ዝተሰበረት ምድሪ፥ ሓደ እሙን እኳ የለን

ሚክያስ እቶም እሙናት ከም ዝጠፍኡ፥ ኣባላት ቤተሰብ እኳ ኽእመኑ ኸም ዘይከኣሉ ይብል። ካብኡ ተማጒቱ ኣይወፅእን፥ ይፅበ ደኣ። ወዲቐ እኳ እንተ ኾንኩ ክትስእ እየ። እቲ መፅሓፍ ድማ ከም ኣቦና ዝበለ መን እዩ፥ ንሓጢኣት ናብ ባሕሪ ዝድርቢ ኢሉ ብምሕታት ይውዳእ።

ምዕራፍ 7።

ወይለይ! ከምቲ ፍረ ሓጋይ ዝእክብ ሰብ እየ፥ ከምቲ ድሕሪ ዓፂድ ኣታኽልቲ ወይኒ ዝቕርም፥ ዝብላዕ ኣስካል የለን፥ ነፍሰይ እትምነዮ በዅሪ በለስ ከዓ የለን።

ፃድቕ ካብ ምድሪ ጠፊኡ፥ ኣብ ማእኸል እቶም ህዝቢ ድማ ቅኑዕ የለን፤ ኵሎም ደም ንምፍሳስ የድብዩ፥ ነፍሲ ወከፍ ድማ ንሓዉ ብመርበብ ይሃድኖ። ኣእዳዎም ክፉእ ንምግባር ብሉሓት እየን፦ እቲ ሹም ጉቦ ይሓትት፥ እቲ ዳኛ ድማ ዓስቢ ይቕበል፥ እቲ ሓያል ከዓ ዝደልዮ ይእዝዝ፤ ስለዙይ ኵሎም ብሓንሳእ ይመኻኸሩ። እቲ ካባታቶም ዝበለፀ ኸም እሾዅ እዩ፥ እቲ ዝቐንዐ ድማ ካብ ሓፁር እሾዅ ይገድድ። እታ ናትካ ዘብዐኛታት ዘጠንቀቑላ መዓልቲ፥ መዓልቲ መቕፃዕትኻ መፂኣ፤ ሕዚ ድንጋፀኦም ቀሪቡ ኣሎ። ብብፃይ ኣይትእመን፤ ብቐረባ ፈታዊኻ ኣይትተኣማመን፤ ነታ ኣብ ሕቑፍካ እትድቅስ እኳ ኣፍ ደገ ኣፍካ ሓሉ። ወዲ ንኣቦኡ ይንዕቕ፥ ጓል ኣብ ልዕሊ ኣዲኣ ትትልዓል፥ ሰበይቲ ወዲ ድማ ኣብ ልዕሊ ሓማታ ትትልዓል፤ ፀላእቲ ሰብ፥ ኣባላት ቤተሰቡ እዮም። ^a

ኣነ ግና ናብ ኣቦና ክጥምት እየ፤ ነቲ ዘድሕነኒ ኣቦ ክፅበ እየ፤ ኣቦይ ድማ ክሰምዐኒ እዩ። ኦ ፀላኢተይ፥ ብኣይ ባህ ኣይበልኪ! ወዲቐ እኳ እንተ ኾንኩ ክትስእ እየ፤ ኣብ ፅልመት እኳ እንተ ተቐመጥኩ፥ ኣቦና ብርሃነይ ክኸውን እዩ።

ኣነ ቍጥዓ ኣቦና ክፃወር እየ፥ ኣብኡ ስለ ዝበደልኩ፥ ክሳዕ ጉዳየይ ዝማጐተለይ ፍትሒ ድማ ዘውፅአለይ። ናብ ብርሃን ከውፅአኒ እዩ፥ ፅድቁ ኸዓ ክርኢ እየ። ሽዑ ፀላኢተይ ክትርኢ እያ፥ ሕፍረት ከዓ ክትክደን እያ፥ እታ “እግዚኣብሄር ኣምላኽኪ ኣበይ ኣሎ?” ዝበለትኒ። ኣዒንተይ ናባኣ ክጥምታ እየን፤ ሕዚ ድማ ከም ጭቃ መንገዲ ክትርገፅ እያ።

ቅፅርኺ ዝህነፀሉ መዓልቲ ክትመፅእ እያ፥ ዶብኪ ናብ ርሑቕ ዝግፋሓሉ መዓልቲ እያ። በታ መዓልቲ እቲኣ ክመፁ እዮም፥ ካብ ኣሶርን ካብ ከተማታት ግብፅን ናባኺ፥ ካብ ግብፂ ክሳዕ እቲ ሩባ፥ ካብ ባሕሪ ናብ ባሕሪ፥ ካብ እምባ ናብ እምባ። ^b እታ ምድሪ ግና ብሰንኪ እቶም ኣብኣ ዝነብሩ ክትባድም እያ፥ ከም ፍረ ግብርታቶም።

ምሕረት ኣቦና ንዘለኣለም ይነብር

ንህዝብኻ ብበትርኻ ጓስዮ፥ ነቲ መጓሰ ርስትኻ፥ እቶም ኣብ ማእኸል ፍርያም መጓሰዪ ኣብ ዱር በይኖም ዝነብሩ። ኣብ ባሳንን ጊልዓድን ከምቲ ናይ ቐደም ዘመን ይብልዑ።

ከምቲ ኻብ ምድሪ ግብፂ ዝወፃእኻላ መዓልቲ፥ ተኣምራት ከርእዮም እየ።

ኣህዛብ ክርእዩ፥ ብዅሉ ሓይሎም ከዓ ክሓፍሩ እዮም፥ ኣእዳዎም ኣብ ኣፎም ከንብሩ እዮም፥ ኣእዛኖም ድማ ክፅመማ እየን። ከም ተመን ሓመድ ክልሕሱ እዮም፥ ከምቲ ኣብ ምድሪ ዝልሕኩ ፍጡራት። ካብ ፅኑዕ ቦታኣቶም እናንቀጥቀጡ ክወፁ እዮም፤ ናብ ኣቦና ብፍርሓት ክምለሱ እዮም፥ ንኣኻ ኸዓ ክፈርሑ እዮም።

ከም ኣቦና መን ኣሎ፥ ሓጢኣት ዝሓድግ፥ ንዓመፅ ተረፍ ርስቱ ድማ ዝሓልፍ? ንቍጥዓኡ ንዘለኣለም ኣይሕዝን እዩ፥ ልቡ ብምሕረት ይሕጐስ እዩ እሞ። ^c ከም ብሓድሽ ክርህርሃልና እዩ፤ ንበደልና ድማ ብእግሩ ክረግፆ እዩ። ኵሉ ሓጢኣትና ናብ መዓሙቝ ባሕሪ ክትድርብዮ ኢኻ። ንያእቆብ ሓቂ ክትገብረሉ፥ ንኣብርሃም ድማ ምሕረት ክትገብረሉ ኢኻ፥ ከምቲ ካብ ጥንቲ ጀሚርካ ነቦታትና ዝመሓልካሎም።