Eyasentlango 1 FHB Father's Heart Bible™

1 ¹UBawo wethu wathetha kuMoses entlango yaseSinayi, ententeni yokuhlangana, ngemini yokuqala yenyanga yesibini yomnyaka wesibini emva kokuphuma kwabo ezweni laseYiputa. Wathi:

²Balani ibandla lonke loonyana bakaSirayeli, ngokwemizalwane yabo, ngokwezindlu zooyise, into yonke eyindoda ngenani lamagama, intloko nentloko. ³Balani bonke abakwaSirayeli abaminyaka imashumi mabini ezelwe banyuse, bonke abaphuma umkhosi; wena noAron nobabala ngokwemikhosi yabo. ⁴Indoda esizweni ibe nye yoba nani, ibe nye inkulu yendlu kayise.

⁵La ngamagama amadoda aya kuma kunye nawe: kwaRubhen, nguElitsure unyana kaShedeyure.

⁶KwaSimon, nguShelumiyeli unyana kaTsurishadayi;

⁷KwaYuda, nguNashon unyana ka-Aminadabhi;

⁸KwaIsakare, nguNataniyeli unyana kaTsuhare;

⁹KwaZebhulon, nguEliyabhi unyana kaHelon;

¹⁰Koonyana bakaYosefu: kwaEfrayim, nguElishama unyana ka-Amihude; kwaManase, nguGamaliyeli unyana kaPedatsure;

¹¹KwaBhenjamin, nguAbhidan unyana kaGidiyoni;

¹²KwaDan, nguAhiyezere unyana ka-Amishadayi;

¹³Kwa-Ashere, nguPagiyeli unyana kaOkran;

¹⁴KwaGadi, nguEliyasafu unyana kaDehuweli;

¹⁵KwaNafetali, nguAhira unyana kaEnan.

¹⁶Ngabo abo ababiziweyo bebandla, izikhulu zezizwe zooyise, iintloko zamawaka akwaSirayeli.

¹⁷Bawathabatha ke ooMoses noAron la madoda abechazwe ngamagama, ¹⁸ngemini yokuqala yenyanga yesibini bahlanganisa ibandla lonke. Abantu babhala umlibo wokuzalwa kwabo ngokwemizalwane yabo, ngokwezindlu zooyise, into yonke eyindoda eminyaka imashumi mabini ezelwe inyuse, ngenani lamagama, intloko nentloko, ¹⁹njengoko uBawo wethu abemwisele umthetho uMoses. Wababala ke entlango yaseSinayi.

²⁰Koonyana bakaRubhen, owamazibulo akwaSirayeli: ababalwa ngokwemizalwane yabo, ngokwezindlu zooyise, ngenani lamagama, into yonke eyindoda eminyaka imashumi mabini ezelwe inyuse, enako ukuphuma umkhosi. ²¹Ababalwayo kubo esizweni sakwaRubhen baba ngamashumi omane anamathandathu amawaka, anamakhulu mahlanu.

²²Koonyana bakaSimon, ngokwemizalwane yabo, ngokwezindlu zooyise, ababalwa ngenani lamagama, intloko nentloko: into yonke eyindoda eminyaka imashumi mabini ezelwe inyuse, enako ukuphuma umkhosi. ²³Ababalwayo kubo esizweni sakwaSimon baba ngamashumi omahlanu anesithoba amawaka, anamakhulu mathathu.

²⁴Koonyana bakaGadi: ngokwemizalwane yabo, ngokwezindlu zooyise, ngenani lamagama, into yonke eyindoda eminyaka imashumi mabini ezelwe inyuse, enako ukuphuma umkhosi. ²⁵Ababalwayo kubo esizweni sakwaGadi baba ngamashumi omane anamahlanu amawaka, anamakhulu mathandathu anamanci mahlanu.

²⁶Koonyana bakaYuda, ababalwa ngokwemizalwane yabo, ngokwezindlu zooyise, ngenani lamagama, into yonke eyindoda eminyaka imashumi mabini ezelwe inyuse, enako ukuphuma umkhosi: ²⁷ababalwayo kubo esizweni sakwaYuda baba likhulu lamawaka, anamanci asixhenxe anamane amawaka, anamakhulu mathandathu.

²⁸Koonyana bakaIsakare, ababalwa ngokwemizalwane yabo, ngokwezindlu zooyise, ngenani lamagama, into yonke eyindoda eminyaka imashumi mabini ezelwe inyuse, enako ukuphuma umkhosi: ²⁹ababalwayo kubo esizweni sakwaIsakare baba ngamashumi omahlanu anamane amawaka, anamakhulu mane.

³⁰Koonyana bakaZebhulon: ababalwa ngokwemizalwane yabo, ngokwezindlu zooyise, ngenani lamagama, into yonke eyindoda eminyaka imashumi mabini ezelwe inyuse, enako ukuphuma umkhosi. ³¹Ababalwayo kubo esizweni sakwaZebhulon baba ngamashumi omahlanu anesixhenxe amawaka, anamakhulu mane.

³²Koonyana bakaYosefu, abakwaEfrayim: ababalwa ngokwemizalwane yabo, ngokwezindlu zooyise, ngenani lamagama, into yonke eyindoda eminyaka imashumi mabini ezelwe inyuse, enako ukuphuma umkhosi. ³³Ababalwayo kubo esizweni sakwaEfrayim baba ngamashumi omane amawaka, anamakhulu mahlanu.

³⁴Koonyana bakaManase, ababalwa ngokwemizalwane yabo, ngokwezindlu zooyise, ngenani lamagama, into yonke eyindoda eminyaka imashumi mabini ezelwe inyuse, enako ukuphuma umkhosi: ³⁵ababalwayo kubo esizweni sakwaManase baba ngamashumi omathathu anamabini amawaka, anamakhulu mabini.

³⁶Koonyana bakaBhenjamin, ababalwa ngokwemizalwane yabo, ngokwezindlu zooyise, ngenani lamagama, into yonke eyindoda eminyaka imashumi mabini ezelwe inyuse, enako ukuphuma umkhosi: ³⁷ababalwayo kubo esizweni sakwaBhenjamin baba ngamashumi omathathu anamahlanu amawaka, anamakhulu mane.

³⁸Koonyana bakaDan, ababalwa ngokwemizalwane yabo, ngokwezindlu zooyise, ngenani lamagama, into yonke eyindoda eminyaka imashumi mabini ezelwe inyuse, enako ukuphuma umkhosi: ³⁹ababalwayo kubo esizweni sakwaDan baba ngamashumi omathandathu anamabini amawaka, anamakhulu asixhenxe.

⁴⁰Koonyana baka-Ashere, ababalwa ngokwemizalwane yabo, ngokwezindlu zooyise, ngenani lamagama: into yonke eyindoda eminyaka imashumi mabini ezelwe inyuse, enako ukuphuma umkhosi. ⁴¹Ababalwayo kubo esizweni sakwa-Ashere ngamashumi amane anawakanye amawaka, anamakhulu mahlanu.

⁴²Oonyana bakaNafetali ngokwemizalwane yabo, ngokwezindlu zooyise, ababalwa ngenani lamagama, yonke into eyindoda ethabathela kominyaka emashumi mabini ezelwe inyuse, yonke into enokuphuma umkhosi. ⁴³Ababalwayo kubo esizweni sakwaNafetali ngamashumi amahlanu anamathathu amawaka, anamakhulu mane.

⁴⁴Ngabo abo babalwayo, awababalayo uMoses noAron, nezikhulu zakwaSirayeli ezilishumi elinambini, indoda nganye ngokwendlu kayise. ⁴⁵Bonke oonyana bakaSirayeli ababalwayo ngokwezindlu zooyise, bethabathela kominyaka emashumi mabini ezelwe banyuse, bonke abanokuphuma umkhosi kwaSirayeli, ⁴⁶Bonke abo babalwayo inani labo laba ngamakhulu omathandathu amawaka, namawaka amathathu, namakhulu mahlanu, namashumi mahlanu.

⁴⁷Ke abaLevi ngokwesizwe sooyise ababalelwanga phakathi kwabo. ⁴⁸Kuba uBawo wethu wayethethile kuMoses, esithi:

⁴⁹“Uze ungasibali isizwe sakwaLevi, ungalibali inani laso phakathi koonyana bakaSirayeli. ⁵⁰Kodwa baphathise abaLevi umnquba wesingqino, nempahla yawo yonke, neento zawo zonke. Baya kuthwala umnquba nempahla yawo yonke, bawugcine, bamise iminquba yabo bewujikelezile. ⁵¹Xa umnquba uqalisayo ukunduluka, abaLevi bowuwisa; xa umiswayo, abaLevi bowumisa. Owasemzini osukuba esondela makabulawe afe. ⁵²Oonyana bakaSirayeli boyimisa iminquba yabo, elowo emnqubeni wakhe, elowo ngakwibhanile yakhe, ngokwemikhosi yabo. ⁵³Ke bona abaLevi boyimisa iminquba yabo bewujikelezile umnquba wesingqino, kungabikho burhalarhume phezu kwebandla loonyana bakaSirayeli; abaLevi bosigcina isigxina somnquba wesingqino.”

⁵⁴Oonyana bakaSirayeli bakwenza konke oko uBawo wethu abekuwisele uMoses ngomthetho; benjenjalo kanye.