Hiak swak thang rwe
Chongdip

Sa Maknu Bapuba Rwan

Laa kai bariknu lang: “To braan mako” diga laa khou sinnu. David om. Kachaak Kalum Laa.

Chong kasemnupa rwan, bazenu riak bina kasao kabao daan thounu nun lang chongtan gaye. Bani ga brun amnu, charut rwan om khwan ngaisu lat maaknu kana setnu cobra danga diga rinne. Kalumnu ga bani bao sung bi amnu ngaa bing ding bwei rop thang lang ngaiye, atiga mi nunna ani Pa na talei ram ding chong kasemme diga bakhangsungka rin ngamlune.

Bung 58.

Nani bapuba rwan ga, nanina bazenu chwan ding batakka chongtan pi swak ongnubo? Nanina misa sa rwan ding bazenu toga chong kasemnubo? a a v1 “To braan mako” heiya hei Kalum Laa laa tonu laakhwan om bameng gaye. Make, nani sung bi nanina sa maknu chong katu rwe; nani kutna talei ram bariak bing bi kasao kabao daan thou nge. Sa maknu nun ga bonpui sung bina impaan drwe; bani pon kaanna lampui maanluga, mun kabia ongme. Bani brun ga barun om brun danne, bakana sinnu kana setnu cobra danne, hagana charut rwan om khwan khatle rou sianu bahak charut om khwan ngaisu laye. He ani Pa, bani bao sung bi amnu ngaa bing ding bwei rop thang ngo; ani Pa, takhu krwang swan bing om ngaa ding tanchat thang ngo! Bani ga pak lan thounu tui danga daan thou dam ding ngo; ani Pa na Baom thanthing kai damnu kaan bi, bani ding pi toi thang ngo. Se thou damga batui damnu snail danga, pon kaanna thi swaknu naosen danga, haga lumik hakza mu latla rwe. Nani ben bingna kaling om mei kaphuk khaang ngam makka ong bi, haga ring ngaakle rou ongle, Maanna bani ding namga lwak swaklune. Ririak senu nun ga karolune; bani ga bazenu chongsem kasem thangnu ding munu kaan bi, sa maknu nun om thi bina bani ket bing ding bathiang thanglune. Atiga mi nunna rinlune, “Batak takka ririak senu nun lang taswan amme; batak takka ani Pa na talei ram ding chong kasemme.”