Josiya Anopemberera Pasika Guru

Josia anoita Pasika isina kumboitwa yakadaro kubvira pamazuva aSamueri, achipa zviuru zvemhuka iye pachake uye achiisa muprista mumwe nomumwe, muRevhi, muimbi nomuchengeti wesuo panzvimbo yake. Ipapo anoomerera kurwa naNeko, achifuratira yambiro yaanoudzwa kuti yaibva kuna Baba vedu, uye anofira paMegidho.

Chitsauko 35.

Josiya akaitira Baba vedu Pasika muJerusarema; vakauraya gwayana rePasika nezuva regumi nemana romwedzi wokutanga. Akapa vapristi mabasa avo akavakurudzira pakushumira muimba yaBaba vedu. Akati kuvaRevhi vaidzidzisa vaIsraeri vose uye vakanga vari vatsvene kuna Baba vedu, “Isai areka tsvene muimba yakavakwa naSoromoni mwanakomana waDhavhidhi, mambo waIsraeri. Hamuchafaniri kuitakura pamapfudzi enyu. Zvino shumirai Baba venyu navanhu vavo vaIsraeri. Zvigadzirirei nedzimba dzamadzibaba enyu, namapoka enyu, maererano nezvakanyorwa naDhavhidhi mambo waIsraeri, uye maererano nemirayiridzo yomwanakomana wake Soromoni. Mirai munzvimbo tsvene maererano nemapoka emhuri evanhuwo zvavo, hama dzenyu, boka rimwe chete ravaRevhi paboka rimwe nerimwe. Urayai gwayana rePasika, muzvitsaure, mugadzirire hama dzenyu, muchitevera shoko raBaba vedu rakataurwa kubudikidza naMozisi.”

Josiya akapa vanhuwo zvavo makwayana nembudzana zviuru makumi matatu, nehando zviuru zvitatu, kuti zvive zvipiriso zvePasika—kuvose vakanga varipo, kubva papfuma yake. Vakuru vake vakapawo nokuzvidira kuvanhu, kuvapristi, nokuvaRevhi. Hirikia, naZekariya, naJehieri, vakuru veimba yaBaba vedu, vakapa vapristi zvipiriso zvePasika zviuru zviviri namazana matanhatu nehando mazana matatu. Konania, pamwe chete nehama dzake Shemaya naNetaneri, naHashabhia, naJeyieri, naJozabhadhi, vatungamiri vavaRevhi, vakapa vaRevhi zvipiriso zvePasika zviuru zvishanu nehando mazana mashanu.

Basa rakagadzirirwa; vapristi vakamira panzvimbo dzavo, vaRevhi namapoka avo, sezvakanga zvarayirwa namambo. Vakauraya makwayana ePasika; vapristi vakasasa ropa ravakapiwa, vaRevhi vachivavhiya. Vakatsaura zvipiriso zvinopiswa, vachizvigovera maererano namapoka emhuri pakati pavanhuwo zvavo, kuti zvipirwe kuna Baba vedu sezvazvakanyorwa mubhuku raMozisi; vakaita saizvozvowo nehando. Vakagocha gwayana rePasika mumoto sezvazvaidiwa, vakabika zvipiriso zvitsvene muhari, nemumbiya, nemumapani, vakazvikurumidza kuzvisvitsa kuvanhuwo zvavo vose. Shure kwaizvozvo vakazvigadzirira ivo pachavo nokuvapristi, nokuti vapristi, ivo vanakomana vaAroni, vakanga vakabatikana vachipira zvipiriso zvinopiswa namafuta kusvikira usiku; saka vaRevhi vakazvigadzirira ivo pachavo nokuvapristi, vanakomana vaAroni. Vaimbi, vanakomana vaAsafi, vakamira panzvimbo dzavo sezvakanga zvarayirwa naDhavhidhi, naAsafi, naHemani, naJedhutuni muoni wamambo. Varindi vemasuo vakagara pasuo rimwe nerimwe; vakanga vasingafaniri kubva pabasa ravo, nokuti hama dzavo vaRevhi vakavagadzirira.

Saka basa rose raBaba vedu rakagadzirirwa pazuva iroro: kuitira Pasika nokupira zvipiriso zvinopiswa paaritari yaBaba vedu, nokurayira kwaMambo Josiya. VaIsraeri vakanga varipo vakaitira Pasika panguva iyoyo, noMutambo weZvingwa Zvisina Mbiriso kwamazuva manomwe. Kwakanga kusina Pasika yakadaro yakamboitirwa muIsraeri kubva pamazuva aSamueri muprofita; hakuna mambo waIsraeri akamboitira Pasika yakafanana neyaJosiya, pane vapristi, navaRevhi, navaJudha vose navaIsraeri vakanga varipo, navagari vomuJerusarema. Pasika iyi yakaitirwa mugore regumi namasere rokutonga kwaJosiya.

Josiya Anourayiwa muHondo paMegidho

Shure kwaizvozvo zvose, Josiya akanga agadzirira temberi, Neko mambo weIjipiti akakwira kundorwa paKarikemishi paYufuratesi, Josiya akabuda kundosangana naye. Asi Neko akatuma nhume kwaari, achiti, “Tinei pakati pedu, iwe mambo waJudha? Handisi kuuya kuzorwa newe nhasi, asi ndinorwa neimba yandiri kurwa nayo. Mwari andiudza kuti ndikurumidze—rega kudzivisa Mwari, uyo ari neni, kuti arege kukuparadza.”

Josiya haana kutendeuka kubva kwaari, asi akashandura chimiro chake kuti arwe naye. Haana kuteerera mashoko aNeko akabva mumuromo waBaba vedu, akaenda kundorwa mubani reMegidho. ^a Vapfuri vouta vakapfura Mambo Josiya; akati kuvaranda vake, “Ndibvisei pano—ndakuvara kwazvo.”

Varanda vake vakamubvisa mungoro vakamuisa mune imwe ngoro yake yechipiri vakamuendesa kuJerusarema, akafira ikoko akavigwa mumakuva amadzibaba ake. VaJudha vose neJerusarema vakachema Josiya.

Jeremiya akanyora nziyo dzokuchema Josiya, uye kusvikira nhasi vaimbi vose, varume navakadzi, vanoimba nziyo dzokuchema Josiya. Izvi zvakava tsika muIsraeri, uye zvakanyorwa muNziyo dzokuChema. Mamwe mabasa aJosiya, namabasa ake okutendeka maererano nezvakanyorwa mumurayiro waBaba vedu, mabasa ake, kubva pokutanga kusvikira pokupedzisira, akanyorwa muBhuku raMadzimambo aIsraeri neJudha.