Me basika na mukanda
Dibuku

Bamfumu ya yimbi

Samu na mfumu ya bayimbidi: ba yimbisa yawu na musiku «Kumwangisa ve». Nkunga ya Davidi. Nkunga ya wolo.

Kufunda samu na bazuzi yina ke kabula mambu ya ngolo na kiti ya lufundusu. Ba ke binga bawu bonso banyoka, ya makutu ya kufwa bonso mpidi yina ke manga ndinga ya muntu yina ke loka banyoka. Lusambulu ke lomba ti ba pasula meno ya bawu, samu ti bantu lenda tuba na pwelele ti Tata ya beto ke fundisa ntoto.

Kapu 58.

Beno bamfumu, keti ya tsyelika beno ke zonzaka mambu ya kudedama? Keti beno ke fundisaka bana ya bantu na ludedomo? a a v1 «Kumwangisa ve» kele nkumbu ya musiku yina ba yimbilaka nkunga yayi. Ve, na bantima ya beno, beno ke yidikaka mambu ya yimbi; maboko ya beno ke kabulaka mambu ya ngolo na yinsi ya muvimba. Bantu ya yimbi kele banzenza banda na kivumu; bawu ke kwendaka yima-yima banda na mbutukulu, bawu ke tubaka luvunu. Misa ya bawu kele mutindu misa ya nyoka, mutindu mpidi yina kele na makutu ya kufwa, yina ke kangaka dikutu ya yawu, samu ti yawu kuwa ve ndinga ya bantu yina ke lokaka banyoka, to ndinga ya muntu ya mayela yina ke lokaka. Tata ya beto, pasula meno na bayinwa ya bawu; katula meno ya ngolo ya bankosi ya bana, Tata ya beto! Bika ti bawu kuzimbana mutindu maza yina ke kwendaka; ntangu Tata ya beto ke losaka madyonga ya yandi, bika ti yawu kuvwanda ya kuzenga. Mutindu nkole yina ke bolaka ntangu yawu ke tambulaka, mutindu mwana yina ba butaka ya kufwa, yina ke tala ntangu ata fyoti ve. Na ntwala banzungu ya beno kuwa tiya ya bayinti ya bansende, ata yawu kele moyo to yawu me lema, yandi ke mwangisa bawu. Bantu ya kudedama ke yangalala ntangu bawu ke mona ludedomo me salama; bawu ke sukula makulu ya bawu na menga ya bantu ya yimbi. Mpe bantu ke tuba: «Ya tsyelika, musendo kele samu na bantu ya kudedama; ya tsyelika, Tata ya beto ke fundisaka ntoto.»