Nzila yina yisi monika yasonga
Yisi tadila bweti batu bisi tesila mbi ni nswalu, bawu-meni phi. Yenina nzila yina yisi monika yasonga kwena mutu, kaasi tsuka yandi yenina lufwa; museki wisi kwikila byosu, amana kiseyu kilenda fuka phasi yina munzenza kazaya ku. Mu mambu ma batu, dyenina dya ngolu: batsukami bisi lewulwa ata kwena bankhundi bawu.
14 1Mukhetu wa ngangu wisi tunga nzu yandi, kaasi buzoba bwisi vwadingisa nzu yandi yi moku mandi meni. 2Wuna wisi kangala mu masonga wisi zitisa Tata wetu, kaasi wuna nzila zandi za khonda wisi mulewula. 3Munwa wa zoba wenina fimbu kikuma kya lulendu lwandi meni, kaasi malebu ma batu badimuka misi keba bawu. 4Kuna kwisiku bangombi, bangwa yanánga konda mvindu, kaasi madya ma lawu masi tuka mu ngolu za ngombi. 5Kimbangi kya kwikama kisiku huna, kaasi kimbangi kya luvunu kisi zonza luvunu. 6Museki wisi sanda ngangu kaasi kisiku mona, kaasi nzayilu yisi monika mboti-mboti kwena batu badimuka. 7Katuka kwena zoba, mukuma nzayilu yisiku monika ha malebu mandi. 8Ngangu za mutu wadimuka yenina mu kubakula nzila yandi, kaasi buzoba bwa bilawu bwenina bukamvi. 9Bilawu bisi seya mulambu wa masumu, kaasi hana kati dya batu ba masonga mwenina khenda. 10Mbundu yisi zaya khadi yandi meni, amana ka munzenza ku kafwana kota mu kyesi kyandi. 11Nzu ya batu ba mbi yazíluka, kaasi ntente dya batu ba masonga dyamena. 12Yenina nzila yina yisi monika yasonga kwena mutu, kaasi tsuka yandi yenina nzila ya lufwa. 13Ata mu kiseyu, mbundu yilenda mona phasi, amana tsuka ya kyesi yilenda kala kyadi. 14Mutu wuna mbundu yandi yisi ditotisa kabasa yi mimbutu mya nzila zandi, amana mutu wa mboti kabasa yi mimbutu myandi meni. 15Mutu wa khunda wisi kwikila kyosu kima, kaasi mutu wadimuka wisi banza bitambi byandi. 16Mutu wa ngangu wisi yuka bweya amana wisi katuka mu mbi, kaasi zoba wenina yi kisakasaka amana wisi ditsikisila. 17Mutu wa khabu za nswalu wisi sala buzoba, amana wuna wisi kasa bimeka bya mbi wisi mengwa. 18Batu ba khunda bisi tambula buzoba, kaasi batu badimuka bavwatiswa mukhonzi wa nzayilu. 19Batu ba mbi bafukama ku thwala ya batu ba mboti, amana batu ba mbi bafukama ha mielu mya batu ba masonga. 20Mutsukami wisi menwa ata kwena bakwa mukombu wandi, kaasi mukwa kuvwa wenina yi biwutu bya lawu. 21Wuna wisi saba mukwa mukombu wandi wisi sala disumu, kaasi kyesi kwena wuna wisi songila batsukami khenda. 22Babana bisi kasa mbi, ka bisi ditotisa ku? Kaasi khenda yi kwikama byenina bya babana bisi banza mamboti. 23Mu kisalu kyosu kya ngolu mwenina lufutu, kaasi phandi za phamba zisi nata kaka ku kiphutu. 24Mukhonzi wa batu badimuka wenina kuvwa kwa bawu, kaasi buzoba bwa bilawu bwisi buta kaka buzoba. 25Kimbangi kya kyedika kisi hulula myoya, kaasi wuna wisi zonza luvunu wisi lambula bakwawu. 26Mu kuzitisa Tata wetu mwenina kivuvu kya ngolu, amana bana bandi bakála yi kiswaminu. 27Kuzitisa Tata wetu kwenina nto ya luzingu, kwisi katula mutu mu mitambu mya lufwa. 28Mulumba-lumba wa batu wenina khembu kya kyamvu, kaasi konda batu, pfumu wisi vwadingisama. 29Wuna wisi lemba mu kuyuka khabu wenina ngangu za lawu, kaasi mukwa khabu za nswalu wisi téndisa buzoba. 30Mbundu ya talala yisi hana luzingu ku lutu, kaasi kiphala kyisi bolisa mifufwa. 31Wuna wisi monisa batsukami phasi wisi lewula Tata wetu, mubumbi wa bawu, kaasi wuna wisi songila buweti kwena wuna wenina mu phasi wisi muzitisa. a a v31 Kusadila batsukami mambu ma mbi, disongidila kuléwula Tata wuna wábahanga; kosu mutu wenina mu phasi wenina yi luzitu lwa kisalu kya moku mandi. 32Batu ba mbi bisi bwa mu mbi za bawu-meni, kaasi batu ba masonga bisi mona kiswaminu ha muna lufwa. 33Ngangu zisi vunda muna mbundu ya mutu wadimuka, kaasi keti ha kati dya bilawu zisi dizayikisa. 34Masonga masi tombula kanda, kaasi disumu dyenina tsoni kwena kanda dyosu. 35Khenda za kyamvu zisi vunda hana thandu ya musadi wadimuka, kaasi khabu zandi zisi bwila wuna wisi sala mambu ma tsoni.
