Ng'eetei Kora Agobo Musa
Kole Kora ak pounik pogol aeng' ak konom kole tiliil tuiyet komugul, ak ma nyolu kotinyei chii ne kiriikyin icheek. Koleweni Musa kirokweek kogel. Ki yaat ng'wony kutinnyi eng' Datan ak Abiram, kogabeel maat pichooto pogol aeng' ak konom, ak kowolji Kwandanyo ineegei ng'olyoonooto.
Ng'alaali Kwandanyo eng' mustarisyek 21, 24
16 1Ki iyum Kora weeriitap Ishar, weeriitap Kohat, weeriitap Lawi, piik, ak Datan ak Abiram che weeriigap Eliap, ak On ne weeriitap Pelet, che po Reuben. 2Ki tonon eng' taitap Musa, kobooto pounigap piigap Israel pogol aeng' ak konom che po tuiyet, piik che ki lewen che po tuiyet, murenik che ki taagunotiin. 3Ki iyumgei agobo Musa ak Aron, ak kole, “Kagoyai che chaang' miising'! Tiliil tuiyet komugul, icheek tugul, ak mi Kwandanyo kobooto icheek. Amu nee si itesgei barak kosiir tuiyetap Kwandanyo?”
4Ye kingo kas Musa niito, kobutyi ng'wony kong'uruuk. 5Koleenji Kora ak kweanennyi tugul, ale, “Karon, koboorchi Kwandanyo ng'oo ne po ineendet ak ng'oo ne tiliil, ak koriikyin ineegei chiichooto. Age tugul ne lewen, koriikyin ineegei. 6Oyai niito: onam kirokweek, inyee Kora ak kweanenng'ung' tugul. 7Mutai onde maat eng' icheek, ak onde nyamdutik barak eng' taitap Kwandanyo. Chiito ne lewen Kwandanyo, koek ne tiliil. Kagoyai che chaang' miising', okweek weeriigap Lawi!”
8Koleenji Musa Kora kogeny, ale, “Ogas nguno, okweek weeriigap Lawi: 9Tos ming'in niito eng' okweek, le ki iibesyok Kwandap Israel eng' tuiyetap Israel alak, si koriikyok ineegei, si oyai poisyetap tabendotap Kwandanyo, ak otononse eng' taitap tuiyet si oboisyee icheek? 10Ak kagorikyok ineegei, inyee ak tupchoguk tugul weeriigap Lawi, ago icheeng'e nguno tiseinateet kogeny? 11Inyee ak kweanenng'ung' tugul ki iyumgei agobo Kwandanyo. Aron—ko king'o ineendet, si ong'unyng'ung'ji?”
12Ki iyookto Musa piik koguur Datan ak Abiram weeriigap Eliap. Ak kole, “Ma kebwa! 13Tos ming'in niito, le ki imutwech barak kebunu emet nyiitaat cheego ak komi kumyat si ibarech eng' surkwen, le imache iboiywech agine? 14Ak ma ki imutwech emet nyiitaat cheego ak komi kumyat, anan koonech mbareenik ak mbareenigap sabibuk koek poroteet. Imache ibalu konyegap murenichu? Ma kebwa!”
15Ki nereech Musa miising', ak koleenji Kwandanyo, ale, “Mat igeer kagoochinennywa. Ma anam agot sigiryo agenge eng' icheek, ak ma ayaun age tugul eng' icheek tengek.”
16Koleenji Musa Kora, ale, “Inyee ak kweanenng'ung' tugul, obargei eng' taitap Kwandanyo mutai—inyee, icheek, ak Aron. 17Konam chii tugul kiroktonyi, ak konde nyamdutik barak, ak koip eng' taitap Kwandanyo—kirokweek pogol aeng' ak konom—inyee ak Aron, chii tugul ak kiroktonyi.”
18Ki nam chii tugul kiroktonyi, ak konde maat ak konde nyamdutik barak, ak kotononse eng' kurgeetap emait ne kituiyechin kobooto Musa ak Aron. 19Ki iyum Kora tuiyet komugul agobo icheek eng' kurgeetap emait ne kituiyechin; ak kaboorunot telunatetap Kwandanyo eng' tuiyet komugul.
20Ak koleenji Kwandanyo Musa ak Aron, ale,
21“Oibesyegei eng' tuiyoni, si awong'u icheek eng' sait age ngelelik.”
22Ki butyi Musa ak Aron ng'wony, ak kole, “Ee Kwandanyo, Kwandap saboonwegap piik tugul—ngot koyai chii agenge tengek, inereekyini tuiyet komugul?” 23Koleenji anyun Kwandanyo Musa,
24“Ng'alaalji tuiyet, ile: Ositegei eng' koriigap Kora, Datan, ak Abiram.”
25Ki ng'eet Musa ak koba Datan ak Abiram, ak ki isup poisyegap Israel ineendet. 26Koleenji tuiyet, ale, “Ositegei eng' emaisyegap murenichu che kiptengegin. Amat otwaa kiy age tugul ne po icheek, si mata kigeswok eng' ng'oogik tugul che po icheek.”
27Ki istoegei anyun icheek eng' emaisyegap Kora, Datan, ak Abiram komosi ak komosi tugul, ago kibunu Datan ak Abiram saang' ak kotonon eng' kurgeetap emaisyekwak kobooto kwonyiikwak, lagokwak, ak lagok che mengech.
28Koleenji Musa, ale, “Eng' niito ong'en le ki iyookto Kwandanyo si ayai tuguuchu tugul, ak le mo ki po muguleldanyu ineegei: 29Ngot kome murenichu meet ne po piik tugul, ak kosich kagesunet ne po chii age tugul, ko ma ki iyookto Kwandanyo anee. 30Ago ngot koyai Kwandanyo kiy ne leel, ak koyaat ng'wony kutinnyi si kolugui icheek ak tuguuk tugul che po icheek, ak koba mestonogap meet kosaptos, ko ong'en le kagosas murenichu Kwandanyo.”
31Ye kingo bata komwa tuguuchu tugul, kochabak ng'wony ne mi kurerennywa, 32ak koyaat ng'wony kutinnyi, kolugui icheek, kooriikwak, piik tugul che po Kora, ak tuguukwak tugul. 33Ki pa icheek kobooto che po icheek tugul kosaptos keitu mestonogap meet; ak kigerchi ng'wony icheek, ak ki beeti icheek eng' tuiyet. 34Ki mwei Israel tugul che ki mi kurerennywa agobo kayatennywa, amu kole, “Komachei ng'wony kolugui acheek agine!” 35Ak kibunu maat eng' Kwandanyo ak kowong'u murenik pogol aeng' ak konom che ki igoito nyamdutik.