ithumwui Avāli khangachee hi thangkhameiwui haokaphokana, kala Katharawui awor hi theishingkakhuina. ¹¹Kaja iwui vang eina nawui zimiksho mataisangmira, kala nawui mirinli zingkum ngarumsangmira. ¹²Na thangmeiakha, nakhalattawui vang na thangmeina; na mana̱shiakha, namāngna chi phungra.

Mangkhama̱wui Khayom Kaho

¹³Mangkhama̱ sha̱nao chi mai shālaka; ana ningkasham eina khikha matheimana. ¹⁴Ana awui shimwui khāmongli, keinungwui juimeikap kaji apamli pamkhong akhali pama, ¹⁵Athumwui shongfali ngatartei zat kahai, kānthui kahaibingli ngakaoda: ¹⁶"Kachikathāna ningkasham a china, hili rāranu!" Kala ning makhalei chili ana hānga, ¹⁷"Leethuihai tara̱ hi leishirihai, kala ngathumda shaikahai khamui hi ringphālaka." ¹⁸Kha ana kathebing chili lei kaji, kala awui kharābing Kathewui ramwui kathukali lei kaji matheimana.