Bou Mütshuong Bangentibü
Nehemia Persia Choba jungto ka sepeian longbüa, Tobiah seneibü Bou chaksiam thanshang khonga settibü, Levibü shuong haoeneibü nyaksinam akukoje lulueibü sek to sepeian hautibü, Sabbath lita nyaksinam jekbü aeibou longbü, hoba Jihuda langkei alauteibü nashousi kho haoei loukei. Haoei thung peisilei pendou wapan apbei hoba toukei thükto dangkei.
13 1Kho chaloua haoenei Mosa le mütshuong to ditko wekei, hoba Ammonbü ayingsi Moabbü aoeikei telamkei seneibü Bou kaman to atlabü dogo doan kibü ühüpbei, 2aishanga haoenei Israel shousi shuong to wentek hoba dei yoan ahaüyokei, lausikei haoen khulimbo khüklauokla shanga Balaam jekthetan phokei—khei yingsikei seneibü Bouei shedsikhau kho haülabü la sepeikei. 3Ladang mütshuongei ngühkhüm ditjinei, haoenei Israel ka küksithang phang kibü pendou bangtikei.
4Ho phaia, Eliashib ungshedbou, seneibü Bou chem thanshang shuong thüka yeitibü, Tobiah yoa nyangko kikei. 5Haoei hao shanga shemjang yaangbü che lamlekei, khünei haoenei youshou lembü, onang, lemshang chaksiam, hoba Levibü, chia laubü shuong hoba bakhün komlabü shuong la kubü youshou, ih haanbü hoba onang an phejan, hoba ungshedbou shanga lembü to limbo thanan phoko kikei. 6Ho tegü pendou kümbü jihsiphaia ngo Jerusalema akitei, aishanga Babilon Choba Artaxerxes po khujinto nyibüa ngo Choba jungto haukei. Longche phaia ngo Choba la longla hikei, 7Ngo Jerusalem to sepeijung longeikei, hoba Eliashibei seneibü Bou chem khonga hao shanga shemjang che küman, Tobiah shanga kümbü amaibü shanga ngekei. 8Ngo aeibou maang ngangkei, hoba ngei Tobiah chemdang peisilei pendou shemjang ka chem to jaangan attikei. 9Kheijinei ngei shemjang shuong saüenla sakkukei, hoba seneibü Bou chem chaksiam, youshou lembü hoba onang khünei phongaian phokei.
10Tokei ngei Levibü phejan haoen la akubü dogo ngekei, kheijinei kümsilei kümbü Levibü hoba chia laubü shuong mütpem weko lulueibü sek to satkei. 11Kheijinei ngei jaishou shuong to laukei, “Aila seneibü Bou chem nangletkei?” Kheijinei ngei Levi shuong louan kamtikei, hoba haoen lulueibü thuishang to phongaikei. 12Kheijinei Jihuda pendouei youshou, ih haanbü hoba onang an phejan thanshang to sungbakei. 13Ngei Shelemiah ungshedbou, Zadok dobou hoba Pedaiah Levibou thanshang thüka yeitikei, hoba Mattaniah shou Zaccur shou Hanan haoen to kümaleia; aishanga haoen mailemlabü kikei; haoeneibü kümsilei kho lulueibü jaisinasi Levibü la peisilei phejan janda kikei.
14Kü Bou, ho shanga ngo damentiashi; ngei kü Bou chem shanga hoba khübü khangenbü shanga kümbü maibü kümsilei temautiku.
15Kho jihsiphaia ngei Nounyet to Jihudaa mütshuong semlüh ih nitbü hapbei, hoba youshou shaang shaanga künan gadua künlekei, ih, semlüh, bhuk hoba on den lulu yoan, Nounyet to Jerusalem to künan loukei. Kheijinei kho chaloua ngei haoen to shausiyung yaakbü shanga maisho lenkei. 16Khünei kibü Tyre mütshuongei ngau hoba peisilei den lulu künan loukei, hoba Nounyet to Jihudabü shuong la, Jerusalema lolo yaakkukei. 17Kheijinei ngei Jihudabü yaangenbü shuong to laukei, “Kanei Nounyet shatiko, kümbü ho amaibü kümsilei ai ki? 18Kaneibü nyusibouei ho akümbo lo, hoba seneibü Bouei sen thüka hoba ho sangnyu thüka ho thushed pendou akümbo lo? Tou kanei Nounyet aweasüngko Israel thüka toukei juongbou maangshat jinda.”
19Kheijinei Nounyet shaanga Jerusalem bakou nakthüh kijinei, ngei koukap khinashi, hoba Nounyet penkei shongko kho aipjan dogo ngühkhüm kukei. Nounyet ka on atla shanga ngei kü khangenbü shuong yoka atei bakoua lotikei. 20Chenei ayingsi nyinei namseibü shuong hoba nyaksinam weko yambü shuong Jerusalem jungka otkei. 21Kheijinei ngei haoen to huiletkei laukei, “Kanei aila kümthang junga sühda? Kanei nyibou kümalonga, ngei kan to ik shatlabü.” Khünei ka tham, haoen Nounyet ka alou. 22Kheijinei ngei Levi shuong to haoen lolo saüenla hoba louan bakou lomla hoba Nounyet saopotham phola sakkukei. Kü Bou, ho ngo shanga tokei damenashi, hoba kaibü yaangbü üeisanou danko ngo to onoukaima.
23Khübü jiha ngei tokei Ashdodbü, Ammonbü hoba Moabbü yaksa shuong lebü Jihudabü shuong hapbei. 24Haoeneibü shousi shuong jamde Ashdodbü ngühyema lenkei, ayingsi lubü mütli ngühyema, hoba Jihuda ngühyema lenla ange. 25Kheijinei ngei haoen to thangetkei, haoen khaukei, bousu shuong yoka atei wapbei, hoba haoeneibü khulou phenyobei. Ngei haoen to seneibü Bou nyena theyolanyotikei, “Kanei kaneibü nouyangnyu shuong haoeneibü shou shanga akujan, ayingsi haoeneibü nouyangnyu kaneibü shou shanga ayingsi kan lolo shanga alejan. 26Habü tegü yaksa lembüei Israel Choba Solomon to shabü attikei aying lo? Juongbü phangshuong yoa hao tegü Choba che akitei; seneibü Bouei hao sanoukei, hoba seneibü Bouei hao Israel pendou thüka Choba yeitikei. Khei yingsikei küksithang yaksa shuongei haokei shabü atla letikei. 27Küksithang yaksa shuong leko seneibü Bou yoa mailem leiluko, senei kan to ditko ho yaangbü amaibü pendou kümla sai?”
28Thükkabou ungshedbou Eliashibeibü shou Jehoiadaeibü shou che Horonbü Sanballateibü nouyangnyu che lebou kikei, khoei ngei hao kü jungka shian sattikei. 29Kü Bou, haoen damenashi, aishanga haoenei ungshed kümsilei, hoba ungshed si Levibü theyolanyobü shatikei.
30Kheijinei ngei haoen küksithang peisilei pendou ka saüenkukei, hoba ngei ungshedbou hoba Levi shuong to, mütpem weko la jembü kümsilei, phokukei. 31Ngei leiluan kibü jih ka bu lembü, hoba shaangbü buhek, phokei. Kü Bou, ngo maangshikko damenashi.
