ዘሑልቍ 1 FHB Father's Heart Bible™

1 ¹ኣቦና ኣብ በረኻ ሲና ኣብ መራኸቢ ድንኳን፥ ካብ ምድሪ ግብፂ ምስ ወፁ ብኻልኣይ ዓመት ብኻልኣይ ወርሒ ብቐዳመይቲ መዓልቲ፥ ንሙሴ ኸምዙይ ኢሉ ተዛረቦ፦

²“ንዅሉ ማሕበር ደቂ እስራኤል፥ በብዓሌቶምን በብማይ ቤቶምን፥ ኵሎም ተባዕትዮ በብስሞም ርእሲ ብርእሲ ቍፀርዎም። ³ኣብ እስራኤል ዘሎ ዕድመኡ ካብ ዕስራ ዓመት ንላዕሊ ዝኾነ፥ ኣብ ውግእ ክወፍር ዝኽእል ኵሉ፥ ንስኻን ኣሮንን በብሰራዊቶም ቍፀርዎም። ⁴ካብ ነፍሲ ወከፍ ነገድ ሓደ ሰብኣይ ምሳኻ ይኹን፤ ነፍሲ ወከፍ ድማ ናይ ማይ ቤቱ ርእሲ ይኹን።

⁵“ስም እቶም ምሳኻ ደው ዝብሉ ሰባት ከዓ እዚኣቶም እዮም፦ ካብ ሮቤል፥ ኤሊሱር ወዲ ሰዲዮር።

⁶“ካብ ስምኦን፥ ሰለሚኤል ወዲ ሱሪሳዳይ፥

⁷“ካብ ይሁዳ፥ ነኣሶን ወዲ ኣሚናዳብ፥

⁸“ካብ ይሳኮር፥ ናትናኤል ወዲ ሶገር፥

⁹“ካብ ዛብሎን፥ ኤልያብ ወዲ ኬሎን፥

¹⁰“ካብ ደቂ ዮሴፍ፦ ካብ ኤፍሬም፥ ኤሊሳማ ወዲ ዓሚሁድ፤ ካብ ምናሴ ኸዓ፥ ገማልኤል ወዲ ፍዳሱር፥

¹¹“ካብ ብንያም፥ ኣቢዳን ወዲ ጋዴዮን፥

¹²“ካብ ዳን፥ ኣኪዔዘር ወዲ ዓሚሳዳይ፥

¹³“ካብ ኣሴር፥ ፋግኤል ወዲ ዖክራን፥

¹⁴“ካብ ጋድ፥ ኤልያሳፍ ወዲ ራጉኤል፥

¹⁵“ካብ ንፍታሌም፥ ኣኪሬ ወዲ ዔናን እዮም።

¹⁶“እዚኣቶም እቶም ካብ ማሕበር እተፀውዑ፥ ሹመኛታት ነገዳት ኣቦታቶም፥ ርእስታት ዓሌታት እስራኤል ነበሩ።”

¹⁷ሙሴን ኣሮንን ድማ ነዞም ብስሞም እተጠቕሱ ሰባት ወሰድዎም፥ ¹⁸ብኻልኣይ ወርሒ ብቐዳመይቲ መዓልቲ ኸዓ ንዅሉ ማሕበር ኣከብዎ። እቲ ህዝቢ ድማ በብዓሌቶምን በብማይ ቤቶምን ትውልዶም ኣመዝገቡ፤ ዕድመኦም ካብ ዕስራ ዓመት ንላዕሊ ዝኾኑ ኵሎም ተባዕትዮ በብስሞም ሓደ ብሓደ ተፀሓፉ፥ ¹⁹ከምቲ ኣቦና ንሙሴ ዝኣዘዞ፥ ሙሴ ኸዓ ኣብ በረኻ ሲና ቘፀሮም።

²⁰ካብ ደቂ ሮቤል፥ በዅሪ እስራኤል፥ በብዓሌቶምን በብማይ ቤቶምን በብስሞም ዝተፅሓፉ፥ ዕድመኦም ካብ ዕስራ ዓመት ንላዕሊ ዝኾኑ ኣብ ውግእ ክወፅኡ ዝኽእሉ ኵሎም ተባዕትዮ፥ ²¹እቶም ካብ ነገድ ሮቤል ዝተቘፀሩ ኣርብዓን ሽዱሽተን ሽሕን ሓሙሽተ ሚእትን ነበሩ።

²²ደቂ ስምኦን፥ በብዓሌቶምን በብማይ ቤቶምን በብስሞም ርእሲ ብርእሲ ዝተቘፀሩ፥ ዕድመኦም ካብ ዕስራ ዓመት ንላዕሊ ዝኾኑ ኣብ ውግእ ክወፅኡ ዝኽእሉ ኵሎም ተባዕትዮ፥ ²³እቶም ካብ ነገድ ስምኦን ዝተቘፀሩ ሓምሳን ትሽዓተን ሽሕን ሰለስተ ሚእትን ነበሩ።

²⁴ካብ ደቂ ጋድ፥ በብዓሌቶምን በብማይ ቤቶምን በብስሞምን፥ ዕድመኦም ካብ ዕስራ ዓመት ንላዕሊ ዝኾኑ ኣብ ውግእ ክወፅኡ ዝኽእሉ ኵሎም ተባዕትዮ፥ ²⁵እቶም ካብ ነገድ ጋድ ዝተቘፀሩ ኣርብዓን ሓሙሽተን ሽሕን ሽዱሽተ ሚእትን ሓምሳን ነበሩ።

²⁶ደቂ ይሁዳ፥ በብዓሌቶምን በብማይ ቤቶምን በብስሞም ዝተፅሓፉ፥ ዕድመኦም ካብ ዕስራ ዓመት ንላዕሊ ዝኾኑ ኣብ ውግእ ክወፅኡ ዝኽእሉ ኵሎም ተባዕትዮ፦ ²⁷እቶም ካብ ነገድ ይሁዳ ዝተቘፀሩ ሰብዓን ኣርባዕተን ሽሕን ሽዱሽተ ሚእትን ነበሩ።

²⁸ደቂ ይሳኮር፥ በብዓሌቶምን በብማይ ቤቶምን በብስሞም ዝተፅሓፉ፥ ዕድመኦም ካብ ዕስራ ዓመት ንላዕሊ ዝኾኑ ኣብ ውግእ ክወፅኡ ዝኽእሉ ኵሎም ተባዕትዮ፦ ²⁹እቶም ካብ ነገድ ይሳኮር ዝተቘፀሩ ሓምሳን ኣርባዕተን ሽሕን ኣርባዕተ ሚእትን ነበሩ።

³⁰ደቂ ዛብሎን፥ በብዓሌቶምን በብማይ ቤቶምን በብስሞም ዝተፅሓፉ፥ ዕድመኦም ካብ ዕስራ ዓመት ንላዕሊ ዝኾኑ ኣብ ውግእ ክወፅኡ ዝኽእሉ ኵሎም ተባዕትዮ፥ ³¹እቶም ካብ ነገድ ዛብሎን ዝተቘፀሩ ሓምሳን ሸውዓተን ሽሕን ኣርባዕተ ሚእትን ነበሩ።

³²ካብ ደቂ ዮሴፍ፥ ደቂ ኤፍሬም፥ በብዓሌቶምን በብማይ ቤቶምን በብስሞም ዝተፅሓፉ፥ ዕድመኦም ካብ ዕስራ ዓመት ንላዕሊ ዝኾኑ ኣብ ውግእ ክወፅኡ ዝኽእሉ ኵሎም ተባዕትዮ፥ ³³እቶም ካብ ነገድ ኤፍሬም ዝተቘፀሩ ኣርብዓ ሽሕን ሓሙሽተ ሚእትን ነበሩ።

³⁴ደቂ ምናሴ፥ በብዓሌቶምን በብማይ ቤቶምን በብስሞም ዝተፅሓፉ፥ ዕድመኦም ካብ ዕስራ ዓመት ንላዕሊ ዝኾኑ ኣብ ውግእ ክወፅኡ ዝኽእሉ ኵሎም ተባዕትዮ፦ ³⁵እቶም ካብ ነገድ ምናሴ ዝተቘፀሩ ሰላሳን ክልተን ሽሕን ክልተ ሚእትን ነበሩ።

³⁶ካብ ደቂ ብንያም፥ በብዓሌቶምን በብማይ ቤቶምን በብስሞም ዝተፅሓፉ፥ ዕድመኦም ካብ ዕስራ ዓመት ንላዕሊ ዝኾኑ ኣብ ውግእ ክወፅኡ ዝኽእሉ ኵሎም ተባዕትዮ፦ ³⁷እቶም ካብ ነገድ ብንያም ዝተቘፀሩ ሰላሳን ሓሙሽተን ሽሕን ኣርባዕተ ሚእትን ነበሩ።

³⁸ካብ ደቂ ዳን፥ በብዓሌቶምን በብማይ ቤቶምን በብስሞም ዝተፅሓፉ፥ ዕድመኦም ካብ ዕስራ ዓመት ንላዕሊ ዝኾኑ ኣብ ውግእ ክወፅኡ ዝኽእሉ ኵሎም ተባዕትዮ፦ ³⁹እቶም ካብ ነገድ ዳን ዝተቘፀሩ ስሳን ክልተን ሽሕን ሸውዓተ ሚእትን ነበሩ።

⁴⁰ደቂ ኣሴር፥ በብዓሌቶምን በብማይ ቤቶምን በብስሞም ዝተፅሓፉ፥ ዕድመኦም ካብ ዕስራ ዓመት ንላዕሊ ዝኾኑ ኣብ ውግእ ክወፅኡ ዝኽእሉ ኵሎም ተባዕትዮ፥ ⁴¹እቶም ካብ ነገድ ኣሴር ዝተቘፀሩ ኣርብዓን ሓደን ሽሕን ሓሙሽተ ሚእትን ነበሩ።

⁴²ደቂ ንፍታሌም በብዓሌቶምን በብማይ ቤቶምን፥ ብስም እናተቘፀሩ፥ ካብ ዕስራ ዓመት ንላዕሊ ዝኾኑ ንውግእ ዝበቅዑ ዅሎም ተባዕትዮ፥ ⁴³እቶም ካብ ነገድ ንፍታሌም ዝተቘፀሩ ሓምሳን ሰለስተን ሽሕን ኣርባዕተ ሚእትን ነበሩ።

⁴⁴ሙሴን ኣሮንን ዓሰርተ ኽልተ ሹመኛታት እስራኤልን ድማ ነዞም ሰባት እዚኣቶም፥ ነፍሲ ወከፍ ንማይ ቤቱ ቘፀርዎም። ⁴⁵ኵሎም ደቂ እስራኤል በብማይ ቤቶም ተቘፀሩ፤ ካብ ዕስራ ዓመት ንላዕሊ ዝኾኑ፥ ኣብ ሰራዊት እስራኤል ከገልግሉ ዝኽእሉ ዅሎም ተባዕትዮ። ⁴⁶ኵሎም እቶም ዝተቘፀሩ ሽዱሽተ ሚእትን ሰለስተን ሽሕን ሓሙሽተ ሚእትን ሓምሳን ኮኑ።

⁴⁷ሌዋውያን ግና በቲ ነገድ ኣቦታቶም ኣብ ማእኸሎም ኣይተቘፀሩን። ⁴⁸ኣቦና ንሙሴ ከምዙይ ኢሉ ተዛሪብዎ ነበረ እሞ፦

⁴⁹“ንነገድ ሌዊ ኣይትቘፅሮ፤ ኣብ ማእኸል ደቂ እስራኤልውን ኣይትፅሓፎም። ⁵⁰ደኣ ንሌዋውያን ኣብ ልዕሊ ድንኳን ምስክርን ኵሉ ኣቑሑኡን ኣብ ዘለዎ ዅሉን ሓለፍቲ ግበሮም። ንሳቶም ነቲ ድንኳንን ኣቑሑኡን ይፀርዎ፥ የገልግልዎ፥ ኣብ ዙርያኡ ድማ ይስፈሩ። ⁵¹እቲ ድንኳን ክግዕዝ እንተሎ፥ ሌዋውያን የፍርስዎ፤ ክትከል እንተሎ ኸዓ ሌዋውያን የቕሙዎ። ዝቐረበ ኻልእ ሰብ ድማ ይቀተል። ⁵²ደቂ እስራኤል ነፍሲ ወከፍ በብሰፈሩ፥ ነፍሲ ወከፍ ኣብ ትሕቲ ሰንደቕ ዕላማኡ፥ በብሰራዊቶም ይስፈሩ። ⁵³ሌዋውያን ግና፥ ኣብ ልዕሊ ህዝቢ እስራኤል ቍጥዓ ኸይወርድ፥ ኣብ ዙርያ ድንኳን ምስክር ይስፈሩ፤ ሌዋውያን ድማ ንድንኳን ምስክር ይሓልውዎ።”

⁵⁴ደቂ እስራኤል ድማ ከምቲ ኵሉ ኣቦና ንሙሴ ዝኣዘዞ ገበሩ፤ ከምኡ ድማ ገበሩ።