UNehemiya 13 FHB Father's Heart Bible™

13 ¹Ngaloo mini bayilesa incwadi kaMoses ezindlebeni zabantu, bafumana kubhaliwe ukuba akukho mAmon namMowabhi omakangene ebandleni likaBawo wethu naphakade, ²kuba babengabahlangabezanga oonyana bakaSirayeli ngesonka namanzi, basuka baqesha uBhileham ukuba abaqalekise—kodwa uBawo wethu wasenza isiqalekiso saba yintsikelelo. ³Kwathi bakuva umthetho abantu, bahlula kwaSirayeli bonke abangabolunye uhlanga.

⁴Ngaphambi koku, uEliyashibhi umbingeleli, owayemiselwe phezu kwamagumbi obuncwane endlu kaBawo wethu, wayehlobene kakhulu noTobhiya. ⁵Wayemlungisele igumbi elikhulu, apho babegcina khona iminikelo yokudla, nentlaka emhlophe, nempahla yetempile, nesishumi sengqolowa, newayini entsha, neoli eyayibelwe abaLevi, neemvumi, nabagcini-masango, kunye nomrhumo wababingeleli. ⁶Kuko konke oku ndandingekho eYerusalem, kuba ngomnyaka wamashumi mathathu anesibini ka-Artaxerxe ukumkani waseBhabhilon ndaya kukumkani. Emva kwexesha elithile ndacela imvume kuye ukuba ndimke, ⁷Ndabuyela eYerusalem, ndeva ngobubi awabenzileyo uEliyashibhi ngenxa kaTobhiya, emenzela igumbi kwiintendelezo zendlu kaBawo wethu. ⁸Ndaba buhlungu kakhulu, ndayilahlela ngaphandle kwegumbi yonke impahla yasendlwini kaTobhiya. ⁹Ndaza ndayala ukuba amagumbi ahlanjululwe, ndandule ukubuyisela kuwo impahla yendlu kaBawo wethu, iminikelo yokudla nentlaka emhlophe.

¹⁰Ndafumana kananjalo ukuba izabelo zabaLevi bezinganikwanga bona, ngako oko abaLevi neemvumi ababesenza umsebenzi babaleke elowo waya entsimini yakhe. ¹¹Ndaza ndawakhalimela amagosa, ndathi: “Kutheni na indlu kaBawo wethu ishiyiwe nje?” Ndandule ukubahlanganisa abaLevi, ndababuyisela ezikhundleni zabo. ¹²Baza bonke abakwaYuda basizisa isishumi sengqolowa, newayini entsha, neoli, ezindlwini zobuncwane. ¹³Ndamisa uShelemiya umbingeleli, noTsadoki umbhali, noPedaya umLevi, ukuba baphathe izindlu zobuncwane, benoHanan unyana kaZakure unyana kaMataniya ukubancedisa, kuba babethembekile; umsebenzi wabo yayikukwaba ukudla kubazalwana babo abaLevi.

¹⁴Ndikhumbule ngenxa yoku, Bawo wam; musa ukuzicima izenzo zokuthembeka endizenzele indlu kaBawo wam nenkonzo yayo.

¹⁵Ngaloo mihla ndabona abantu kwaYuda benyathela izixovulo zewayini ngeSabatha, bengenisa iimfumba zengqolowa bezithwalisa amaesile, kunye newayini, neediliya, nemikhiwane, neentlobo zonke zemithwalo, bezisa eYerusalem ngeSabatha. Ngaloo mini ke ndabalumkisa ngokuthengisa ukutya. ¹⁶AbaseTire ababehlala khona bazisa iintlanzi neentlobo zonke zempahla, bezithengisa ngeSabatha kubantu bakwaYuda, eYerusalem ngokwayo. ¹⁷Ndaza ndabakhalimela abanumzana bakwaYuda, ndathi kubo: “Yintoni na le nto imbi niyenzayo, nihlambela imini yeSabatha? ¹⁸Ingaba ooyihlo abakwenzanga oku na, waza uBawo wethu wasiwisela zonke ezi ntlekele phezu kwethu naphezu kwalo mzi? Ngoku nina nongeza ingqumbo engakumbi ngakuSirayeli ngokuhlambela iSabatha.”

¹⁹Kwathi ukuhlwa emasangweni aseYerusalem ngaphambi kweSabatha, ndayalela ukuba iingcango zivalwe, zingavulwa de iphele iSabatha. Ndamisa abanye babakhonzi bam emasangweni ukuze kungangeni mthwalo ngeSabatha. ²⁰Kwakanye nakabini abarhwebi nabathengisi beentlobo zonke zempahla balala ngaphandle kweYerusalem. ²¹Ndaza ndabalumkisa, ndathi: “Kungani na ukuba nilale ngasodongeni? Ukuba niyakuphinda, ndiya kunibeka izandla.” Ukususela ngelo xesha, abaphindanga beza ngeSabatha. ²²Ndaza ndabayala abaLevi ukuba bazihlambulule, beze bagcine amasango, bayingcwalise imini yeSabatha. Ndikhumbule nangale nto, Bawo wam, undiyeke ngokobukhulu benceba yakho.

²³Ngaloo mihla ndababona kananjalo amaYuda awayezeke abafazi baseAshdode, nabakwaAmon, namaMowabhikazi. ²⁴Isiqingatha sabantwana babo sasithetha ulwimi lwaseAshdode, nokuba lolwesinye isizwe, singakwazi ukuthetha ulwimi lwakwaYuda. ²⁵Ndaza ndabakhalimela, ndabaqalekisa, ndawabetha amanye amadoda, ndawancothula iinwele zawo. Ndabafungisa ngoBawo wethu, ndathi: “Ningazinikeli iintombi zenu koonyana babo, ningabathabatheli iintombi zabo oonyana benu nani ngokwenu. ²⁶Ingaba imitshato enje ayimenzanga wona na uSolomon ukumkani wakwaSirayeli? Phakathi kweentlanga ezininzi kwakungekho ukumkani owayelingana naye; uBawo wethu wayemthanda, waza uBawo wethu wamenza ukumkani kuSirayeli wonke. Kanti noko abafazi basemzini bamkhokelela esonweni naye. ²⁷Ngaba simelwe siniphulaphule na, senze bonke obu bubi bukhulu, simeneze kuBawo wethu ngokuzeka abafazi basemzini?”

²⁸Omnye woonyana bakaYehoyada, unyana ka-Eliyashibhi umbingeleli omkhulu, wayengumkhwenyana kaSanbhalati umHoron, ngako oko ndamgxotha wemka kum. ²⁹Bakhumbule, Bawo wam, kuba babungcolisile ububingeleli, nomnqophiso wobubingeleli nabaLevi.

³⁰Ndaza ndabahlambulula kuyo yonke into yasemzini, ndabamisela izigxina zababingeleli nezabaLevi, elowo emsebenzini wakhe. ³¹Ndalungisa umnikelo weenkuni ngamaxesha amisiweyo, neentlahlela. Ndikhumbule, Bawo wam, ube nobubele kum.