Dusto Cholawnia khan
Gana cholawnia nimite: “Nosto nakoribi” laga sur te. David laga. Ekta sonalni geet.
Bichar kora manuh khan laga biruddh te ekta dosh, jun khan bichar asan pora atyachar bati dei. Taikhan ke bish thaka koi, kala saap nisena jun saap nachai thaka laga sur huni bole namane. Prarthana tai khan laga dant khan bhangai dibole mange, titia manuh khan saf koi kene kobo pare je amar Pitri prithibi ke bichar kore.
58 1Tumikhan cholawnia khan, hosa pora thik kotha hukum diye naki? Manuh laga bacha khan ke nyay pora bisar kore naki? a a v1 “Nosto nakoribi” tu eitu geet gaa thaka sur laga nam ase. 2Nohoi, tumikhan laga mon te biya kaam bhabe; tumikhan laga hath khan pora prithibi te julum borhai diye. 3Dusto khan peth pora alag hoi ase; tarkhan jonom pora misa koi kene bhul rasta te jai. 4Tarkhan laga bikh tu saph laga bikh nisena ase, nijor kan bondh kora behira naag nisena, 5eneka pora saph khel kora khan laga, nahole chalaki jadu kora laga awaj tu nahunibo. 6O amar Pitri, tarkhan laga mukh te thaka daat khan bhangai dibi; jawan singho khan laga daat khan ulai phelabi, amar Pitri! 7Tarkhan boi jaa pani nisena harai jabi; amar Pitri pora Tar tir khan maare homoi te, tarkhan kati phela hobi. 8Berai thaka homoi te gali jaa shamuk nisena, mori kene jonom hua bacha nisena, kun kitia bhi suryo nadikhe. 9Tumikhan laga handi khan kata laga gorom nabujha age te, kacha hoilebi julikena thaka hoilebi, Tar pora tarkhan ke uraikene loijabo. 10Dharmik khan nyay kora dikhile anand koribo; tarkhan dusto khan laga khoon te nijor theng khan dhuwabo. 11Aru manuh khan kobo, “Hosa pora dharmik khan nimite inam ase; hosa pora amar Pitri pora prithibi ke bisar kore.”