Hikima Ta Gina Gidanta

Gidaje biyu, gayyata biyu, dukansu suna kiran marasa wayo masu wucewa iri ɗaya. Na Hikima yana da tebur a shirye da abinci a shirye. Na Wauta yana ba da ruwan sata da gurasar da ake ci a ɓoye. Bambancin ba a cikin abin da ake bayarwa yake ba, sai dai abin da yake jira a ciki. A tsakaninsu akwai kalmomi game da tsautawa.

Babi na 9.

Hikima ta gina gidanta; ta sassaƙa ginshiƙanta bakwai. ^a Ta yanka dabbobinta; ta gauraya ruwan inabinta; ta kuma shirya teburinta. Ta aiki 'yan matanta su yi kira daga wuraren da suka fi tsayi a cikin birni: “Duk wanda yake marar azanci, bari yă shigo nan!” Ga wanda ba shi da hankali ta ce, “Ku zo, ku ci abincina, ku kuma sha ruwan inabin da na gauraya. Ku bar hanyoyinku na jahilci, ku rayu; ku yi tafiya a hanyar fahimi.” Duk wanda yake gyara mai ba'a yana jawo wa kansa cin mutunci, kuma duk wanda yake tsawata wa mugu yakan sami rauni. Kada ka tsawata wa mai ba'a, don kada yă ƙi ka; ka tsawata wa mai hikima, zai kuwa ƙaunace ka. Ka yi wa mai hikima umarni, zai ƙara hikima; ka koya wa mai adalci, zai kuma ƙara koyo. Tsoron Ubanmu shi ne mafarin hikima, kuma sanin Mai Tsarki shi ne fahimi. Gama ta wurina kwanakinka za su yawaita, za a kuma ƙara maka shekaru a rayuwarka. In kana da hikima, hikimarka na kanka ce; in kana ba'a, kai kaɗai za ka ɗauki nauyinsa.

Gayyatar Ƙarya ta Wauta

Matar nan Wauta mai surutu ce; jahila ce, ba ta kuma san kome ba. Tana zaune a ƙofar gidanta, a kan kujera a wuraren da suka fi tsayi a birni, tana kira ga masu wucewa, waɗanda suke tafiya kai tsaye a hanyarsu: “Duk wanda yake marar azanci, bari yă shigo nan!” Ga wanda ba shi da hankali kuwa ta ce, “Ruwan da aka sata yana da zaƙi, abincin da aka ci a ɓoye kuma yana da daɗi.” Amma bai sani ba cewa matattu suna can, cewa baƙinta suna cikin zurfin kabari.