Saamu 58

58 ¹Ṣé ẹ̀yin olórí ha ń pàṣẹ ohun tí ó tọ́ nítòótọ́? Ṣé ẹ̀yin ń ṣe ìdájọ́ àwọn ọmọ ènìyàn pẹ̀lú òdodo? ^a a v1 “Má Pa Run” ni orúkọ orin tí a fi kọ Sáàmù yìí. ²Rárá, ní ọkàn yín ni ẹ̀yin ti ń pète àìṣòdodo; ọwọ́ yín sì ń pín ìwà ipá ká gbogbo ilẹ̀ náà. ³Àwọn ènìyàn búburú ti yapa láti inú ìyá wá; wọ́n ṣìnà láti ìgbà ìbí, wọ́n ń sọ irọ́. ⁴Oró wọn dàbí oró ejò, bíi paramọ́lẹ̀ adití tí ó di etí rẹ̀, ⁵kí ó má bàa gbọ́ ohùn àwọn tí ń pe ejò, tàbí ti aláfọ̀ṣẹ alárékérekè náà. ⁶Baba wa, fọ́ eyín tí ń bẹ ní ẹnu wọn; fa eyín àwọn ọmọ kìnnìún tu, Baba wa! ⁷Jẹ́ kí wọ́n parẹ́ bí omi tí ń sàn lọ; nígbà tí Baba wa bá fa ọfà rẹ̀, jẹ́ kí wọ́n dàbí ohun tí a gé kúrú. ⁸Bíi ìgbín tí ń yọ́ dànù bí ó ti ń rìn, bíi ọmọ tí a bí ní òkú tí kì yóò rí oòrùn láéláé. ⁹Kí ìkòkò yín tó mọ ooru ẹ̀gún, yálà ó tútù tàbí ó jóná, òun yóò gbá wọn lọ. ¹⁰Àwọn olódodo yóò yọ̀ nígbà tí wọ́n bá rí tí a ṣe ìdájọ́; wọn yóò wẹ ẹsẹ̀ wọn nínú ẹ̀jẹ̀ àwọn ènìyàn búburú. ¹¹Àwọn ènìyàn yóò sì wí pé, “Nítòótọ́, èrè wà fún olódodo; nítòótọ́, Baba wa ń ṣe ìdájọ́ ayé.”