ነህምያ 13

13 ¹በዚያ ቀን የሙሴን መጽሐፍ በሕዝቡ ፊት ጮኸው አነበቡ፤ ማንም አሞናዊ ወይም ሞዓባዊ ለዘላለም ወደ አባታችን ጉባኤ እንዳይገባ ተጽፎ አገኙ፤ ²ይህም የሆነው የእስራኤልን ሕዝብ በእንጀራና በውሃ ስላልተቀበሉ፣ ነገር ግን ይረግማቸው ዘንድ በለዓምን በእነርሱ ላይ ስለቀጠሩ ነበር፤ ነገር ግን አባታችን ርግማኑን ወደ በረከት መለሰው። ³ሕዝቡም ሕጉን በሰሙ ጊዜ ወዲያውኑ የባዕድ ዘር የሆነውን ሁሉ ከእስራኤል ለዩ።

⁴ከዚህ በፊት በአባታችን ቤት ማከማቻ ክፍሎች ላይ የተሾመው ካህኑ ኤልያሴብ ከጦብያ ጋራ የጠበቀ ዝምድና ነበረው። ⁵ለእርሱም ትልቅ ክፍል አዘጋጅቶለት ነበር፤ በዚያም ቀደም ሲል የእህል ቍርባኑን፣ ዕጣኑን፣ የቤተ መቅደሱን ዕቃዎች፣ ለሌዋውያን፣ ለዘማሪዎችና ለበር ጠባቂዎች የተመደበውን የእህል፣ የአዲስ ወይንና የዘይት ዐሥራት፣ እንዲሁም ለካህናት የሚሰጠውን መባ ያከማቹ ነበር። ⁶በዚህ ሁሉ ጊዜ እኔ በኢየሩሳሌም አልነበርሁም፤ ምክንያቱም በባቢሎን ንጉሥ በአርጤክስስ ሠላሳ ሁለተኛ ዓመት ወደ ንጉሡ ሄጄ ነበር። ከጥቂት ጊዜ በኋላም ልሄድ ከንጉሡ ፈቃድ ለመንሁ፤ ⁷ወደ ኢየሩሳሌምም ተመለስሁ፤ ኤልያሴብ በአባታችን ቤት አደባባዮች ውስጥ ለጦብያ ክፍል በመሥራት ያደረገውን ክፉ ነገር ዐወቅሁ። ⁸እጅግም ዐዘንሁ፤ የጦብያንም የቤት ዕቃዎች ሁሉ ከክፍሉ ወደ ውጭ ጣልሁ። ⁹ክፍሎቹም እንዲነጹ አዘዝሁ፤ ከዚያም የአባታችንን ቤት ዕቃዎች፣ የእህል ቍርባኑንና ዕጣኑን ወደ እነርሱ መለስሁ።

¹⁰ደግሞም የሌዋውያን ድርሻ እንዳልተሰጣቸው ዐወቅሁ፤ ስለዚህ ሥራውን ይሠሩ የነበሩ ሌዋውያንና ዘማሪዎች እያንዳንዳቸው ወደየዕርሻቸው ሸሽተው ነበር። ¹¹ስለዚህ ሹማምንቱን ተቃወምሁ፤ “የአባታችን ቤት ስለ ምን ተጓደለ?” አልኋቸው። ከዚያም ሌዋውያንን ሰብስቤ በየሥፍራቸው መለስኋቸው። ¹²ይሁዳም ሁሉ የእህል፣ የአዲስ ወይንና የዘይት ዐሥራት ወደ ማከማቻ ቤቶች አመጡ። ¹³ካህኑን ሰሌምያን፣ ጸሐፊውን ሳዶቅንና ሌዋዊውን ፈዳያን በማከማቻ ቤቶቹ ላይ ሾምሁ፤ የማታንያ ልጅ የሆነው የዛኩር ልጅ ሐናንም ይረዳቸው ነበር፤ ምክንያቱም ታማኞች ነበሩ፤ ሥራቸውም ለባልንጀሮቻቸው ለሌዋውያን ስንቅ ማከፋፈል ነበር።

¹⁴አባቴ ሆይ፤ በዚህ ምክንያት አስበኝ፤ ለአባቴ ቤትና ለአገልግሎቱ ያደረግሁትን ታማኝ ሥራ አትደምስስ።

¹⁵በዚያ ዘመን በይሁዳ ሰዎች በሰንበት ቀን ወይን ሲረግጡ፣ የእህል ክምር እያመጡ በአህዮች ላይ ሲጭኑ፣ ከወይን፣ ከወይን ፍሬ፣ ከበለስና ከልዩ ልዩ ጭነት ጋራ በሰንበት ወደ ኢየሩሳሌም ሲያስገቡ አየሁ። ስለዚህ በዚያ ቀን ምግብ ስለ መሸጥ አስጠነቀቅኋቸው። ¹⁶በዚያ የሚኖሩ የጢሮስ ሰዎችም ዓሣና ልዩ ልዩ ሸቀጥ እያመጡ በሰንበት ቀን በኢየሩሳሌም ውስጥ ለይሁዳ ሕዝብ ይሸጡ ነበር። ¹⁷ስለዚህ የይሁዳን መኳንንት ተቃወምሁ፤ እንዲህም አልኋቸው፤ “የሰንበትን ቀን በማርከስ የምታደርጉት ይህ ክፉ ነገር ምንድን ነው? ¹⁸አባቶቻችሁ ይህን አላደረጉምን? አባታችንስ ይህን ሁሉ መቅሰፍት በእኛና በዚህ ከተማ ላይ አላመጣምን? አሁንም እናንተ ሰንበትን በማርከስ በእስራኤል ላይ ይበልጥ ቍጣ ትጨምራላችሁ።”

¹⁹ስለዚህ ከሰንበት በፊት የኢየሩሳሌም በሮች ጨለማ በሆኑ ጊዜ፣ ደጆቹ እንዲዘጉና ሰንበት እስኪያልቅ ድረስ እንዳይከፈቱ አዘዝሁ። በሰንበት ቀንም ምንም ጭነት እንዳይገባ ከአገልጋዮቼ አንዳንዶቹን በበሮቹ ላይ አቆምሁ። ²⁰ነጋዴዎችና የልዩ ልዩ ሸቀጥ ሻጮች አንድ ሁለት ጊዜ ከኢየሩሳሌም ውጭ አደሩ። ²¹ስለዚህ አስጠነቀቅኋቸው፤ እንዲህም አልኋቸው፤ “ስለ ምን በቅጥሩ አጠገብ ታድራላችሁ? ዳግመኛ ይህን ብታደርጉ እጄን በእናንተ ላይ አነሣለሁ።” ከዚያ ጊዜ ጀምሮም በሰንበት አልመጡም። ²²ከዚያም ሌዋውያን ራሳቸውን እንዲያነጹ፣ መጥተውም በሮቹን እንዲጠብቁና የሰንበትን ቀን እንዲቀድሱ አዘዝኋቸው። አባቴ ሆይ፤ ይህንም ደግሞ ስለ እኔ አስብ፤ በታላቅ ምሕረትህም ማረኝ።

²³በዚያ ዘመን ደግሞ አሽዶዳውያን፣ አሞናውያንና ሞዓባውያን ሴቶችን ያገቡ አይሁድን አየሁ። ²⁴ከልጆቻቸውም እኵሌቶቹ የአሽዶድን ቋንቋ ወይም የሌላውን ሕዝብ ቋንቋ ይናገሩ ነበር፤ የይሁዳን ቋንቋ መናገር ግን አያውቁም ነበር። ²⁵ስለዚህ ተቃወምኋቸው፤ ረገምኋቸው፤ ከሰዎቹም አንዳንዶቹን መታሁ፤ ጠጕራቸውንም ነጨሁ። በአባታችንም እንዲህ ብዬ አማልኋቸው፤ “ሴቶች ልጆቻችሁን ለወንዶች ልጆቻቸው አትስጡ፤ ሴቶች ልጆቻቸውንም ለወንዶች ልጆቻችሁ ወይም ለራሳችሁ አትውሰዱ። ²⁶እንደነዚህ ያሉ ጋብቻዎች የእስራኤልን ንጉሥ ሰሎሞንን አላስኀጥኡትምን? በብዙ አሕዛብ መካከል እንደ እርሱ ያለ ንጉሥ አልነበረም፤ አባታችን ወደደው፤ አባታችንም በእስራኤል ሁሉ ላይ ንጉሥ አደረገው። ነገር ግን የባዕድ ሴቶች እርሱንም ወደ ኀጢአት መሩት። ²⁷እኛስ እናንተን ሰምተን የባዕድ ሴቶችን በማግባት አባታችንን እየከዳን ይህን ሁሉ ታላቅ ክፋት እናድርግን?”

²⁸የሊቀ ካህናቱ የኤልያሴብ ልጅ የሆነው የዮዳሄ ልጅ የሖሮናዊው ሰናባላጥ አማች ነበር፤ ስለዚህ ከእኔ አባረርሁት። ²⁹አባቴ ሆይ፤ ክህነትን፣ የክህነትንና የሌዋውያንን ኪዳን አርክሰዋልና አስባቸው።

³⁰ስለዚህ ከባዕድ ነገር ሁሉ አነጻኋቸው፤ ለካህናትና ለሌዋውያንም ተግባራቸውን፣ ለእያንዳንዱ ሥራውን መደብሁ። ³¹በተወሰነ ጊዜም የማገዶ ዕንጨት መባንና በኵራትን አዘጋጀሁ። አባቴ ሆይ፤ በቸርነት አስበኝ።